2026 جىلدىڭ باسىنان بەرى سپورتشىلار حالىقارالىق جارىستاردا جاقسى ناتيجەگە جەتىپ كەلەدى. اتاپ ايتقاندا، وتانداستارىمىز الەم چەمپيوناتتارىندا 43، ازيا چەمپيوناتتارىندا 48 رەت جەڭىس تۇعىرىنىڭ ەڭ بيىك ساتىسىنا كوتەرىلدى، دەپ حابارلادى SportPress.kz.
تۋريزم جانە سپورت ءمينيسترى ەربول مىرزابوسىنوۆتىڭ ايتۋىنشا، جالپى ەل سپورتشىلارى 341 مەدال يەلەندى. ونىڭ 103-ءى – التىن، 106-سى – كۇمىس، 132-ءسى – قولا جۇلدە.
«بيىلعى ايتۋلى جەتىستىكتەردىڭ ءبىرى رەتىندە قازاقستاننىڭ ساپىمەن سەمسەرلەسۋدەن ەرلەر قۇراماسىنىڭ تاريحي جەڭىسىن اتاپ وتۋگە بولادى. ۇلتتىق قۇراما العاش رەت الەم چەمپيونى اتانىپ، الەمدىك رەيتينگتە ءبىرىنشى ورىنعا كوتەرىلدى. سونداي-اق ازيا چەمپيوناتى مەن ازيا ويىندارىندا دا توپ جاردى»، دەدى ول.
تەننيسشى ەلەنا رىباكينا دا ەل سپورتىنىڭ مەرەيىن ۇستەم ەتتى. ول 2026 جىلى الەمنىڭ ءبىرىنشى راكەتكاسى اتانىپ، «ۇلكەن دۋلىعا» ساناتىنداعى ەكى تۋرنيردە جەڭىسكە جەتتى.
جاپونيانىڭ ناگويا قالاسىندا وتكەن XX جازعى ازيا ويىندارىندا قازاقستاندىق سپورتشىلار 84 مەدال جەڭىپ الدى. ونىڭ 12-ءسى – التىن، 24-ءى – كۇمىس، 48-ءى – قولا. ناتيجەسىندە قازاقستان 46 ەلدىڭ اراسىندا جالپىكوماندالىق ەسەپتە 8-ورىنعا يە بولدى. ال V جازعى پارا ازيا ويىندارىندا ۇلتتىق قۇراما 50 مەدال يەلەندى. ونىڭ 12-ءسى – التىن، 16-سى – كۇمىس، 22-ءسى – قولا. وسىلايشا قازاقستان جالپىكوماندالىق ەسەپتە 9-ورىنعا تۇراقتادى.
بۇل جەتىستىكتەر سپورتشىلاردىڭ حالىقارالىق دەڭگەيدەگى باسەكەگە قابىلەتتىلىگىن جانە ەلىمىزدىڭ الەمدىك سپورتتاعى الەۋەتىن ايقىن كورسەتەدى.
SportPress.kz قازاقستان سپورت جاڭالىقتارى