ەلىمىزدە «اتلەتيكو مادريد» كلۋبىنىڭ اكادەمياسى اشىلادى

مەملەكەت باسشىسى قاسىم-جومارت توقاەۆ «اتلەتيكو مادريد» فۋتبول كلۋبىنىڭ پرەزيدەنتى ەنريكە سەرەسو توررەسپەن كەزدەستى، دەپ حابارلادى اقوردا.

پرەزيدەنتكە ەلىمىزدە «اتلەتيكو مادريد» فۋتبول اكادەمياسىن اشۋ جوباسى تانىستىرىلدى.

قاسىم-جومارت توقاەۆ يسپانيالىق كلۋبتىڭ فۋتبول الەمىندەگى بەدەلى زور ەكەنىن اتاپ ءوتىپ، ەلىمىزدە سپورتتىڭ وسى ءتۇرىن دامىتۋعا جانە تاجىريبە الماسۋعا قىزىعۋشىلىق تانىتقانى ءۇشىن ەنريكە سەرەسو توررەسكە العىس ءبىلدىردى.

مەملەكەت باسشىسىنىڭ ايتۋىنشا، قازاقستاندا فۋتبولدى دامىتۋعا ايرىقشا نازار اۋدارىلادى. قازىر ەلىمىزدەگى سپورت مەكتەپتەرىندە، فۋتبول سەكتسيالارىندا 40 مىڭعا جۋىق بالا جاتتىعادى. سونداي-اق ينفراقۇرىلىم جاقسارتىلىپ، جاڭا ستاديوندار سالىنۋدا.

قاسىم-جومارت توقاەۆ فۋتبولدى دامىتۋعا باعىتتالعان بۇل باستاماعا مەملەكەت جان-جاقتى قولداۋ كورسەتۋگە دايىن ەكەنىن ايتتى.

ءوز كەزەگىندە ەنريكە سەرەسو توررەس «اتلەتيكو مادريد» فۋتبول اكادەمياسى الەمنىڭ كوپتەگەن ەلىندە اشىلعانىن جەتكىزدى. اكادەميادا دارىندى فۋتبولشىلاردى تاربيەلەۋمەن قاتار، ولاردى الەمدىك فۋتبول ليگالارىنا شىعارۋ ءۇشىن ۇزدىك تاجىريبەلەردى ەنگىزۋگە، جاتتىقتىرۋشىلار مەن تالىمگەرلەردىڭ بىلىكتىلىگىن ارتتىرۋعا ءمان بەرىلەدى.

«اتلەتيكو مادريد» فۋتبول اكادەمياسى الماتى وبلىسى، تالعار قالاسىنداعى Akbulak وليمپيادا ورتالىعىنىڭ بازاسىندا قۇرىلادى.

كەزدەسۋ سوڭىندا ەنريكە سەرەسو توررەس قاسىم-جومارت توقاەۆقا «اتلەتيكو مادريد» ويىنشىلارىنىڭ قولتاڭباسى قويىلعان جەيدە سىيلادى.