Postnıkov: «Slavııany» jeńý úshin qolymyzdan kelgenniń bárin jasaımyz

«Astana» komandasynyń qorǵaýshysy Evgenıı Postnıkov Eýropa lıgasynyń toptyq kezeńindegi «Slavııa» komandasyna qarsy oıyn aldynda pikir bildirdi.

– Erteń jaqsy oıyn kórsetemiz dep oılaımyz. «Slavııanyń» deńgeıin de jaqsy bilemiz, qansha degenmen Eýropada óner kórsetip júrgen komanda. Biz qolymyzdan kelgenniń bárin jasaımyz.

– Osyǵan deıin eýrokýboktyq matchtarda kezdesken komandalardyń ishinde «Slavııa» qaısysyna uqsaıdy dep oılaısyz?

– Shynymdy aıtsam, naqty bir komandaǵa teńeı almaımyn. Ispanııada biz qysqa ári pastarǵa senim artsaq, bul joly bizdi basqa oıyn kútip tur. Shabýyl shebinde jyldam oınaıtyn fýtbolshylary da az emes. Sondyqtan ár komandanyń ózindik stıli, óz taktıkasy bar.

– Qorǵaýshy retinde qarsylastaryńyzdyń birine jaýapty etip qoıdy ma? Kimnen qaýip kútýge bolady? Mıgel Dannı men Tomash Neıdke qarsy oınaý qanshalyqty qıyn bolýy múmkin?

– «Slavııada» myqty oıynshylardan jınalǵan. Keıbirin Reseıde júrgenimde kórdim. Tomash Neıd SKA-da júrgende, Dannı «Zenıttiń» namysyn qorǵap júrgen bolatyn. Al men ol kezde «Dınamonyń» jastarynda júrdim. Bapkerim naqty bireýge jaýapty etip qoımady. Biz komandalyq oıynǵa kóbirek senim artamyz. Tomash Neıd jyldam, kóbirek oılanýǵa múmkindik bermeıdi. Sonymen qatar, «Slavııanyń» ózge de oıyndaryn kórdim. Biz jumylǵan judyryqtaı óner kórsetý úshin barymyzdy salatyn bolamyz.

– Tomash Neıdten bólek taǵy kimnen qaýip kútesiz?

– «Slavııada» talantty jigitter jeterlik. Sondyqtan búkil komandadan qaýip kútýge bolady. Olar shabýylǵa da, qorǵanysqa da birdeı aralasady. Bári uıymshyl.

– «Tarazǵa» ádemi gol soǵyp, jankúıerlerińizdi qýantqan edińiz. Erteń de sizden osyndaı goldardyń birin kútemiz.

– Soqqym-aq keledi. Árıne, qolymnan kelse, múmkindigim bolsa, qaıtalaýdan taıynbaımyn (kúldi). Kópten beri soqpap edim, chempıonattaǵy alǵashqy golym. Men úshin árbir soqqan dobym mańyzdy.

– Jasandy alań týraly «Slavııa» oıynshylary da oılanyp júrgen bolar. Bul «Astanaǵa» basymdyq beredi dep oılaısyz ba?

– Bul úlken basymdyq dep aıta almas edim. Árıne, biz kúnde jattyǵyp júrgennnen keıin bizge ońaıyraq bolady. Al «Slavııaǵa» azdap qıyndaý bolýy múmkin. Alaıda, bul fýtboldyń bir bóligi. Degenmen, aıtarlyqtaı kedergi keltiredi dep oılamaımyn.

– «Astana» chempıonatta sońǵy 11 oıynda bir gol ǵana jiberdi. Al eýrokýboktyń ár kezdesýinde golsyz aıaqtalǵan emes.

– Biz ár oıynda gol jibermeýge tyrysamyz. Biraq bul oıymyz ylǵı da júzege asa bermeıdi. Qorǵaýshy bolǵandyqtan gol jibergen bizge de yńǵaısyz. Ishki birinshilikte bul múmkin bolǵanmen, Eýropa fýtbolynyń deńgeıi joǵary, bolmashy qateligimiz golǵa aınalady. Erteń qaqpamyzǵa gol jibermeýge tyrysamyz.

– Chehııada qazir 22 gradýs jyly, al «Astanada» kún salqyn. Mundaı aýa raıynda fýtbol oınaý qıyn emes pe?

– Keshe stadıonnyń shatyryn japty. Sondyqtan jyly bolady. Biraq maǵan kún ystyqta oınaǵannan osyndaı salqyndaý aýa raıy yńǵaıly.