SportPress.kz قازاقستان سپورت جاڭالىقتارى
«استانا» فۋتبول كومانداسىنىڭ باس باپكەرى ستانيمير ستويلوۆ ورالدىڭ «اقجايىعىنا» قارسى ويىن جايلى ءارى ءتورتىنشى مارتە قاتارىنان ەل چەمپيونى اتانعانى تۋرالى پىكىر ءبىلدىردى.
– ىشكى بىرىنشىلىكتە كەزەكتى رەت جەڭىسكە جەتكەنىمىزگە قۋانىشتىمىن. جىل بويى تىنباي ەڭبەك ەتتىك، مىنە وسىنىڭ ارقاسىندا جەمىسىن كورىپ وتىرمىز. كەز كەلگەن كومانداعا ءتورت دۇركىن ەل چەمپيونى اتانۋ باقىتى بۇيىرا بەرمەيدى. بۇل جەڭىسكە كلۋبىمىزداعى بارشا قىزمەتكەردىڭ ەڭبەگى ءسىڭدى. ال بۇگىنگى ويىندا قارسىلاسىمىزدان باسىم بولعانىمىز انىق. تەك گول سوعۋ ۋاقىتىمىزدى ازداپ ۇزارتىپ الدىق.
– «استانانىڭ» ەۋروپا ليگاسىنىڭ توپتىق كەزەڭىنەن شىعۋ مۇمكىندىگى جايلى نە ويلايسىز؟ ىشكى بىرىنشىلىك اياقتالدى، ەندى كوماندا ءجيى ويناپ ءوز دەڭگەيىن بۇرىنعىداي ۇستاپ تۇرۋى قيىنداۋ بولادى.
– ەڭ ءبىرىنشى دەمالامىز. سودان كەيىن «ۆيلياررەالعا» دايىندالاتىن بولامىز. ارينە، ويىن پراكتيكاسى بولماعاندىقتان قيىنداۋ بولارى بەلگىلى. ءوزىمىزدى بار قىرىمىزدان كورسەتىپ، قالعان ەكى ويىندا جەڭىسكە جەتۋگە تىرىساتىن بولامىز.
– كوماندانىڭ كوڭىل-كۇيى قانداي؟
– ءبارى كوڭىلدى. كەزەكتى رەت چەمپيون اتانعانىمىزعا قۋانىشتىمىز.
– ىشكى بىرىنشىلىكتەگى جەڭىسكە ارنايى سىيلىقاقى قاراستىرىلدى ما؟
– بۇل سۇراقتى قوزعاعانىڭىز دۇرىس بولدى. جىل بويى ءبىز ەشقانداي دا سىيلىقاقى المادىق. كلۋبتىڭ وسىعان بايلانىستى ءتىپتى، وتكەن جىلعى دا قارىزى بار. كوماندا بۇكىل مىندەتتى ورىنداي تۇرا سىيلىقاقى الماۋى دۇرىس ەمەس. بالكىم دەمەۋشىلەرىمىز بۇل جاعىنان حابارسىز شىعار. ءوز كەزەگىندە كوماندا ويىنشىلارى دا سىيلىقاقى تۋرالى ءسوز قوزعاماعانى مەنى ىشتەي قۋانتتى. بۇل ماسەلەنى ۇزاققا سوزباي شەشۋ كەرەك دەپ ويلايمىن. سوندىقتان سىيلىقاقى تۋرالى ازىرگە ەشنارسە ايتا المايمىن. سوڭعى ءۇش جىل ىشىندە «استانا» قازاقستانعا ۇلكەن قارجى اكەلدى. ال بۇل ماسەلە ءالى شەشىمىن تاپقان جوق.
– يۆان ماەۆسكيدىڭ جاراقاتى قانشالىقتى قاۋىپتى؟
– ازىرگە ەشنارسە ايتا المايمىن. ەگەر جاعدايى وڭالماسا ەمىن گەرمانيادا جالعاستىراتىن بولادى. «ۆيلياررەالعا» قارسى ويىنعا دايىن بولادى دەپ ۇمىتتەنەمىن. سونداي-اق، بۇگىن جاراقاتىنان تولىق ايىقپاعان ابزال بەيسەبەكوۆ پەن يۋري لوگۆينەنكونى الاڭعى شىعارىپ ۇلكەن تاۋەكەلگە بەل بۋدىم.
– «استانامەن» كەلىسىمشارتىڭىزدى ۇزارتۋ ويىڭىزدا بار ما؟
– وسىعان دەيىن ايتقانىمداي، كلۋب باسشىلىعى ءالى جاڭا كەلىسىمشارت ۇسىنعان جوق. ەۋروپادا بىلىكتى باپكەرلەر جەتەرلىك. مەن بولماسام دا «استانا» ءوزىن بيىككە جەتەلەيتىن مامان تابا الادى دەپ ويلايمىن. ال ماعان قازىرگى ۋاقىتتا بىرنەشە كلۋبتان ۇسىنىس كەلگەنىن جاسىرمايمىن. ايتا كەتەيىك، «استانا» بۇگىن پرەمەر-ليگانىڭ سوڭعى تۋرىندا ورالدىڭ «اقجايىعىن» ءوز الاڭىندا 2:0 ەسەبىمەن ۇتىپ، ءتورتىنشى جىل قاتارىنان ەل چەمپيونى اتاعىنا قول جەتكىزدى.
تۇرار ەرمۇرات
