SportPress.kz قازاقستان سپورت جاڭالىقتارى
كاسىپقوي بوكسشى انجەليكا لۋكاس تايلاندتا كەزەكتى جەكپە-جەگىنە شىعىپ، جەرگىلىكتى بوكسشىن كادەسارا دجادپاكديءدى نوكاۋتپەن جەڭدى. ول وسىمەن اسا جەڭىل سالماقتاعى جەتىنشى جەڭىسىنە جەتتى.
وسى جەكپە-جەكتەن كەيىن بوكسشى الەۋمەتتىك جەلىدە جەڭىسىن قازاقستانعا ارنايتىنىن ايتتى.
بۇگىن مەن كاسىبي مانسابىمدا جەتىنشى رەت جەڭىسكە جەتتىم. وعان ارينە، وتە قۋانىشتىمىن. وسى جەڭىسىمدى سۇيىكتى ەلىمە ارنايمىن.
قازىر مەنىمەن بوكسشىلاردىڭ كوبى جۇدىرىقتاسقىسى كەلىسپەيدى.
ماعان بانگكوگتا كادەسارا دجادپاكديگە قارسى جەكپە-جەك وتكىزۋدى ۇسىنعان كەزدە ويلانىپ قالعانىم راس. ويتكەنى، قارسىلاسىما ونىڭ تۋعان جەرىندە قارسى تۇرۋ وڭاي ەمەس. ونىڭ بەلگىلى ءبىر قاۋپى بار. بىراق مەن ءابسوليۋتتى الەم چەمپيونى بولعىم كەلەتىنىمدى ايتتىم. مەن قارسىلاستارىمدى تاڭداماي، ءبارىن، ءتىپتى ءوز جەرىندە دە جەڭۋىم كەرەك. كاسىپقوي بوكستا ءالسىز ادام بولمايدى. ءبىر سەكۋندتا ءبارى وزگەرەدى، ءبىر سوققى ءبارىن شەشەدى.
بۇل مەن ءۇشىن وتە ماڭىزدى جەڭىس بولدى. مەن تەك نوكاۋتپەن نەمەسە نوكداۋنمەن جەڭىسكە جەتۋىم كەرەك ەكەنىن ءبىلدىم. ايتپەسە، جەڭىس ەشكىمگە بەرىلمەيدى. سوندىقتان مەن جەنكپە-جەكتى كوپ سوزباي، قارسىلاسىمدى نوكاۋتقا ءتۇسىرىپ، جەڭدىم!
وسى جەڭىستى ەلىمە ارنايمىن. مەن قاي كەزدە، قاي جەردە جۇرسەم دە ەلىمنىڭ ىستىق الاقانىن، قولداۋىن سەزىنەمىن. بارىڭىزگە راحمەت! ءابسوليۋتتى الەم چەمپيونى تيتۋلىن الۋعا دا از ۋاقىت قالدى. العا!، — دەدى ول.
بۇل جەكپە-جەكتە انگەلينا لۋكاس كادەسارا دجادپاكديدى ۋاقىتىنان بۇرىن جەڭدى. نەگىزى جەكپە-جەك سەگىز راۋندقا جوسپارلانعان ەدى. الايدا رەفەري ءتورتىنشى راۋندتا ايقاستى توقتاتتى.
لۋكاستىڭ قارسىلاسى دا وسال بوكسشى ەمەس. ول قازىرگە دەيىن كاسىپقوي بوكستىڭ شارشى الاڭىندا جەتى رەت جەڭىسكە جەتكەن. ءۇش رەت جەڭىلگەن. وسى جولى ءتورتىنشى رەت جەڭىلىستىڭ اششى ءدامىن تاتتى.
داستان كەنجالين،
استانا
View this post on Instagram
