قازاقستان مەن رەسەي حوككەيشىلەرى توبەلەستى (ۆيدەو)

سانكت-پەتەربۋرگ قالاسىندا حوككەيدەن قازاقستان مەن رەسەي قۇرامالارىنىڭ ويىنشىلارى بەيبارىس ورازوۆ پەن اندرەي ماتيۋشينمەن جاعا ۇستاسىپ،  توبەلەسىپ قالدى.

بۇل ماتچتا 20 جاسقا دەيىنگى قازاقستان قۇراماسى رەسەيدىڭ 18 جاسقا دەيىنگى كومانداسىنان ۇلكەن ەسەپپەن جەڭىلدى. ويىن اياقتالار كەزدە ورازوۆ ماتيۋشينمەن شەكىسىپ، ونى سوقىنىڭ استىنا الدى.

جالپى، حوككەيدە توبەلەستەر ءجيى بولىپ تۇرادى. حوككەي تاريحىنداعى ەڭ ءىرى توبەلەس 1987 جىلى كسرو مەن كانادا جاستار قۇرامالارى اراسىنداعى ماتچتا بولعان. بۇل ماتچتا 4:2 ەسەبىمەن كانادا قۇراماسى العا شىققاندا ويىننىڭ ەكىنشى كەزەڭىندە كانادانىڭ قورعاۋشىسى تەو فلەري كسرو شابۋىلشىسى ۆالەري زەلەپۋكيندى ارقاسىنان ءبىر ۇرىپ، ۇرىس-كەرىستى باستاپ كەتكەن.  سونىڭ كەسىرىنەن قوس قۇرامانىڭ ويىنشىلارى توپ-توپقا ءبولىنىپ، ءبىر-بىرىنە جۇدىرىق الا جۇگىرگەن.

قوسالقى قۇرامداعى ويىنشىلار قاتارىنداعى كەڭەس وداعى قۇراماسىنىڭ ءتورت ويىنشىسى دا ورىندارىن تۇرىپ، توبەلەسكە قوسىلدى. كوپ كەشىكپەي مۇز ايدىنىنا ەكى كۇرامانىڭ دا قوسالقى قۇرامىنداعى ويىنشىلارى شىعىپ، جاعدايدى ۋشىقتىرىپ جىبەردى. ەكى قۇرامانى تارتىپكە شاقىرۋ ارەكەتتەرى ەشتەڭە اكەلمەگەندىكتەن، ارەنادا جارىق وشىرىلگەن. ەكى ەلدىڭ حوككەيشىلەرىن تارتىپكە شاقىرا الماعان نورۆەگيالىق تورەشى حانس رونينگ پەن ەكى لاينسمەن مۇز ايدىنىنان كەتىپ قالدى. اقىرىندا ەكى كوماندا ويىنشىلارى 18 ايعا، ال ەكى جاتتىقتىرۋشى 3 جىلعا ويىننان الىستاتىلدى.

داستان كەنجالين،

استانا