اقتوبەدە تەننيسشىلەر ءابسوليۋتتى جەڭىمپاز اتاندى

اقتوبە قالاسىندا 18 جاسقا دەيىنگىلەر اراسىندا بەسىنشى ساناتتاعى ITF Juniors جارىسىندا ۆيتالي زاتسەپين مەن ءدىلناز ماشاباەۆا ءابسوليۋتتى چەمپيون اتاندى.

قاراعاندى تەننيس مەكتەبىنىڭ تۇلەگى زاتسەپين جەكەلەي سىندا فينالدا رەسەيلىك دميتري بۋرتسەۆتى 6:2، 6:1 ەسەبىمەن ويسىراتا ۇتتى.

جۇپتىق سىندا ۆيتالي الماتىلىق كيريلل كولگانوۆپەن بىرگە سوڭعى باسەكەدە ەلوردالىقتار داۆيد دجاۆادوۆ — يليا ۆەدمەدتى 6:2، 6:2 ەسەبىمەن ۇتتى.

بۇل — زاتسەپيننىڭ ITF Juniors تۋرنيرلەرىندەگى 10-ىنشى تيتۋلى (ۇشەۋى جەكەلەي، جەتەۋى جۇپتىق سىندا). ك. كولگانوۆ جۇپتىق سىندا ەكىنشى رەت چەمپيون اتاندى.

قىزدار اراسىندا ماشاباەۆا شەشۋشى كەزدەسۋدە رەسەيلىك داريا كۋزنەتسوۆادان 6:4، 6:4 ەسەبىمەن ايلاسىن اسىردى.

الماتى تەننيس مەكتەبىنىڭ تۇلەگى جۇپتىق سىندا تارتىستى وتكەن فينالدا كوماندالاس ارىپتەسى ساتي اۋباكىروۆامەن بىرگە رەسەيلىك كسەنيا ەرەمەنكو — قازاقستاندىق اسەم شويبەكتى ۇتتى. ەسەپ  – 6:1، 6:7، 12:10.

بۇل – ءدىلنازدىڭ وسىنداي دودالارداعى ءتورتىنشى تيتۋلى (ۇشەۋى جۇپتىق، بىرەۋى جەكەلەي سىندا) بولسا، ءساتيدىڭ تىرناقالدى تابىسى.

داستان كەنجالين،

استانا