استانادا اسىق اتۋدان حالىقارالىق تۋرنير اياقتالدى

بۇگىن استانا قالاسىنداعى «اسپان» سپورت كەشەنىندە گران-پري «ازيا اسىعى» حالىقارالىق ءتۋرنيرى اياقتالىپ، جەڭىمپازدار مەن جۇلدەگەرلەر انىقتالدى.

اسىق اتۋ فەدەراتسياسىنىڭ حابارلاۋىنشا، پاكىستان، ءۇندىستان، قىتاي، موڭعوليا، وزبەكستان، قىرعىزستان جانە قازاقستان قۇرامالارى قاتىسقان ءدۇبىرلى دوداعا ەرلەر مەن ايەلدەر اراسىندا جۇزگە جۋىق اسىقشى قاتىسىپ، جارىس كورىگىن قىزدىردى. اسا تارتىستى وتكەن سىندا اسىق اتۋدان نۇرجىگىت انۋاربەك ۇلى (شىمكەنت) جەڭىمپاز اتانسا، پاۆلودار وبلىسىنىڭ سپورتشىسى كەرىم جازدىقباي كۇمىس جۇلدەمەن كۇپتەلدى. ەكى قولا جۇلدەگە ەربولات قارجاۋباي (قاراعاندى وبلىسى) مەن ايتۋار يسپول (اقمولا وبلىسى) يەلىك ەتتى.

بەس اسىقتان استانالىق كاميلا دانياروۆاعا تەڭ كەلەر ەشكىم بولماسا، تاعى ءبىر استانالىق انارگۇل حودجانيازوۆا ەكىنشى ورىننان كورىندى. ەكى قولا جۇلدەنى مارجان ميرحاميدوۆا (تۇركىستان وبلىسى) مەن گاۋحار جاليەۆا (قوستاناي وبلىسى) جەڭىپ الدى.

سونىمەن قاتار گران-پري «ازيا اسىعى» حالىقارالىق ءتۋرنيرى اياسىندا استانا قالالىق اسىق اتۋ فەدەراتسياسىنىڭ ۇيىمداستىرۋىمەن «استانا ساقاسى» رەسپۋبليكالىق ءتۋرنيرى ءوتىپ، اسىق اتۋدان تۇركىستاندىق اماندوس ايتقۇلوۆ جەڭىستىڭ بيىك تۇعىرىنان كورىندى. ەكىنشى ورىنداعى اسلان بۇلانباي، قوس قولا مەدالگە يە بولعان ەسەن جۇماعۇلوۆ پەن دۋلات ۋماروۆ — استانا قالاسىنىڭ اسىقشىلارى، — دەدى اسىق اتۋ فەدەراتسياسى ءباسپاسوز قىزمەتىنىڭ جەتەكشىسى مۇساعالي تاسقاليەۆ.

بەس اسىقتان دا استانالىق پەريزات ەلەمەس قارسىلاس شىداتپاسا،  اقمولالىق كوگەرشىن دۋمان ەكىنشى ورىنعا يە بولدى. قوس قولا جۇلدەنى ايجان سەرىكوۆا (استانا قالاسى) مەن ايدانا ەسەمبەكوۆا (تۇركىستان وبلىسى) جەڭىپ الدى.

جەڭىمپاز جانە جۇلدەگەر اتانعان اسىقشىلار اسىق اتۋ فەدەراتسياسى مەن استانا قالاسى فەدەراتسياسى تاراپىنان ديپلوم، مەدالدار مەن قارجىلاي ماراپاتقا يە بولدى.

جەڭىمپاز جانە جۇلدەگەر اتانعان اسىقشىلارعا جۇلدەلەرىن اسىق اتۋ فەدەراتسياسىنىڭ اتقارۋشى ديرەكتورى جومارت سابىرجان ۇلى، «اسپان» سپورت كەشەنىنىڭ ديرەكتورى سەرىك حالەلوۆ، قازاقستان رەسپۋبليكاسىنىڭ قۇرمەتتى سپورت قايراتكەرى، ارداگەر اسىقشى اسەت رامازانوۆ، اسىق اتۋدان مەملەكەتتىك جاتتىقتىرۋشى جومارت ورازوۆ، اقتوبە اسىق اتۋ فەدەراتسياسىنىڭ پرەزيدەنتى ابىلقايىر سوتقاروۆ پەن وسى ۇيىمنىڭ ۆيتسە-پرەزيدەنتى ورازباي ۇلقابايلار تابىس ەتتى.

ەندى بۇگىن ءتۇساۋا استانادا اسىق اتۋدان «جىل ۇزدىگى-2023» اتاعىنىڭ يەگەرى انىقتالادى.

ۇلتتىق سپورتىمىزدى ۇلىقتاپ جۇرگەن اسىقشىلاردى ماراپاتتۋ ءراسىمىن اسىق اتۋ فەدەراتسياسى ۇيىمداستىرادى. سالتاناتتى ءىس-شارا Rixos President قوناق ۇيىندە بولادى.