SportPress.kz قازاقستان سپورت جاڭالىقتارى
استانادا سپورت كۇنىنە وراي «سپورتشىلار كەڭەسى» قوعامدىق بىرلەستىگىنىڭ ۇيىمداستىرۋىمەن «قازاقستانداعى سپورت: رەفورمالاردان ناتيجەلەرگە دەيىن» اتتى كونفەرەنتسيا باستالدى، دەپ حابارلايدى Egemen.kz.
وسى جيىندا قارجىنى وڭتايلاندىرۋ ماسەلەسى تۋرالى ءسوز بولعاندا تۋريزم جانە سپورت ۆيتسە-ءمينيسترى سەرىك جاراسباەۆ قازاقستان كلۋبتارىندا وينايتىن شەتەلدىك سپورتشىلارعا جىل سايىن جۇمسالعان 3،5 ملرد تەڭگە مۇلدەم قىسقارتىلعانىن ايتتى.
باسقوسۋدا ول مەملەكەتتىك اقشاسى لەگيونەرلەرگە ەمەس، بالالار سپورتىنا جۇمسالاتىنىن اتاپ ءوتتى.
«بيىلدان باستاپ قاراجات بالالار مەن جاسوسپىرىمدەر جانە بۇقارالىق سپورتتى دامىتۋعا ارنالادى»، دەدى ءسوز سويلەۋشى.
كونفەرەنتسيادا رەفورمالاردىڭ قورىتىندىلارى مەن سالانى دامىتۋدىڭ الداعى جوسپارلارى تالقىلانىپ جاتىر. بيىل ەلىمىزدە بىرنەشە دۇرمەكتى دودانىڭ دا بولاتىنى، وعان قازىردەن باستاپ دايىندىقتىڭ باستالىپ كەتكەنى دە ايتىلدى.
«قازاندا استانادا سپورتتىق كۇرەس تۇرلەرىنەن الەم چەمپيوناتى، قاراشا ايىندا دۇنيەجۇزىلىك دوپينگكە قارسى اگەنتتىكتىڭ (WADA) اتقارۋشى كوميتەتىنىڭ وتىرىسى بولادى. كەلەسى جىلى بوكستان، دزيۋدودان، تاەكۆوندودان، ۇستەل تەننيسىنەن جانە كيبەرسپورتتان الەم چەمپيوناتتارى، شورت-ترەكتەن جاسوسپىرىمدەر اراسىنداعى الەم چەمپيوناتى وتكىزىلەدى. بۇدان بولەك، ەلىمىزدە ۋەفا-نىڭ 51-كونگرەسى وتەدى.
الداعى كۇنتىزبەدە — 2029 جىلى الماتىدا وتەتىن قىسقى ازيا ويىندارى جانە 2030 جىلى استانادا جەڭىل اتلەتيكادان جابىق عيماراتتاعى الەم چەمپيوناتى بار»، دەدى س. جاراسباەۆ.
كونفەرەنتسيا جۇمىسى ءۇش پلەنارلىق سەسسيا بويىنشا بولىپ جاتىر. سەسسيالار رەفورمالار جانە باسقارۋ تيىمدىلىگى، مەديتسينا، عىلىم جانە تسيفرلاندىرۋ، ۇرپاقتار ساباقتاستىعى جانە بۇقارالىق سپورت تاقىرىبىنا ارنالىپ وتىر.
قازىر مينيسترلىك «دەنەشىنىقتىرۋ جانە سپورتتى دامىتۋ تۋرالى» زاڭدى باسشىلىققا الىپ، جۇمىس ىستەۋدە. بۇل قۇجات پرەزيدەنت قاسىم-جومارت توقاەۆتىڭ ۇلتتىق قۇرىلتايدىڭ IV وتىرىسىندا سپورتتى دامىتۋ ماسەلەسىن ەرەكشە نازارعا العاننان كەيىن پارلامەنتتە ەكى وقىلىمدا قارالىپ، ماقۇلداعان ەدى.
اتالعان زاڭ سپورتتىڭ باسىم تۇرلەرىن ايقىنداۋعا، ولاردى قارجىلاندىرۋعا جانە دەنەشىنىقتىرۋ مەن سپورت سۋبەكتىلەرىمەن ءوزارا ءىس-قيمىلعا باعىتتالعان.
وسىدان كەيىن كوماندالىق سپورت تۇرلەرىنەن كلۋبتار بىرتە-بىرتە لەگيونەرلەردەن باس تارتا باستادى. مىسالى، قىزىلوردانىڭ «قايسار» جاساعى فۋتبولدان بىلتىرعى ماۋسىمدا العاشقىلاردىڭ ءبىرى بولىپ لەگيونەرسىز وينادى. سول سياقتى «اتىراۋ» فۋتبول كلۋبىنان دا ءبىراز لەگيونەر كەتتى.
