قوشقار ءدىن-مۇحامەد – تاجىريبە مەن تاباندىلىقتىڭ ۇلگىسى

13–21 قىركۇيەك ارالىعىندا حورۆاتيانىڭ زاگرەب قالاسىندا گرەك-ريم كۇرەسىنەن ەرەسەكتەر اراسىندا وتكەن الەم چەمپيوناتىندا ەلىمىزدىڭ نامىسىن قورعاعان جامبىلدىق بالۋان قوشقار ءدىن-مۇحامەد 67 كەلى سالماق دارەجەسىندە كۇرەستى.

ول العاشقى اينالىمداردا سەنىمدى كۇرەسىپ، قارسىلاستارىنا لايىقتى قارسىلىق كورسەتتى. ارمەنيا وكىلى، تاجىريبەلى بالۋان سلاۆيك گالستيانعا ۇپاي سانىمەن ەسە جىبەرگەنىمەن، بۇل دودا ءدىن-مۇحامەد ءۇشىن ۇلكەن تاجىريبە مەكتەبى بولدى. ايتا كەتەرلىگى، بۇل ونىڭ ەرەسەكتەر اراسىنداعى ەكىنشى الەم چەمپيوناتى ەدى.

بۇعان دەيىن، 2022 جىلى قوشقار ءدىن-مۇحامەد قازاقستان چەمپيونى اتانىپ، سول جىلى سەربيانىڭ بەلگراد قالاسىندا وتكەن الەم چەمپيوناتىنا قاتىسقان. سول جىلى-اق ول جاستار اراسىندا بولگاريانىڭ سوفيا قالاسىندا وتكەن الەم چەمپيوناتىندا قولا جۇلدەگە يە بولدى.

2024 جىلى پاريج وليمپياداسىنا ليتسەنزيالىق تۋرنير رەتىندە وتكەن تۇركيانىڭ ستامبۋل قالاسىنداعى حالىقارالىق جارىستا ءۇشىنشى ورىن يەلەنىپ، ەلىمىزدىڭ گرەك-ريم كۇرەسى مەكتەبىنىڭ دەڭگەيىن تاعى ءبىر مارتە دالەلدەدى.

قوشقار ءدىن-مۇحامەد – قازاقستان رەسپۋبليكاسىنىڭ سپورت شەبەرى، 2002 جىلى جامبىل وبلىسى، تاراز قالاسىندا دۇنيەگە كەلگەن. قازىرگى تاڭدا ول ورتالىق ازيا يننوۆاتسيالىق ۋنيۆەرسيتەتىنىڭ (تسەنترالنو-ازياتسكي يننوۆاتسيوننىي ۋنيۆەرسيتەت) 2-كۋرس ستۋدەنتى.

جەكە جاتتىقتىرۋشىسى رينات يسمايلوۆ بالۋاندى بالا كەزىنەن تاربيەلەپ، كۇرەستىڭ قىر-سىرىنا باۋلىپ كەلەدى. ۇزاق جىلدىق ەڭبەكتىڭ ناتيجەسىندە ءدىن-مۇحامەد ەلىمىزدىڭ بەلدى سپورتشىلارىنىڭ قاتارىنا قوسىلىپ وتىر.

-الەم چەمپيوناتى مەن ءۇشىن ۇلكەن تاجىريبە بولدى. ءار بەلدەسۋ — جاڭا ساباق، جاڭا ماقساتقا جول اشادى. ەندىگى ارمانىم — 2028 جىلى اقش-تىڭ لوس-اندجەلەس قالاسىندا وتەتىن جازعى وليمپيادا ويىندارىندا ەل نامىسىن ابىرويمەن قورعاپ، التىن مەدال يەلەنۋ، — دەيدى قوشقار ءدىن-مۇحامەد.

بۇگىندە جاس سپورتشى تىڭ دايىندىق كەزەڭىن باستادى. ول تەك كۇرەس كىلەمىندە عانا ەمەس، ومىردە دە تاباندىلىق پەن ەڭبەكقورلىقتىڭ ۇلگىسىن كورسەتىپ كەلەدى. سپورتقا دەگەن شىنايى سۇيىسپەنشىلىگى مەن ماقساتقا دەگەن ادالدىعى ونىڭ الداعى جەتىستىكتەرىنىڭ كەپىلى بولماق.

نۇرشاح ساليموۆا،

تاراز