Gúlmaral ERKEBAEVA: «Keminde eki altyn alamyz dep oılaımyn»

Azııa chempıonatynyń tórt dúrkin qola júldegeri, Qazaqstan chempıony, áıelder kúresinen Qazaqstan quramasynyń múshesi Gúlmaral Erkebaeva Astanada ótip jatqan Azııa chempıonatynda Qazaqstan áıelder quramasy qansha júlde alatynyna boljam jasady.

Qyzdarymyz on salmaqta beldesedi. On qyzymyz da osal emes. Azııa chempıonatyna birneshe jyldan beri qatysyp keledi. Endi favorıtterdi aıtatyn bolsaq, men ózim 76 kg salmaqta kúresemin. Osy salmaqta Qazaqstan chempıonatynda ekinshi oryn aldym. Birinshi oryn ıesi Elmıra Syzdyqova – Olımpııalyq oıyndardyń júldegeri. Sondaı-aq, Jamıla Baqbergenova degen qyzymyz bar. Ol álem chempıonatynyń eki dúrkin kúmis júldegeri. Jas qyzdarymyz osy Azııa chempıonatynda qatysady.

Jasóspirimder arasynda álem chempıony bolǵan Nılýfar Raımova degen qyz bar. Qazaqstan quramasynyń sapyna endi kirip jatqan jas qyzdarymyz da kúresedi. Olardyń da ambıııasy myqty, úlken úmit kútemiz.

50 men 53 kg salmaqtaǵy qyzdarymyzdyń bári – jastar quramasynan, eresekterden ótkenderdiń barlyǵy álem birinshilikterinde oryn alǵan qyzdar. Olardyń birinshi Azııa chempıonaty bolsa da qolaǵa ilinýge úlken múmkindikteri bar. Al endi burynnan quramada kele jatqan Elena Shalıgına, Elmıra Syzdyqovanyń tájirıbeleri jetedi.

Azııa chempıonatynda bizdiń qyzdarymyz altyn, kúmis, qolany da alǵan. Sondyqtan árqaısynyń múmkindikteri bar. Boljamym boıynsha, keminde eki altyn alamyz dep oılaımyn. Kimder ekenin aıtpaı-aq qoıaıyn.

Daıyndaǵan Aıbek MUHANOV,

ASTANA