«Qaırat» qart qurlyqqa qadam basty. Alǵashqy qarsylasy – «Real» (Madrıd)

Monakoda fýtboldan ÝEFA Chempıondar lıgasy 2025/2026 jylǵy maýsymdaǵy negizgi tobynyń jerebesi tartyldy.

Osy is-sharada Almatynyń «Qaırat» klýbynyń qarsylastary anyqtaldy.

Jerebe Chempıondar lıgasynyń negizgi tobyna joldama alǵan 36 klýbtyń arasynda boldy. Osy jańartylǵan pishindegi (format) týrnır ekinshi ret ótkeli otyr. Budan keıin komandalar birtutas týrnır kestesi aıasynda ózara oınaıtyn bolady.

Jalpy kezeńniń qorytyndysy boıynsha úzdik 8 komanda birden 1/8 fınalǵa shyǵady. Al 9-dan 24-orynǵa deıingi oryndardy alǵan komandalar pleı-offtaǵy matchtaryn odan ári jalǵastyrý úshin túıispe oıyndarda oınaıdy. 25-ten 36-orynǵa deıin oryn alǵan klýbtar týrnırden shyǵyp qalady. Olar Eýropa lıgasyna da shyǵa almaıdy.

Chempıondar lıgasynyń 2025/2026 jyldarǵy maýsymdaǵy fınaly kelesi jyly 30 mamyrda Býdapesht qalasynyń «Pýshkash Arena» stadıonynda bolady.

Jerebeniń qorytyndysy boıynsha «Qaırat» «Real» Madrıd (Ispanııa), «Inter» (Italııa), «Arsenal» (Anglııa), «Brıýgge» (Belgııa), «Sportıng» (Portýgalııa), «Olımpıakos» (Grekııa), «Pafos» (Kıpr), «Kopengagen» (Danııa) klýbtarymen oınaıdy.

Matchtardyń tolyq kúntizbesi 30 tamyzǵa deıin anyqtalady.

Almaty qalasynda bolatyn oıyndar:

«Real» (álemdegi eń qymbat klýb. Quny — 1,4 mlrd eýro)

«Brıýgge» (ótken maýsymda Chempıondar lıgasynyń 1/8 fınalyna qatysqan. Quny — 173,40 mln eýro)

«Olımpıakos» (Eýropa lıgasynyń pleı-offynda oınaǵan. Quny — 102,20 mln eýro)

«Pafos» (Chempıondar lıgasynyń debıýtanty. Quny — 20,85 mln eýro)

Syrt alańdaǵy oıyndar:

«Inter» (byltyrǵy maýsymnyń fınalısi, 708,30 mln eýro)
«Arsenal» (álemdegi ekinshi qymbat klýb — 1,37 mlrd eýro)

«Sportıng» (Chempıondar lıgasynyń 1/16 fınalyna shyqqan. Quny — 450,80 mln eýro)

«Kopengagen» (Konferenııa lıgasynyń pleı-offynda oınaǵan. Quny — 75,15 mln eýro)

Matchtar 16 qyrkúıek pen 28 qańtar aralyǵynda bolady. Naqty kúntizbe aldaǵy ýaqytta habarlanady.

Týrnırdiń 1-týry matchtary 2025 jylǵy 16-18 qyrkúıek kúnderine josparlanǵan. 2-týr 30 qyrkúıek jáne 1 qazan kúnderi, sodan keıingi týrlar 21-22 qazan, 25-26 qarasha, 9-10 jeltoqsan, 2026 jylǵy 20-21 qańtar, 28 qańtar kúnderi bolady.  Osy matchtardan soń kezek pleı-off oıyndaryna keledi.

Almatynyń «Qaırat» Chempıondar lıgasynyń negizgi kezeńine shyqqany úshin 18,62 mln eýro (shamamen 11,5 mlrd teńge) kóleminde aqshalaı tabys tapty.

Eske salsaq, «Qaırat» tarıhta alǵash ret Chempıondar lıgasynyń negizgi kezeńinde oınaıdy. Ol Chempıondar lıgasynyń irikteý kezeńinde Slovenııanyń «Olımpııa» jasaǵynan (eki match qorytyndysy boıynsha 3:1) aılasyn asyrdy. Fınlıandııanyń «KýPS» klýbymen oıynda kambek jasady (3:2). Slovakııanyń «Slovany» komandasyn penaltı serııasynda (1:1, penaltıde 4:3) jeńse, sodan keıin Shotlandııanyń «Seltık» ujymyn da penaltıde 3:2 esebimen jeńdi.

 

Dastan KENJALIN,

ASTANA