قازاقستان جۇزگىشتەرى رەكوردتى جاڭارتىپ جاتىر

استانادا العاش رەت سۋعا جۇزۋدەن ءوتىپ جاتقان World Aquatics – Astana 2026 الەم كۋبوگىنىڭ كەزەڭىندە التىن سپورتشىمىز فينالعا شىعىپ، ەكى سپورتشىمىز رەكوردتتى جاڭارتتى، دەپ حابارلايدى Egemen.kz.

ىرىكتەۋ باسەكەلەرىنىڭ قورىتىندىسى بويىنشا 50 مەترگە ەركىن ستيلدە جۇزۋدە گلەب كوۆالەنيا 21،31 سەكۋند ناتيجە كورسەتىپ، قازاقستان رەكوردىن 0،04 سەكۋندقا جاقسارتتى. ول كەشكى سەسسيادا وتەتىن فينالدىق جارىسقا قاتىسادى.

100 مەترگە باتتەرفلياي ادىسىمەن جۇزۋدە بىردەن ەكى وتانداسىمىز فينالعا شىقتى. ادىلبەك مۋسين قاشىقتىقتى 51،42 سەكۋندتا ءجۇزىپ وتسە، ماكسيم سكازوبتسوۆ 51،53 سەكۋند ناتيجە كورسەتىپ، ىرىكتەۋ كەزەڭىندە سەگىزىنشى ورىن الدى.

ايبات مىرزامۇراتوۆ 200 مەترگە براسس ادىسىمەن جۇزۋدە 2:07،15 سەكۋند ۋاقىت كورسەتىپ، ىرىكتەۋ كەزەڭىن بەسىنشى ورىنمەن اياقتادى. ەگور پوپوۆ 100 مەترگە كەشەندى جۇزۋدە 54،64 سەكۋند ناتيجە كورسەتىپ، فينالعا جولداما الدى. ال سوفيا سپودارەنكو 100 مەترگە باتتەرفلياي ادىسىمەن جۇزۋدە جۇلدەگە تالاسادى. ونىڭ ىرىكتەۋ كەزەڭىندەگى ناتيجەسى — 58،55 سەكۋند.

تاعى ءبىر ۇلتتىق رەكوردتى عالىمجان بالابەك جاڭارتتى. ول 400 مەترگە ەركىن ستيلدە جۇزۋدە 3:46،87 سەكۋند ناتيجە كورسەتىپ، ءبىر اپتا بۇرىن تاشكەنتتە وتكەن الەم كۋبوگى كەزەڭىندە جاساعان ءوز رەكوردىن جاڭارتتى.

ەگور پوپوۆ 100 مەتردى ەركىن ستيلدە 47.74 سەكۋندتا ءجۇزىپ ءوتىپ، ونىنشى ورىن الدى.

سوفيا سپودارەنكو 50 مەتردى باتتەرفلياي ادىسىمەن 26.27 سەكۋندتا باعىندىرىپ، توعىزىنشى ورىنعا جايعاستى. سوفيا ىرىكتەۋ كەزەڭىندە كورسەتكەن 25.97 سەكۋند ناتيجەسى ارقىلى قازاقستان رەكوردىن جاڭارتتى.

ايبات مىرزامۇراتوۆ 50 مەترگە براسس ادىسىمەن جۇزۋدە 26.50 سەكۋند ناتيجەسىن كورسەتىپ، سەگىزىنشى ورىنعا يە بولدى. ودان بولەك وتانداسىمىز ۇلتتىق رەكوردتى جاڭارتتى.

ايبات سونداي-اق 200 مەترگە كەشەندى ءجۇزۋ سايىسىندا 1:57.91 ۋاقىت كورسەتكىشىن تىركەپ، ونىنشى ساتىعا تابان تىرەدى.

بۇعان دەيىن سوفيا سپودارەنكونىڭ 50 مەترگە باتتەرفلياي ادىسىمەن جۇزۋدە مارە سىزىعىن 25،97 سەكۋندتا كەسىپ ءوتىپ، قازاقستان رەكوردىن جاڭارتتى.

بۇل جارىسقا الەمنىڭ تۇكپىر-تۇكپىرىنەن 40-قا جۋىق ەلدەن 300-دەن استام سپورتشى قاتىسادى. ولاردىڭ قاتارىندا وليمپيادا چەمپيوندارى مەن قازىرگى رەكورد يەلەرى دە بار.

قازاقستان قۇراماسىنىڭ نامىسىن 22 ساڭلاق قورعايدى. ەرلەر مەن ايەلدەر 17 سايىس ءتۇرى بويىنشا جۇلدەگە تالاسادى.

فينالدىق جارىستار بۇگىن، 16 قازاندا، استانا ۋاقىتىمەن ساعات 18:00-دە باستالادى.

داستان كەنجالين،

استانا