«قايرات» قارت قۇرلىققا قادام باستى. العاشقى قارسىلاسى – «رەال» (مادريد)

موناكودا فۋتبولدان ۋەفا چەمپيوندار ليگاسى 2025/2026 جىلعى ماۋسىمداعى نەگىزگى توبىنىڭ جەرەبەسى تارتىلدى.

وسى ءىس-شارادا الماتىنىڭ «قايرات» كلۋبىنىڭ قارسىلاستارى انىقتالدى.

جەرەبە چەمپيوندار ليگاسىنىڭ نەگىزگى توبىنا جولداما العان 36 كلۋبتىڭ اراسىندا بولدى. وسى جاڭارتىلعان پىشىندەگى (فورمات) تۋرنير ەكىنشى رەت وتكەلى وتىر. بۇدان كەيىن كوماندالار ءبىرتۇتاس تۋرنير كەستەسى اياسىندا ءوزارا وينايتىن بولادى.

جالپى كەزەڭنىڭ قورىتىندىسى بويىنشا ۇزدىك 8 كوماندا بىردەن 1/8 فينالعا شىعادى. ال 9-دان 24-ورىنعا دەيىنگى ورىنداردى العان كوماندالار پلەي-وففتاعى ماتچتارىن ودان ءارى جالعاستىرۋ ءۇشىن تۇيىسپە ويىنداردا وينايدى. 25-تەن 36-ورىنعا دەيىن ورىن العان كلۋبتار تۋرنيردەن شىعىپ قالادى. ولار ەۋروپا ليگاسىنا دا شىعا المايدى.

چەمپيوندار ليگاسىنىڭ 2025/2026 جىلدارعى ماۋسىمداعى فينالى كەلەسى جىلى 30 مامىردا بۋداپەشت قالاسىنىڭ «پۋشكاش ارەنا» ستاديونىندا بولادى.

جەرەبەنىڭ قورىتىندىسى بويىنشا «قايرات» «رەال» مادريد (يسپانيا)، «ينتەر» (يتاليا)، «ارسەنال» (انگليا)، «بريۋگگە» (بەلگيا)، «سپورتينگ» (پورتۋگاليا)، «وليمپياكوس» (گرەكيا)، «پافوس» (كيپر)، «كوپەنگاگەن» (دانيا) كلۋبتارىمەن وينايدى.

ماتچتاردىڭ تولىق كۇنتىزبەسى 30 تامىزعا دەيىن انىقتالادى.

الماتى قالاسىندا بولاتىن ويىندار:

«رەال» (الەمدەگى ەڭ قىمبات كلۋب. قۇنى — 1،4 ملرد ەۋرو)

«بريۋگگە» (وتكەن ماۋسىمدا چەمپيوندار ليگاسىنىڭ 1/8 فينالىنا قاتىسقان. قۇنى — 173،40 ملن ەۋرو)

«وليمپياكوس» (ەۋروپا ليگاسىنىڭ پلەي-وففىندا ويناعان. قۇنى — 102،20 ملن ەۋرو)

«پافوس» (چەمپيوندار ليگاسىنىڭ دەبيۋتانتى. قۇنى — 20،85 ملن ەۋرو)

سىرت الاڭداعى ويىندار:

«ينتەر» (بىلتىرعى ماۋسىمنىڭ ءفيناليسى، 708،30 ملن ەۋرو)
«ارسەنال» (الەمدەگى ەكىنشى قىمبات كلۋب — 1،37 ملرد ەۋرو)

«سپورتينگ» (چەمپيوندار ليگاسىنىڭ 1/16 فينالىنا شىققان. قۇنى — 450،80 ملن ەۋرو)

«كوپەنگاگەن» (كونفەرەنتسيا ليگاسىنىڭ پلەي-وففىندا ويناعان. قۇنى — 75،15 ملن ەۋرو)

ماتچتار 16 قىركۇيەك پەن 28 قاڭتار ارالىعىندا بولادى. ناقتى كۇنتىزبە الداعى ۋاقىتتا حابارلانادى.

ءتۋرنيردىڭ 1-تۋرى ماتچتارى 2025 جىلعى 16-18 قىركۇيەك كۇندەرىنە جوسپارلانعان. 2-تۋر 30 قىركۇيەك جانە 1 قازان كۇندەرى، سودان كەيىنگى تۋرلار 21-22 قازان، 25-26 قاراشا، 9-10 جەلتوقسان، 2026 جىلعى 20-21 قاڭتار، 28 قاڭتار كۇندەرى بولادى.  وسى ماتچتاردان سوڭ كەزەك پلەي-وفف ويىندارىنا كەلەدى.

الماتىنىڭ «قايرات» چەمپيوندار ليگاسىنىڭ نەگىزگى كەزەڭىنە شىققانى ءۇشىن 18،62 ملن ەۋرو (شامامەن 11،5 ملرد تەڭگە) كولەمىندە اقشالاي تابىس تاپتى.

ەسكە سالساق، «قايرات» تاريحتا العاش رەت چەمپيوندار ليگاسىنىڭ نەگىزگى كەزەڭىندە وينايدى. ول چەمپيوندار ليگاسىنىڭ ىرىكتەۋ كەزەڭىندە سلوۆەنيانىڭ «وليمپيا» جاساعىنان (ەكى ماتچ قورىتىندىسى بويىنشا 3:1) ايلاسىن اسىردى. فينليانديانىڭ «كۋپس» كلۋبىمەن ويىندا كامبەك جاسادى (3:2). سلوۆاكيانىڭ «سلوۆانى» كومانداسىن پەنالتي سەرياسىندا (1:1، پەنالتيدە 4:3) جەڭسە، سودان كەيىن شوتلانديانىڭ «سەلتيك» ۇجىمىن دا پەنالتيدە 3:2 ەسەبىمەن جەڭدى.

 

داستان كەنجالين،

استانا