تەڭگە ىلۋدەن ءىى ازيا كۋبوگىنا جەتى ەلدىڭ سپورتشىلارى قاتىسادى

 ۇلتتىق سپورت قاۋىمداستىعىنىڭ تەڭگە ءىلۋ فەدەراتسياسى 6-7 ءساۋىر ارالىعىندا شىمكەنت قالاسىنداعى ورتالىق يپپودرومدا ءىى ازيا كۋبوگىن وتكىزەدى، دەپ حابارلادى تەڭگە ءىلۋ فەدەراتسياسى.

ازيا كۋبوگىنا تەڭگە ىلۋدەن قازاقستان قۇراماسىنان باسقا، التى مەملەكەتتىڭ سپورتشىلارى قاتىسادى. اتاپ ايتقاندا، قىرعىزستان، وزبەكستان، رەسەي، قىتاي، موڭعوليا، تاجىكستان ەلدەرىنەن كەلگەن 50-گە جۋىق سپورتشى تەڭگە ءىلۋدىڭ ءۇش ءستيلى بويىنشا باق سىنايدى.

تەڭگە ءىلۋ فەدەراتسياسىنىڭ پرەزيدەنتى امانگەلدى ابدىقادىروۆتىڭ ايتۋىنشا، وسى ازيا كۋبوگىنا ەلىمىزدىڭ ۇزدىكتەرى قاتىسادى.

بۇل – V دۇنيەجۇزىلىك كوشپەندىلەر ويىندارى الدىندا ۇلتتىق قۇرامانى شىڭداۋعا ۇيىمداستىرىلعان جارىس. سونداي-اق، شەتەلدىك قۇرامالار ءۇشىن دە قازاقستاننىڭ ۇزدىك تەڭگە ءىلۋ سپورتشىلارىنان تاجىريبە الماسۋعا ۇلكەن مۇمكىندىك. حالىقارالىق جارىستى ۇيىمداستىرۋداعى باستى ماقسات – ۇلتتىق سپورتىمىز تەڭگە ءىلۋدى وزگە مەملەكەتتەرگە ناسيحاتتاۋ جانە الەمدىك دارەجەگە كوتەرۋ، — دەدى فەدەراتسيا باسشىسى.

ال تەڭگە ىلۋدەن قازاقستان ۇلتتىق قۇراماسىنىڭ مۇشەسى عالىمجان ءىزجانوۆ بۇل حالىقارالىق جارىسقا ءتاستۇيىن دايىن ەكەندەرىن جەتكىزدى.

ازيا كۋبوگى شەتەلدىك قۇرامالاردىڭ قاتىسۋىمەن وتە تارتىستى، قىزىق بولادى دەپ سەنەمىز. ارينە، ۇلتتىق سپورتىمىز بولعاندىقتان، ءبىزدىڭ جىگىتتەر نامىستى قولدان بەرمەيدى، — دەدى سپورتشى.

ۇيىمداستىرۋشىلار جارىستى بارىنشا ءادىل باعالاۋ ءۇشىن وسى جولى تەڭگە ءىلۋ سپورتىنىڭ تاريحىندا العاش رەت بەينە قايتالاۋ جۇيەسى قولدانىلاتىنىن العا تارتتى. سونىمەن قاتار، ۋاقىتتى ولشەۋ ءۇشىن ارنايى لازەر سەكۋندومەر پايدالانىلادى.

ەسكە سالساق، رەسپۋبليكالىق تەڭگە ءىلۋ فەدەراتسياسى ۇلتتىق سپورت قاۋىمداستىعىنىڭ قۇرامىنا كىرەدى.  قاۋىمداستىق قۇرامىندا بۇدان وزگە «بايگە»، «كوكپار»، «اۋدارىسپاق»، «ساداق اتۋ»، «جامبى اتۋ»، «قۇسبەگىلىك»، «اسىق اتۋ»، «JORYQ» ات سپورتى مەن باسقا دا فەدەراتسيالار بار. ۇلتتىق سپورت قاۋىمداستىعىن بەلگىلى كاسىپكەر، مەتسەنات، «Altyn Qyran Foundation» قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.