جاۋىنگەرلىك ونەر ويىندارى قازاقستان ءۇشىن تابىستى اياقتالدى  

ساۋد ارابياسىنىڭ استاناسى — ار-رياد قالاسىندا V بۇكىلالەمدىك جاۋىنگەرلىك ونەر ويىندارى مارەسىنە جەتتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

ون ءبىر كۇننىڭ ىشىندە 16 سپورت تۇرىنەن 1500-دەن استام اتلەت 954 مەدالدى ءوزارا ساراپقا سالدى. ونىڭ 259-ى التىن، 259-ى كۇمىس جۇلدە بولسا، قالعان 436-سى قولا مەدال بولدى.

قازاقستان دەلەگاتسياسى 12 التىن، 13 كۇمىس پەن 23 قولا مەدال جەڭىپ الىپ، جالپىكوماندالىق ەسەپتە ءۇشىنشى ورىننان كورىندى. كوش باسىندا ۋكراينا (21 التىن، 17 كۇمىس، 15 قولا جۇلدە)، ودان كەيىن سوڭعى جارىس كۇنى ەكىنشى ورىنعا كوتەرىلگەن ساۋد ارابياسى (12 التىن، 20 كۇمىس، 19 قولا مەدال) تۇر. جالپى، بيىلعى ويىنداردا 120-دان استام ەلدىڭ 87-سىنە جۇلدە بۇيىردى.

قازاقستان دەلەگاتسياسى ءۇشىن ار-ريادتاعى كەشەندى جارىستىڭ ءار كۇنى تاريحي ناتيجەمەن ەستە قالىپ وتىردى. ماسەلەن، ويىندار باعدارلاماسىنا العاش رەت قوسىلعان قازاق كۇرەسى مەن ارمرەستلينگتەن ۇلتتىق قۇراما كوماندانىڭ سپورتشىلارى تابىستى ونەر كورسەتىپ، كوماندالىق ەسەپتە ءبىرىنشى ورىن الدى. سامبو مەن گرەپپلينگتەن قورجىنعا World Combat Games-ءتىڭ العاشقى التىن جۇلدەسى تۇسسە، كاراتەشىلەر ءبىرىنشى رەت جۇلدەگەرلەر قاتارىنان كورىندى. جالپى، ەل نامىسىن سپورتتىڭ 10 تۇرىنەن 53 سپورتشى قورعادى.

بۇل ويىندارعا كەيبىر سپورتتان نەگىزگى قۇرامدى الىپ كەلمەسەك تە، بارىنشا جاقسى قۇرام جاساقتاۋعا تىرىستىق. ءبىز ءۇشىن ۇلتتىق سپورتىمىز قازاق كۇرەسىنىڭ ويىندار باعدارلاماسىنا العاش رەت كىرگەنى قۋانتارلىق جايت. بالۋاندارىمىز جاقسى ناتيجە كورسەتتى. ءدال وسىلاي ارمرەستلينگكە قاتىستى ايتۋعا بولادى. ۇلتتىق قۇراما العا قويىلعان جوسپاردى ورىندادى. وسى جەردە قانداي كەمشىلىكتەر بارىن دا كوردىك. ەندى سولاردى تالداپ، جاتتىقتىرۋشىلارمەن بىرگە وسى باعىتتا جۇمىستى قولعا الامىز،-دەدى تسم سپورت جانە دەنە شىنىقتىرۋ ىستەرى كوميتەتىنىڭ باس مامانى كەلبەت نۇرعازينا.

وسى كورسەتكىشتىڭ ارقاسىندا قازاقستان جاۋىنگەرلىك ونەر ويىندارىنىڭ جالپى رەيتينگىندە 37-دەن ۇزدىك وندىققا كىردى. وسىعان دەيىن بەيجىڭ مەن سانكت-پەتەربۋرگتە وتكەن ويىنداردى قوسقاندا قورجىنعا 1 التىن، 3 كۇمىس جانە 5 قولا تۇسكەن.

ويىندار كەزىندە 16 سپورتتىڭ ىشىندەگى ايكيدو، ارمرەستلينگ، دجيۋ-دجيتسۋ، مۋايتاي، سامبو مەن ساۆاتەدەن (فرانتسۋز بوكسى) پارا-اتلەتتەر اراسىندا ارنايى جارىس ءوتتى. جەكپە-جەك ونەرىنىڭ جانكۇيەرلەرىنە باسەكەلەردى رەسمي سايتتان تىكەلەي ەفيردە كورسەتتىك. حابار تاراتۋشىلاردىڭ ارقاسىندا 100-دەن استام مەملەكەتتىڭ اۋماعىنا سيگنال تاراتتىق،-دەدى «سپورت اككورد»، ياعني ويىندار پرەزيدەنتى يۆو فەررياني.

كەلەسى ويىن 2025 جىلى بولادى.

جارىستىڭ قاي جەردە بولاتىنى كەلەسى جىلدىڭ باسىندا جاريالانادى.

فوتو: تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى