Aqtóbede Qazaqstan fýtbol tarıhyndaǵy qymbat transfer jasaldy

Kamerýndyq 28 jastaǵy jartylaı qorǵaýshy Gabı Kıkı «Aqtóbe» fýtbol klýbymen kelisimshartqa qol qoıdy. Bul týraly klýbtyń baspasóz qyzmeti habarlady.

Qolda bar málimetke qaraǵanda, onymen 1 mln eýroǵa kelisimshart jasaldy.

Gabı Kıkı fýtbolshy mansabyn Kamerýnnyń«Boms» klýbynda bastap, keıin «Edıng Sport» klýbynda oınady. Odan keıin ol Belarýstiń «Dnepr» (Mogılev), «Dınamo-Brest» pen «Rýh» (Brest) klýbtarynyń jeıdesinde alańǵa shyqty.

Belarýs chempıony atanyp, osy eldiń Sýperkýbogyn eki ret jeńip aldy.

2022-2023 jyldary Moldovanyń «Sherıf» komandasynda oınap, eldiń eki dúrkin chempıony atandy. Sonymen birge Moldovanyń  eki dúrkin kýbogynyń ıegeri boldy.

Gabı Kıkı «Sherıftiń» quramynda ÝEFA Eýropa lıgasynyń toptyq kezeńinde eki ret oınady.

Buǵan deıin ulttyq quramanyń jartylaı qorǵaýshysy Ramazan Orazov Slovenııanyń «Koper» klýbynan «Aqtóbege» qaıtyp kelgen edi. Odan basqa bıylǵy maýsymda «Aqtóbeniń» namysyn Dmıtrıı Parfenov, Baǵdat Qaıyrov, Igor Shakıı men Igor Trofıme qorǵaıtyn bolady.