ماكسيم بوگاتىريوۆ پاراكانوەدەن الەم چەمپيونى اتاندى

ارگەنتينانىڭ گۋالەگۋايچۋ قالاسىندا بايداركا مەن كانوەدە ەسكەك ەسۋ مارافونىنان جانە پاراكانوەدەن ءوتىپ جاتقان الەم چەمپيوناتىندا ەرلەر اراسىندا پاراكانوەدەن VL1 ساناتىندا سىنعا تۇسكەن وتانداسىمىز ماكسيم بوگاتىريوۆ التىن جۇلدەنى جەڭىپ الدى، دەپ حابارلادى ەسكەك ەسۋ سپورتى تۇرلەرىنەن ۇلتتىق فەدەراتسيانىڭ ءباسپاسوز قىزمەتى.

ول جارىستىڭ العاشقى كۇنى قايىقپەن 8 شاقىرىم 200 مەتردى 58 مينۋت، 03.17 سەكۋندتا ءجۇزىپ ءوتتى.

ماكسيم بوگاتىريوۆ مارە سىزىعىن ەكىنشى كەسكەن برازيليالىق گابريەل نۋنەستەن 9 مينۋت، 11 سەكۋند وزىپ كەتتى.

ەندى الداعى كۇندەرى ۇلتتىق قۇرامانىڭ سپورتشىسى بايداركامەن جارىستا باق سىنايدى.

«الەمدىك دوداعا 38 ەلدەن 683 سپورتشى قاتىسىپ جاتىر. پاراكانوەدەن 14 باعدارلامادا جۇلدە ساراپقا سالىنادى»، — دەلىنگەن ەسكەك ەسۋ سپورتى تۇرلەرىنەن ۇلتتىق فەدەراتسيانىڭ ءباسپاسوز قىزمەتىنىڭ حابارلاماسىندا.

ماكسيم بوگاتىريوۆ بيىل جازدا تۇركىستان قالاسىندا وتكەن ليتسەنزيالىق ازيا چەمپيوناتىندا 2 كۇمىس مەدال جەڭىپ العان.

جاقىندا جاپونيانىڭ ايچي پرەفەكتۋراسى مەن ونىڭ ورتالىعى ناگويا قالاسىندا جالاۋى جەلبىرەگەن ازيا ويىندارىندا دا ەسكەكشىلەرىمىز جۇلدە الىپ، ەلىمىزدىڭ قورجىنىنا ۇلەس قوسقان ەدى.