«Қайрат» қарт құрлыққа қадам басты. Алғашқы қарсыласы – «Реал» (Мадрид)

Монакода футболдан УЕФА Чемпиондар лигасы 2025/2026 жылғы маусымдағы негізгі тобының жеребесі тартылды.

Осы іс-шарада Алматының «Қайрат» клубының қарсыластары анықталды.

Жеребе Чемпиондар лигасының негізгі тобына жолдама алған 36 клубтың арасында болды. Осы жаңартылған пішіндегі (формат) турнир екінші рет өткелі отыр. Бұдан кейін командалар біртұтас турнир кестесі аясында өзара ойнайтын болады.

Жалпы кезеңнің қорытындысы бойынша үздік 8 команда бірден 1/8 финалға шығады. Ал 9-дан 24-орынға дейінгі орындарды алған командалар плей-оффтағы матчтарын одан әрі жалғастыру үшін түйіспе ойындарда ойнайды. 25-тен 36-орынға дейін орын алған клубтар турнирден шығып қалады. Олар Еуропа лигасына да шыға алмайды.

Чемпиондар лигасының 2025/2026 жылдарғы маусымдағы финалы келесі жылы 30 мамырда Будапешт қаласының «Пушкаш Арена» стадионында болады.

Жеребенің қорытындысы бойынша «Қайрат» «Реал» Мадрид (Испания), «Интер» (Италия), «Арсенал» (Англия), «Брюгге» (Бельгия), «Спортинг» (Португалия), «Олимпиакос» (Грекия), «Пафос» (Кипр), «Копенгаген» (Дания) клубтарымен ойнайды.

Матчтардың толық күнтізбесі 30 тамызға дейін анықталады.

Алматы қаласында болатын ойындар:

«Реал» (әлемдегі ең қымбат клуб. Құны — 1,4 млрд еуро)

«Брюгге» (өткен маусымда Чемпиондар лигасының 1/8 финалына қатысқан. Құны — 173,40 млн еуро)

«Олимпиакос» (Еуропа лигасының плей-оффында ойнаған. Құны — 102,20 млн еуро)

«Пафос» (Чемпиондар лигасының дебютанты. Құны — 20,85 млн еуро)

Сырт алаңдағы ойындар:

«Интер» (былтырғы маусымның финалисі, 708,30 млн еуро)
«Арсенал» (әлемдегі екінші қымбат клуб — 1,37 млрд еуро)

«Спортинг» (Чемпиондар лигасының 1/16 финалына шыққан. Құны — 450,80 млн еуро)

«Копенгаген» (Конференция лигасының плей-оффында ойнаған. Құны — 75,15 млн еуро)

Матчтар 16 қыркүйек пен 28 қаңтар аралығында болады. Нақты күнтізбе алдағы уақытта хабарланады.

Турнирдің 1-туры матчтары 2025 жылғы 16-18 қыркүйек күндеріне жоспарланған. 2-тур 30 қыркүйек және 1 қазан күндері, содан кейінгі турлар 21-22 қазан, 25-26 қараша, 9-10 желтоқсан, 2026 жылғы 20-21 қаңтар, 28 қаңтар күндері болады.  Осы матчтардан соң кезек плей-офф ойындарына келеді.

Алматының «Қайрат» Чемпиондар лигасының негізгі кезеңіне шыққаны үшін 18,62 млн еуро (шамамен 11,5 млрд теңге) көлемінде ақшалай табыс тапты.

Еске салсақ, «Қайрат» тарихта алғаш рет Чемпиондар лигасының негізгі кезеңінде ойнайды. Ол Чемпиондар лигасының іріктеу кезеңінде Словенияның «Олимпия» жасағынан (екі матч қорытындысы бойынша 3:1) айласын асырды. Финляндияның «КуПС» клубымен ойында камбэк жасады (3:2). Словакияның «Слованы» командасын пенальти сериясында (1:1, пенальтиде 4:3) жеңсе, содан кейін Шотландияның «Селтик» ұжымын да пенальтиде 3:2 есебімен жеңді.

 

Дастан КЕНЖАЛИН,

АСТАНА