Japonııanyń Aıchı prefektýrasy men onyń ortalyǵy Nagoıa qalasynda ótken HH jazǵy Azııa oıyndarynda Qazaqstan quramasy 84 medal jeńip aldy. Qorjynda 12 altyn, 24 kúmis, 48 qola bar, dep habarlady SportPress.kz.
Ulttyq qurama jalpykomandalyq esepte 8-orynǵa turaqtap, Hanchjoýdaǵy nátıjesin úsh satyǵa jaqsartty.
Boksta Qazaqstan 12 jyldan keıin Azıadanyń altyn júldesi qaıta jeńip aldy. Tórehan Sabyrhan men ulttyq qurama kapıtany Aıbek Oralbaı chempıon atandy.
Sapymen semserlesýden erler quramasy fınalda Koreıa Respýblıkasyn 43:42 esebimen jeńip, alǵash ret Azıadanyń altyn júldesine ıelendi.
Akademııalyq esýde Vladıslav Iakovlev pen Ivan Chernýhın erler arasyndaǵy qos eskekti qaıyq jarysynda top jaryp, elimizge osy sport túrinen alǵashqy Azıadanyń altyn medalin syılady.
Taekvondodan Temirlan Tileýles 58 kelige deıingi salmaqta chempıon atanyp, Qazaqstan tarıhyndaǵy osy sport túrinen alǵash ret Azıadanyń chempıony atandy.
Velosportta Alekseı Lýenko Azıadadaǵy altyn medal sanyn altyǵa jetkizdi. Rınata Sultanova áıelder arasyndaǵy velosporttan Qazaqstanǵa alǵashqy altyn júldeni ákeldi.
Karateden Jolaman Bıǵabyl men Sofıa Berýleva chempıon atandy. Ol úshin bul Azııa oıyndaryndaǵy ekinshi altyn medal.
Aralas jekpe-jek Azıada baǵdarlamasyna alǵash ret engizilip, Qazaqstan sportshylary birden eki altyn jáne bir qola medal jeńip aldy.
Dzıýdodan ulttyq qurama jekeleı synda alǵash ret tórt fınalǵa shyqty. Eldos Smetov, Ábıba Ábýjaqynova, Ádilet Almat pen Ajar Ashat kúmis júldege ıe boldy. Aralas komandalyq synda da Qazaqstan kúmis medal jeńip aldy.
Sporttyq gımnastıkada Mılad Karımı erkin jattyǵýda kúmis júldege ıe bolyp, Qazaqstanǵa osy baǵdarlamada 32 jyldan keıin Azıada medalin ákeldi.
Erkin kúres sheberleri úsh qola medalge ıe boldy. Áıelder quramasy bir kúmis jáne eki qola júldeni ıelendi.
Osylaısha birqatar sport túrinen ulttyq qurama el tarıhyndaǵy jańa belesterdi baǵyndyrdy.
SportPress.kz Qazaqstan sport jańalyqtary