قازاق كۇرەسىنىڭ قارا نارى

جالپى ومىردە جۇرگەن جەرىندە جان-جاعىنا جىلۋ شاشىپ، ادامدارعا جاقسىلىق جاساپ جۇرەتىن ادامدار بولادى. سونداي اسىل ازاماتتىڭ ءبىرى عانا ەمەس، بىرەگەيى سەرىك ادامبولسىن ۇلى تۇكەەۆ اعام اسقارالى 62 جاسقا تولىپ جاتىر.

الايدا، ەل ءۇشىن تۋىلعان ەسىل ەر تۋعان كۇنىڭ وتباسى، اعايىن-تۋما، دوستارىنىڭ ورتاسىندا ەمەس تار قاپاستا قارسى الۋدا. ناقتى ايتار بولساق، جازىقسىز جابىلعان جالانىڭ قۇربانى بولىپ وتىر.

قازاق كۇرەسىن ورگە سۇيرەپ جۇرگەن قوس بىردەي ازامات سەرىك تۇكەەۆ پەن يسلام ابىشەۆكە جالا جابىلعاندا بۇكىل ەل بولىپ قايعىردىق. بيۋدجەت قارجىسىن ۇنەمدەپ، تريلليون تەڭگەنى ەل قازىناسىنا قايتارتىپ بەرگەن يسلام الىمقان ۇلىنىڭ ۇزەڭگىلەس سەرىگى رەتىندە ۇلتتىق سپورتتى ۇلىقتاپ جۇرگەن ازاماتتاردى قورعاۋ تۋرالى ەلىمىزدىڭ بەلگىلى تۇلعالارى باستاعان سپورت جاناشىرلارى پرەزيدەنتىمىز قاسىم-جومارت توقاەۆقا ۇندەۋ حات جازىپ، اراشا ءتۇسۋىن سۇرادى. الايدا، رەكوردتىق دەڭگەيدە قول قويىلعان بۇل حاتقا مەملەكەت باسشىسىنىڭ ءالى كۇنگە ءۇنسىز وتىرۋى اقىلعا سىيمايدى. ءبىزدىڭ ويىمىزشا حات پرەزيدەنتتىڭ قولىنا جەتكەن جوق نەمەسە بىرەۋلەر ادەيى جەتكىزبەي وتىر. ايتپەسە، قاسىم-جومارت كەمەل ۇلى سەكىلدى سپورت جاناشىرىنىڭ يسلام مەن سەرىك اعامىزدى قولداماۋى، قورعاماۋى مۇمكىن ەمەس.

بۇگىن 62 جاسقا تولىپ وتىرعان سەرىك اعاممەن تانىستىعىم ول كىسى ق.مۇڭايتپاسوۆ اتىنداعى سپورت-ينتەرناتتى باسقارىپ تۇرعان كەزدە باستالىپ ەدى. سودان بەرى اعالى-ءىنىلى رەتىندە ارالاسىپ كەلەمىز. سەرىك اعامىز باسقارعان تۇستا سپورت-ينتەرناتتىڭ اتاعى دۇرىلدەپ تۇردى. قازىر دە جامان ەمەس. بىراق، بۇگىنگى جەڭىستى جول كەزىندە سەرىك ادام ۇلى سالىپ كەتكەن سارا جولدىڭ جالعاسى دەپ بىلەمىز.

ال ەندى قازاق كۇرەسى دەسە سەرىك تۇكەەۆتىڭ ەسىمى بىرگە اتالادى. ويتكەنى، سەرىك اعامىز 2004 جىلى دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى بولىپ سايلانعاننان بەرى ۇلتتىق كۇرەسىمىزدى الەمدىك دەڭگەيگە جەتكىزۋ ءۇشىن ايانباي تەر توكتى. نەگىزى، سوناۋ توقسانىنشى جىلداردىن ورتاسىنان باستاپ ۇلتتىق كۇرەستى ۇلىقتاۋعا كىرىسكەن سەرىك اعام، باۋىرجان جانالين، ديحانباي بيتكوزوۆ، مارات جاقىت سەكىلدى ارىپتەستەرىمەن بىرگە قازاق كۇرەسىنىڭ بۇگىنگى قولدانىستا جۇرگەن ەرەجەسىن جاساپ شىعارعانىڭ، شتاتتاعى ۇلتتىق كوماندالار ديرەكتسياسىن باسقارىپ تۇرعان كەزدە بارلىق وبلىس پەن اۋداندارداعى سپورت مەكتەپتەرىندە قازاق كۇرەسى بولىمدەرىن اشقىزعانىڭ ۇمىتۋعا بولمايدى. بۇدان بولەك يسلام الماقان ۇلى ەكەۋى تىزە قوسا ءجۇرىپ قازاق كۇرەسىنەن 8 الەم، 11 ازيا، 3 ەۋروپا چەمپيوناتىن، 3 الەم كۋبوگىن، يران مەن برازيليادا كادەتتەر مەن جاسوسپىرىمدەر اراسىندا الەم چەمپيوناتتارى مەن وار-دا 2 رەت افريكا بىرىنشىلىگىن، برازيليادا وڭتۇستىك امەريكا چەمپيوناتىن وتكىزسە، اشحابادتا وتكەن جابىق كەشەندەگى ازيا ويىندارىنا قازاق كۇرەسىن كىرگىزدى. ەڭ باستىسى قازاق كۇرەسىنەن الەمنىڭ 40-تان استام ەلىندە فەدەراتسيا اشىپ، ءتول كۇرەسىمىزدى بۇرىنعى فيلا، قازىرگى UWW-گە مۇشە قىلدى. مىسال رەتىندە ايتار بولساق الەمنىڭ 100 ەلىندە فەدەراتسيا اشتىق دەپ كۇپىنەتىن وزبەكتەردىڭ كۋراشى اتالعان ۇيىمعا ءالى كىرە الماي ءجۇر.

مۇنىڭ ءبارى ايتۋعا وڭاي بولعانمەن، قاجىر مەن ەسەپسىز توگىلگەن ماڭداي تەرمەن كەلگەن تىنىمسىز ەڭبەك. ۇلتتىق سپورتقا دەگەن سۇيىسپەنشىلىك پەن توگىلگەن ماڭداي تەردىڭ جەمىسىن ەندى كورەتىن كەزدە اسىل ازاماتتار جازىقسىز جالانىڭ قۇربانى بولدى. ءبارىمىزدى وسى جاعى قىنجىلتادى. جۇرەگىمىز اۋىرادى. بىراق، مۇنداي ءبىر تۋار ازاماتتار اقتالىپ شىعار، قايتادان ەل ءۇشىن ايانباي تەر توگىپ، وزدەرى جاقسى كورەتىن قازاق كۇرەسىن بۇدان دا بيىك بەلەستەرگە كوتەرەر دەگەن ءۇمىتىمىز بار. وسى ءۇمىتىمىز الداماسا ەكەن!

سەرىك اعا! بۇگىنگى 62 جاسىڭىز قۇتتى بولسىن! ەر جىگىتتىڭ باسىنا، نەلەر كەلىپ كەتپەگەن دەمەكشى، بۇل دا ءبىر سىناق شىعار. ءسىز مىقتىسىز اعا! بۇل سىننان مۇدىرمەي وتەرىڭىزگە سەنىمدىمىز. ارتىڭىزدا ءسىزدىڭ تىلەۋىڭىزدى تىلەپ وتىرعان ەلىڭىز بار، ءسىزدىڭ قامقورلىعىڭىزدى كورگەن سپورتشىلار قاۋىمى بار، ءبىز بارمىز! «اققا قۇداي جاق» دەيدى حالقىمىز. ءسىزدىڭ اق ەكەنىڭىزگە ءبىز سەنەمىز. امان-ەسەن ورتامىزعا ورالىپ، ەشتەن كەش جاقسى دەپ تۋعان كۇنىڭىزدى بىرگە تويلايىق. اللانىڭ ءوزى جار بولسىن سىزگە اعا!

مۇساعالي تاسقاليەۆ، «پرەزيدەنت جانە سپورت»، «سپورت جۇلدىزدارى» جۋرنالدارىنىڭ باس رەداكتورى، «قازاق كۇرەسىن دامىتۋعا قوسقان ۇلەسى ءۇشىن» مەدالىنىڭ يەگەرى.

 اقتوبە قالاسى