Aqjúrek Tańatarov — Almaty oblysy dene shynyqtyrý sport basqarmasynyń basshysy!

Týrızm jáne sport mınıstrligi janyndaǵy óńirlik sport basqarmalarynyń basshylaryn taǵaıyndaý jónindegi komıssııanyń kezekti otyrysy ótti, dep habarlady atalǵan vedomstvonyń baspasóz qyzmeti.

Jıynda Almaty oblysynyń dene shynyqtyrý jáne sport basqarmasynyń basshysy laýazymyna usynylǵan úmitker qaraldy. Onda erkin kúresten London Olımpıadasynyń qola júldegeri Aqjúrek Tańatarovtyń kandıdatýrasy jan-jaqty talqylandy. Sonyń nátıjesinde oǵan komıssııa músheleri kelisim berdi, — delingen habarlamada.

Qazirgi kezde Aqjúrek Tańatarov Jambyl oblysy ákimdiginiń dene shynyqtyrý jáne sport basqarmasy №7 oblystyq mamandandyrylǵan balalar-jasóspirimder sport mektebiniń basshysy qyzmetin atqarady.

Úmitkerdiń sport salasyndaǵy kásibı tájirıbesi, basqarýshylyq qabileti jáne óńirdegi sportty damytýǵa qatysty ustanymy komıssııa tarapynan jan-jaqty zerdelenip, oń sheshim qabyldandy.

Kandıdattardy jergilikti atqarýshy organdar usynady. Al taǵaıyndaý tek Týrızm jáne sport mınıstrligi janyndaǵy komıssııanyń maquldaýynan keıin bolady, — dep habarlady mınıstrlik.

Aqjúrek Tańatarov 1986 jyly týǵan. 2012 jyly London Olımpıadasy men 2017 jyly álem chempıonatynda qola júldeger atandy. Al, 2017 jyly Azııa chempıony ataǵyn jeńip aldy.

Byltyrǵy jeltoqsan aıynda bokstan Olımpıada chempıony Baqtııar Artaev Qyzylorda oblysynyń dene shynyqtyrý, sport jáne týrızm basqarmasyna basshy bolyp taǵaıyndaldy.