قۇرىش بىلەكتى قاھارمان

ەرەجەسىز جەكپە-جەكتەن ەلىمىزدە ءوز سالماعى بويىنشا العاش چەمپيون اتانعان بىلەكتى بالۋان، جۇرەكتى جىگىت بولاتحان سۇلەيمەنوۆ تۋرالى تولعام.

قازاق دالاسىندا سوناۋ ساق داۋىرىنەن بەرى اتا-بابامىز جەكپە-جەك ونەرىنە بەيىم بولعانىن تاسقا جازىلعان جازۋ-سىزبا سۋرەتتەردەن بىلەمىز. سوندىقتان دا وسى قۇس ۇشسا قاناتى، ات شاپسا اياعى تالاتىن، ۇلان-عايىر قۇتتى مەكەنىمىزدى سىرتقى جاۋلاردان قورعاۋدا، قازاقتىڭ ءاربىر بالاسى سوعىس پەن  جەكپە-جەك ونەرىنە شىڭدالىپ بويىنا ءسىڭىرىپ وسكەن. ەشقانداي ەلگە كەۋدەسىن باستىرماعان قارسى كەلگەن جاۋمەن جۇدىرىقتاسۋ، جەكپە-جەك شايقاسىندا ەسە جىبەرمەگەن ۇلى حالىقتىڭ ۇرپاعىمىز. قازاقتاي كوشپەندى حالىق ءۇشىن جەكپە-جەك سپورتىنىڭ شوقتىعى بيىك بولاتىنى سوندىقتان بولار.

قازاق جەرىندە سپورتتىڭ كوپتەگەن تۇرلەرىنەن ءدۇبىرلى جارىستار ءوتىپ كەلدى. بىراق ەرەجەسىز جەكپە-جەكتەن ەشقانداي بايگە تىگىلىپ، باتىرلار بىلەك ءتۇرىپ شىققان ەمەس. اسىرەسە، ەرەجەسىز جەكپە-جەك ونەرىنەن بايراقتى جارىستاردىڭ وتكىزىلۋىن قازاقتىڭ ىشىندەگى بويىنا كۇشى سىيماعان، توپجارار تارلانبوز جاستارى كوپتەن كۇتىپ جۇرگەن ەدى. مىنە، وسىنداي بايراقتى جارىستى ۇيىمداستىرۋدىڭ رەتىن الاشتىڭ ارداقتى ۇلى، الەم چەمپيوناتىنىڭ كۇمىس جۇلدەگەرى سەرىك بايمۇرزين مىرزا قولعا الىپ، 1996 جىلى تۇڭعىش رەت الماتىداعى ورتالىق تسيركتە ءدۇبىرلى جارىس وتكىزدى. ەرەجەسىز جەكپە-جەك تۇرىنەن وتكەن جويقىن جارىسقا قازاقستاننىڭ ءار ايماعىنان تاۋسوعار جالىندى سپورتشىلار اعىلىپ كەلىپ قاتىسقان ەدى. مەن بۇل جارىستى ءوز كوزىممەن كورىپ كوڭىلگە تۇيگەن ادامنىڭ ءبىرى ەدىم. سوندىقتان دا مەن ءۇشىن سول ءدۇبىرلى جارىستىڭ باسى-قاسىندا بولىپ، قالاي وتكەنى تۋرالى ەمىن-ەركىن قالام تارتۋعا بولاتىن ەدى. ەندى، وسى سايىسقا مەنىڭ جاقىن دوسىم بولاتحان سۇلەيمەنوۆتىڭ قانداي دايىندىقپەن بارىپ، ءوز سالماعىندا باس جۇلدەنى جەڭىپ العانى تۋرالى كەڭىنەن اڭگىمەلەپ بەرگىم كەلەدى.

ول كەزدە مەن الماتىداعى جاندوسوۆ پەن رادوستوۆەتس كوشەلەرىنىڭ قيىلىسىنداعى  قازاقستان ۇلتتىق تەلەارناسىندا جۇمىس ىستەيتىن قىزمەتكەرلەر مەن جۋرناليست، ديكتور، وپەراتورلار تۇرىپ جاتقان جاتاقحانا ىسپەتتەس ءۇيدىڭ ءبىر بولمەسىن الىپ تۇرىپ جاتقانمىن. ەسىگىمىزدىڭ الدىنا شىعا بەرگەندە كىشىگىرىم قارا بازار بولاتىن. سول بازاردان كەرەك جاراعىمىزدى الىپ تۇراتىنبىز. بىردە سول بازاردى ارالاپ ەت الايىن دەپ جۇرگەنمىن. ول جەردە ەت ءبىر-اق جەردە ساتىلاتىن. سول ەت ساتىلاتىن ورىندى ارى-بەرى ءوتىپ جۇرگەندە بالۋانعا ۇقسايتىن قازاقتىڭ قاراپايىم جىگىتىن كورەتىنمىن. ول جىگىت  ءاردايىم ك ۇلىمسىرەپ قاسىنداعى دوسى ەكەۋى ەت ساتىپ تۇراتىن. مەن سول ءساتى ءتۇسىپ الگى جىگىتتەن قويدىڭ ەتىن ءبولدىرىپ كەستىرىپ الىپ جاتىپ، اڭىمەلەسىم كەتتىم. قال-جاي سۇراسىپ، تانىستىق. ەسىمى بولات ەكەن. سەمەي ءوڭىرى ماقانشى اۋدانىنداعى قارابۇلاق اۋىلىنىڭ تۋماسى بولىپ شىقتى. وسى بازاردىڭ الدىندا كولدەنەڭ تۇرعان قوس ءۇيدىڭ بىرىندە تۇرادى ەكەن. نەگىزى، ول جىگىتتى سول بازاردان ءجيى كورەتىنمىن. سونىمەن، تانىسىپ جاي-كۇي سۇراسىپ، كەيىننەن ارامىزعا جىك تۇسپەگەن جاقىن دوستارعا اينالدىق. سول كەزدەن باستاپ، ءبىز جاقىن دوستاي ارالاس-قۇرالاس بولىپ كەتتىك. بىردە بولات تسيركتە وتكەلى جاتقان جەكپە-جەك تۋرالى ايتىپ، سوعان قاتىساتىندىعىن ايتتى. مەن ارينە، قولداي وتىرىپ، «قاتىس باۋىرىم، سەن اللا بۇيىرتسا، جۇلدەنىڭ جاقسىسىن الىپ قالارسىڭ، قاجەت بولسا بىرىگىپ دايىندالايىق، وسىندايدا جانىڭدا جۇرەتىن سەرىك قاجەت قوي ساعان»،  –دەگەن پىكىرىمدى  ايتتىم.

حوش، سونىمەن بولاتتىڭ قاسىنا ەرىپ بىرگە جۇگىرىپ، بىرگە جاتتىعىپ مەن دە ءبىر دودالى سايىسقا ءتۇسىپ باعىن سىنايتىن جانداي دوسىما سەرىك بولىپ بىرگە جۇردىك. بولات ەكەۋمىز جاندوسوۆ كوشەسىنىڭ باسىنا تۇرىپ اياعىمىزعا قۇم بايلاپ الىپ جۇگىرەتىن بولدىق. بولاتتىڭ ناعىز بىلەكتى دە جۇرەكتى بالۋان ءارى باتىر ەكەنىن سول كەزدە بىلگەن ەدىم. مەن اياعىم كوتەرەتىندەي ولشەممەن ازعانى قۇم سالىپ بايلاپ شىقسام، بولات ەكى اياعىن قامپيتىپ قۇمدى تولتىرا بايلاپ الىپ جۇگىرەتىن. شارشاۋدى سوندا بىلمەيدى. ال، مەن بولسام وكپەم ءوشىپ، تىنىسىم تارىلىپ جارتى جولدا قالسام، بولات بولسا، سوناۋ تولە بي كوشەسىنە دەيىن اتشا شاۋىپ بارىپ قايتاتىن. سوندا اياقتاعى سالماقتى بىردە اۋىر سەزىنبەيتىن. ناعىز  ءدۇلدىل جۇيرىك دەرسىڭ. سونىمەن، جارىس وتەتىن كۇندە كەلىپ جەتتى-اۋ ايتەۋىر. تسيركتىڭ ءىشى جارىستى تاماشالاۋعا كەلگەن ادامنان ينە شانشار جەر جوق. الگى الپامىس تۋرالى باتىرلار جىرىندا: «جۇدىرىقپەن ءبىر ۇرىپ، قىرىق كەر بولات ساندىقتى، سايماندارىن سايلانىپ التىنان كەمەر بايلانىپ، ءابجىلانداي تولعانىپ، قىزىل نايزا قولعا الىپ، شۇبارعا قارعىپ مىنەدى. قۇدايدان مەدەت تىلەدى، قارعىپ ءمىنىپ جاس باتىر اشۋى كەرنەپ جونەدى»، دەگەن سوزدەر بار ەمەس پە. بولات تا ءدال الپامىستاي سايلانىپ، تاس-ءتۇيىن دايىندىقپەن العاش رەت قاتىسقالى وتىرعان جاۋاپتى جارىسىنا بارعان ەدى. نەگىزى بولاتتىڭ كەيبىر كۇندەرى «الماس سۋى» دەگەن جەكپە-جەك كلۋبىندا جاتتىقتىراتىن سەرگەي پانيرينگە دە بارىپ جاتتىعىپ جۇرەتىن. سەرگەي دە بار بىلگەنىن ۇيرەتىپ، بولاتتىڭ بوكس جاعىنان قولىن دۇرىستاپ بەرۋدە ەڭبەگى بار دەپ ايتار ەدىم.

ءالى ەسىمدە، سول كۇنى مەن جارىسقا بەينەكامەرانى الىپ بارعان ەدىم. كىم ءبىلسىن، بۇگىنگى جارىستا بولات توپجارىپ جاتسا، ەرتەڭگى كۇنى تاريح بولىپ قالاتىن شىعار دەگەن ويدا قىلاڭ بەرگەنى اقيقات. راسىمەن اللانىڭ قالاۋىمەن سولاي بولىپ شىقتى عوي. حوش، سونىمەن ءبىز تسيرككە بارعانىمىزدا، قاتىسۋشىلاردىڭ  تولىپ جۇرگەنىن كوردىك. دەنەلەرىندە ارتىق ەت جوق بۇلشىق ەتى بۇلتىلداعىن ءار جاقتان جينالعان قاتىسۋشىلاردى كورىپ، ءبىراز جۇرەكسىنىپ قالعانىم راس. دەگەنىمدە بولاتتىڭ سول باياعى سابىرلىعى مەن قاراپايىمدىلىعىنا قاراپ، ول ويىمنان تەز قايتىپ، دوسىمنىڭ جىگەرىن جاناپ، قايراتىن قايراقتاي قايراي تۇسۋگە تىرىستىم. بولاتتىڭ ءوز-وزىنە دەگەن سەنىمدىلىگى مەنى جىگەرلەندىرىپ، ارقالاندىرا تۇسكەندەي بولدى. نەگىزى، تۇڭعىش رەت ءوتىپ وتىرعان ەرەجەسىز جەكپە-جەك سايىسى 70 كگ-نان جوعارى سالماق دارەجەلەرى اراسىندا وتكەن ەدى. ەرەجەسىز جەكپە-جەك جارىسىن العاش رەت ۇيىمداستىرىپ وتىرعان سەرىك بايمۇرزىن بىزگە جاقىنداپ كەلىپ، «باۋىرىم ەشنارسەدەن قورىقپا، تەك العا!»، – دەپ ءبىزدى قاناتتاندىرىپ كەتتى. سودان كەيىن، بويىمىزداعى تولقىنىس سەيىلىپ، ەركىنسىپ كەتتىك دەسەك بولادى. مەن بەينەكامەرانى قولىما الىپ، بولاتتىڭ ءاربىر قيمىل-قوزعالىسىن تۇسىرۋمەن الەك بولىپ ءجۇرمىن. وسى جەردە ايتا كەتەر ءبىر وكىنىشتى جاي، سول تۇڭعىش رەت ەلىمىزدە جالاۋىن كوتەرگەن ەرەجەسىز جەكپە-جەك سايىن ءتۇسىرىپ العان تاريحي بەينە تاسپانى ءالى كۇنگە دەيىن تابا الماي كەلەمىز. نەگىزى تولىقتاي تۇسىرىلگەن نۇسقاسىن دودالى سىننان شىققاننان كەيىن، بولات دوسىما تارتۋ ەتكەن ەدىم. ال، بولات بولسا، ءوزىنىڭ تۋعان اۋىلىنان سۇراعان تۋىستارىنا كاسسەتانى بەرىپ جىبەرىپتى. ولار قولدان-قولعا تاراتىپ جىبەرسە كەرەك. سودان سوڭىن تابا الماي قالىپتى. اللا ءناسىپ ەتىپ، سول كاسسەتا تابىلىپ جاتسا، ۇلكەن ءبىر تاريحي وقيعامەن اراعا كوپ جىلدار سالىپ بارىپ، سپورت جانكۇيرەلەرى  كورىپ ءبىر تاماشالار دەگەن ويدامىن. سونىمەن، ارىستانداي ايباتتى، جولبارىستاي قايراتتى جەكپە-جەك ونەرىنىڭ شەبەرلەرى اراسىنداعى سايىس باستالىپ تا كەتتى. مەن ءبىر قولىما ورامالدى، ءبىر قولىما بەينە كامەرانى الىپ بولاتتىڭ جەكپە-جەكتەرىنىڭ باستالۋىن كۇتىپ تۇردىم. مىنە، كوپتەن كۇتكەن العاشقى جەكپە-جەك تە باستالىپ كەتتى. مەن تسيركتىڭ  ىشىندەگى الگى شار ءتارىزدى دوعالىقتىڭ سىرتىن اينالىپ، وزىمشە بولاتقا كەڭەسىمدى ايتىپ، الەك بولىپ جۇگىرىپ ءجۇرمىن. بولات ءوزىنىڭ جۇرەكتى دە بىلەكتى حاس باتىر بالۋان ەكەنىن وسى جارىستا اتويلاپ كورسەتتى دەسە بولادى. العاشقى قارسىلاسىن سوققىنىڭ استىنا الىپ ۇرىپ جىعىپ، كەلەسى كەزەڭگە ءوتتى. ءسويتىپ، ءبىرىنشى جەكپە-جەگىن جەڭىسپەن اياقتاعان بولاتتى بولمەگە الىپ ورامالمەن جەلپى تەرىن باسىپ، كەلەسى كەزدەسۋگە دايىنداي باستادىم. كەلەسى جەكپە-جەك بولات ءۇشىن وتە اۋىر بولعان ەدى. يچكەريادان كەلگەن شەشەن تالاي ءدۇبىرلى سىنداردا اسىعا وڭىنان ءتۇسىپ جۇرگەن وسى ەرەجەسىز جەكپە-جەك جارىسىنا كەلگەن سپورتشىلاردىڭ ىشىندەگى ەڭ قاۋىپتىسى ەدى. كوڭىلىمىزدە ءبىر قۋانىش، ءبىر قاۋىپ تۇرعان ەدى. ويتكەنى، سوڭعى فينالعا شىعۋ ءۇشىن قالايدا شەشەن جىگىتىن جەڭۋىمىز كەرەك  بولاتىن. يچكەريالىق بۇل شەشەن جىگىتى بەينەبىر ءابجىلانداي ايلاكەر، جەمتىگىن ىزدەپ جۇتىنعان دالانىڭ كوكجال بورىسىندەي، دەنەسىندە ارتىق ەتى جوق ەدى. ويپىر-اي، نە بولار ەكەن دەگەن وي مەنى قاتتى مازالاعانى انىق. بىراق، بويىمداعى سەزىكتى بولاتقا بىلدىرمەۋگە تىرىستىم. بەينەبىر ءوزىم توبەلەسەتىن سياقتى كۇيدە جۇرگەنىم ءسوزسىز. بولاتقا قاراسام، سول باياعى جەر قوزعالسا قوزعالمايتىن سالماقتىلىق، سابىرلىلىق پەن قالايدا جەڭىسكە جەتەمىن دەگەن سەنىمدىلىكتى كوزىنەن بايقادىم. وزدەرى جارىس الاڭىنا شىققاندا الگى برازيليالىق گرەيسيلەر اۋلەتى سياقتى اعايىندىلاردىڭ بارلىعى ءبىرىنىڭ جەلكەسىنە ءبىرى قوس قولدارىن قويىپ شىققاندا كوپكە ۇرەي تۋعىزعانداي كورىندى. مەندە قولىمنان كەلگەنشە بولاتقا رۋحاني جاعىنان دا قولداۋ كورسەتۋگە تىرىسىپ قويامىن.

–ولاردىڭ مىنا شىعىپ كەلە جاتقان جاي عانا سپەكتاكل، سەن ونىڭ قازىر تالقانىن شىعارىپ، سۇمىرەيتىپ سىن الاڭىنان شىعارۋعا ءماجبۇر ەتەسىڭ، – دەپ، شىمىر سوزدەرمەن شىڭداپ-اق جاتىرمىن.

ءسويتىپ، ءبىر اللاعا سىيىنىپ كەلەسى سوڭعى كەزدەسۋگە بەت الدىق. سونىمەن فينالدىق جەكپە-جەك باستالىپ كەتتى. بۇل جەكپە-جەكتە تۇنشىقتىرۋعا، تىرەسۋگە، اياق-قولدى تارتىپ بۋىندىرۋعا، قىسقاسى بارلىق ءادىستى قولدانۋعا رۇقسات. تەك رۇقسات ەتىلمەيتىنى، ەكى بۇتتىڭ ورتاسىنان تەبۋگە، كوزىن ساۋساقپەن شۇقۋعا جول جوق. باسىن بايگەگە تىگىپ، وسىنداي جويقىن جارىسقا قاتىسۋ اركىمنىڭ قولىنان كەلە بەرمەس انىق. ءتىپتى، ءولىپ تە كەتۋى ابدەن مۇمكىن.  بۇل ايقاس ناعىز قان مايدان بولدى دەسەم ارتىق ەمەس. مەن جەكپە-جەك الاڭىنداعى شەڭبەردى شىر اينالىپ ايعايدى سالىپ بولاتتى قايراۋعا تىرىسامىن. بولات ماعان اندا-ساندا كوزىن ءبىر سالىپ قويىپ، ءوزىنىڭ ۇتىمدى ءساتىن كۇتىپ الىسىپ ءجۇر. بولاتتى  جامباسىنا تۇسىرە الماعانىنا شەشەن جىگىتى دولدانىپ، ءبىر جاعىنان بولاتتىڭ ەك-ءۇش ءزىلباتپان سوققىسى ءدوپ تيگەن سوڭ اشۋلانا باستادى. وسى ساتتە كۇش اتاسى قاجىمۇقاننىڭ جاپون جەكپە-جەك ونەرىنىڭ شەبەرى ساراكيككي جيندوفۋمەن كەزدەسۋى ەسىمى ءتۇستى. سوندا قاجەكەڭنىڭ قۇلاعىن قىرىشىپ تىستەپ العان جاپوندى قوس قولداپ تىك كوتەرىپ الىپ، جەرگە گۇرس ەتكىزىپ اتىپ ۇرادى ەمەس پە. سوندا ەسىنەن تانىعان جاپوندى جەرلەستەرى  دەرەۋ زەمبىلگە سالىپ الا جونەلەدى. قاجىمۇقاندى تاس-تالقان ەتەم دەپ شىققان ساراكيكيكي وسىلايشا جەر بولىپ جەڭىلەدى. قاجىمۇقان اتامىز سول جەكپە-جەكتەن قۇلاعىنان ايىرىلسا دا تۋعان ەلىنە داڭقپەن ورالاعان ەكەن. سول سەكىلدى قازاقتىڭ بولاتتاي قايسار ۇلىن مەنسىنبەي ك ۇلىپ شىققان شەشەن جىگىتى وسىنداي قايتپاس قايسارلىقتى، اسقان شەبەرلىكتى كۇتپەگەن بولسا كەرەك. قانشا ساق ءجۇرىپ ۇرىس سالعانىمەن. بولاتتىڭ قارۋلى قولىنا ىلىنگەندە بارىپ ءاپ-ساتتە نە بولعانىن بىلمەي قالدى. بولات قاجىمۇقان اتامىزدىڭ ادىسىنە سالعانداي كورىنىپ، قارسىلاسىن جەرگە قازاقشا كۇرەس تاسىلىندەگىدەي جامباسقا سالىپ اتىپ ۇرىپ، ۇستىنە شىعىپ الدى. نەگىزى، بولات تۋعان اۋىلىندا جۇرگەندە ەل ىشىندە، قازاق كۇرەسىنەن وتەتىن بايراقتى جارىستار مەن توي-تومالاقتاردى  الدىنا جان سالاعان ەكەن. بولاتتىڭ وڭ جامباسىنا ءتۇسىپ قالسا بولعانى قارسىلاسىن اتىپ ۇرىپ جۇرە بەرەدى ەكەن. سوندىقتان دا بولاتتىڭ جەڭىسكە جەتۋىنە ءبىر جاعىنان قازاق كۇرەسىنىڭ زور سەپتىگى ءتيدى مە دەپ ويلايمىن. مەن دە وسى ساتتە: «قىلقىندىر، بۋىندىر بولات!»،  – دەپ، ايعايدى سالىپ قويامىن. سودان سوڭ، وسى ادىسىنەن تاپجىلماي ءبىراز ۇستاپ تۇرىپ بارىپ، قولايلى سەكۋندتا ەكى اياعىن مويىن  تۇستارىنان وراپ الىپ قىلقىندىرا باستاعاندا، شەشەن جىگىتىنىڭ كوزى شاراسىنان شىعىپ كەتە جازداپ، جەڭىلگەنىن ەرىكسىز مويىنداپ، جەر سابالاپ قويا بەردى. راسىمەن دە جاڭا عانا كوزدەرىن وت شاشىپ جۇتىنىپ شىققان شەشەن جىگىتىن بولات وسىلايشا ساباسىنا ءتۇسىرىپ، فينالعا جولداما الدى. ال، فينالدا  دجۋ-دجيتسۋ سپورتىنان قازاقستاننىڭ چەمپيونى ولەگ برۋسەنتسوۆتى كۇتىپ تۇردى.

ءيا، سوڭعى سىنعا ناعىز مىقتىلاردىڭ مىقتىسى شىعاتىنى بەلگىلى. شەشەنمەن وتكەن كەزدەسۋ ناعىز فينالعا بەرگىسىز بولاتىن. وسى جارىستاعى ەڭ جويقىن قارسىلاسىن تىزە بۇكتىرگەننەن كەيىن، بولات ءۇشىن فينال وتە اۋىر بولعان جوق. شەشۋشى سىنداعى جەكپە-جەكتە دە بولات قارسىلاسى ولەگ برۋسەنتسوۆتى اتىپ ۇرىپ، بۋىندىرۋ ادىسىمەن جەڭىلۋىنە ءماجۇبىر ەتىپ، تۇڭعىش وتكەن ەرەجەسىز جەكپە-جەك سپورتىنان قازاقستاننىڭ چەمپيونى اتاعىنا يە بولدى. ال، كەلەسى كۇنى 70 كگ-نان جوعارى سالماق دارەجەلەرى اراسىندا  اتاڭجىلىكتى سپورتشىلار اراسىنداعى سىندا «سۇر سۇڭقارلار» كلۋبىنىڭ سپورتشىسى، ەركىن كۇرەستەن سپورت شەبەرى  احمەد ەيۋبوۆ جەڭىسكە جەتتى.

بولاتتىڭ  ەپتىلىگى، تاكتيكالىق كۇرەس ءتاسىلى قالىپتاسقان بالۋان دەسەم ماقتاعانىم ەمەس ءدال سولاي بولاتىن-دى. سوندىقتان دا اللا ءناسىپ ەتىپ قارسىلاسىن جەڭىپ بولات، ەلىمىزدە  العاش ۇيىمداستىرىلعان ەرەجەسىز جەكپە-جەك جارىسىنىڭ ءوز سالماعىندا تۇڭعىش چەمپيون اتاندى. جارىس سالتاناتپەن اياقتالىپ، بايگەگە تىگىلگەن جۇلدە قۇرمەتپەن ۇلەستىرىلىپ جاتتى. ءبىزدىڭ بايگەگە تىگىلگەن مىڭ جارىم دوللاردىڭ ورنىنا ۇيىمداستىرۋشىلار ءبىر مىڭ دوللاردى تابىس ەتتى. دەگەنمەن دە جەڭىسكە جەلپىنىپ شىققان ءبىز بىردەن اسحاناعا بارىپ جاقسىلاپ وتىرىپ، جەڭىسىمىزدى اتاپ ءوتۋ ءۇشىن ءجۇرىپ كەتتىك.  كۇن بويى وتكەن تارتىستى سۇراپىل، سويقان جارىستان ابدەن قالجىراپ، شارشاپ شىققان ءبىز اشىعىپ قالساق كەرەك، دامحاناعا كەلىپ بار اقشاعا اياماي اۋقاتتاندىق. اسىرەسە، كاۆكاز كاۋاپىن ابدەن تويىپ جەپ، تاماشا ءبىر وتىرىپ قايتقانىمىز ەسىمنەن كەتپەيدى.

بۇگىندە بولات ەلۋدىڭ اسقارىنا شىققان ەل اعاسى بولىپ وتىر. ومىرلىك جارى نازگۇل ەكەۋىنىڭ ماپەلەپ وسىرگەن ولجاسى جۋىردا شاڭىراق كوتەرىپ، وتباسىن قۇرسا، ايداي ارۋ اقنيەت اتتى قىزى ءال-فارابي اتىنداعى قازاق ۇلتتىق مەملەكەتتىك ۋنيۆەرسيتەتىنە وقۋعا ءتۇسىپ وتباسىن قۋانتىپ وتىر.

ومىردە ادامنىڭ باقىتى وتباسىنىڭ اماندىعى ەكەنىن بىلەمىز. بولاتتىڭ دا  بۇگىندە بار تىلەۋى ەلى مەن وتباسىنىڭ اماندىعى. سوناۋ جىلدارى وتكەن جارىس تۋرالى ەسكە العاندا سول باياعى قاراپايىم سالماقتىلىعىنا سالىپ:

ء–يا، اللا ءناسىپ ەتىپ سول جارىستا جەڭىسكە جەتتىك قوي، شىركىن سول كەزدە وسى سپورت تۇرىنە كوزقاراس جاقسى بولعاندا مەن ارى-قاراي دا جەكپە-جەگىمدى جالعاستىرار ەدىم عوي. بىراق، بولاشاعىمىز الاشتىڭ اسىل ۇلدارىنىڭ قولىندا، – دەپ جاۋاپ بەردى.

راسىمەن دە قازاقتىڭ باتىر ۇلدارىنىڭ بۇگىنگى تاڭدا الەم جارىستارىندا توپجارىپ ەلىمىزدىڭ اتىن شىعارىپ، كوك تۋىمىزدى جەلبىرەتىپ جۇرگەن ساڭلاقتارى از ەمەس. «التىندا تاس، تاستا تاس-التىنداي بولماس باسقا تاس»، دەمەكشى،  بولاتتاي ءالى تالاي جاستار بيىككە شىعارى ءسوزسىز. بىراق، مەن ءۇشىن  بولات سۇلەيمەنوۆ ەرەجەسىز جەكپە-جەك ونەرىنەن ءوز سالماعىندا توپجارعان العاشقىلاردىڭ ءبىرى بولىپ، باستاۋ باسىندا تۇرارى ءسوزسىز. دەگەنمەن دە وسى سپورت تۇرىنەن بۇگىندە ەلىمىزدىڭ ماقتان ەتەر وتانداستارىمىزدىڭ قاتارى كوپتەپ شىعىپ كەلە جاتقانى قازاق ەلى ءۇشىن زور ماقتانىش دەپ بىلەمىز.

 

اقىن ورداباي ۇلى،

الماتى