SportPress.kz قازاقستان سپورت جاڭالىقتارى
قازاقستان ۇلتتىق قۇراماسىنىڭ شابۋىلشىسى ابات ايىمبەتوۆ بەلفاست قالاسىندا سولتۇستىك يرلانديامەن ماتچتىڭ الدىندا باق وكىلدەرىنىڭ سۇراقتارىنا جاۋاپ بەردى:
— سولتۇستىك يرلانديا قۇراماسىنىڭ باس جاتتىقتىرۋشىسى مايكل و’نيل قازاقستان ويىنشىلارىنىڭ اسا تانىمال ەمەس، سول سەبەپتى ولار تۋرالى بىردەڭە ايتۋ قيىن ەكەنىن ايتىپتى. ونىڭ سوزىنە نە ايتاسىز؟ بۇل ءبىزدىڭ كومانداعا باسىمدىق بەرە مە؟
— مەن ول تۋرالى ەشتەڭە ايتا المايمىن. نە دەسە و دەسىن. سولاي ويلاسا سولاي بولسىن! بىزدىڭ ماتچقا ءوزى ويىن جوسپارىمىز بار. ونى ويىندى كورسەتەمىز.
— سولتۇستىك يرلانديا قۇراماسى تۋرالى نە بىلەسىز؟
— وتە جاقسى كوماندا. «مانچەستەر يۋنايتەد» كومانداسىندا ويناعان تاجىريبەلى دجونني ەۆانس بار. سولتۇستىك يرلانديا — جاقسى قارسىلاس. اعىلشىن چەمپيوناتتارىندا اۋەلەتى زور جاس فۋتبولشىلار وينايدى.
— دانيا سياقتى مىقتى قۇرامانى جەڭدىڭىزدەر. ەندى توپتان شىعاتىن مۇمكىندىك بار ما؟
— ارينە، بىرىنشىدەن اللانىڭ قالاۋىمەن، ەكىنشى بارلىعى ءوزىمىزدىڭ ويىنىمىزعا جانە كۇش-جىگەرىمىزگە بايلانىستى. بىزدە ۇلكەن جوسپار بار. جاقسى ويناساق، ارينە جاقسى ناتيجە بولادى.
— سولتۇستىك يرلانديامەن ويىن سەن ءۇشىن دە، قازاقستان قۇراماسى ءۇشىن دە ماڭىزدى ويىن بولايىن دەپ تۇر. تاعدىرشەشتى ماتچ بولاتىن سياقتى. سان-مارينمەن ويىنعا قاتىسپادىڭ. ەندى وسى ويىنعا بار كۇشىڭدى سالاتىن شىعارسىڭ؟ ماتچقا دايىندىعىڭ قالاي؟ كوماندانىڭ دايىندىعى قالاي؟
— كوماندانىڭ دايىندىعى وتە كەرەمەت دەپ ايتا الامىن. جىگىتتەردىڭ كۇشى تاسىپ تۇر. جىگەر دە بار. ءبىزدىڭ جاتتىقتىرۋشى ايتقانداي، وسى ەكى ويىندا كوپ نارسە شەشىلەدى. جوسپارىمىزدىڭ قالاي بولاتىنىن وسى ويىننىڭ ناتيجەسى كورسەتەدى. سول ءۇشىن جىگىتتەر جاقسى دايىندىقپەن جاسىل الاڭعا شىعۋعا دايىن. وزىمە كەلەتىن بولساق، وسى ويىندى كوپ كۇتتىم. سان-مارينونمەن ويىنعا قاتىسپادىم. بىراق، ءار نارسەنىڭ قايىرى بار. بۇيىرسا، وسى ماتچتا بار كۇشىمىزدى سالامىز. ۇپاي الىپ، جانكۇيەرلەردى قۋانتامىز!
— ابات، قارسىلاس كوماندانى زەرتتەپ قارادىڭ با؟
— ويىندارىن قارادىم. قارسىلاس وسال ەمەس. تاجىريبەلى ويىنشىلار دا بار. شابۋىلشى بولعاننان كەيىن ءار ويىنعا گول سالامىن دەپ شىعامىن. وسى ويىنعا بار كۇشىمدى سالامىن.
— دانيامەن ويىندا جەيدەڭدى شەشىپ، سارى قاعاز الدىڭ. مۇنداي جاعداي قايتالانبايتىن شىعار…
— ول ويىندا ەموتسياعا بەرىلدىم. سوڭعى مينۋتتا گول سالۋ سيرەك نارسە. سول ءۇشىن وسىنداي قاتەلىك بولدى. جەڭىس گولدارى بولسا، ەندى جەيدەمدى شەشپەيمىن.
— ۇلتتىق قۇرامادا كوپ گول سالعان فۋتبولشىلاردىڭ تىزىمىندە زاينۋتدينوۆ تە بار. بالتيەۆتىڭ رەكوردىن جاڭارتۋعا شاماڭ جەتەدى. بۇل تۋرالى ويلامادىڭ با؟
— ارينە، ءار ويىنشىنىڭ ارمانى — ۇلتتىق قۇرامانىڭ تاريحىندا قالۋ. ەڭ باستىسى، قازاقستانعا ناتيجە اكەلۋ. ەكىنشىدەن، باحا ءۇشىن وتە قۋانىشتىمىن. باحامەن بىرگە رەكوردسمەندەر قاتارىندا بولسام كەرەمەت بولار ەدى. اللا دەنساۋلىق بەرسە، ءالى دە گولدار سالۋعا بولادى.
— سلوۆەنيا جانە دانيامەن ويناعاندا «استانا ارەنا» ستاديونى لىق تولدى. بۇل جولى كەرىسىنشە بولاتىن سياقتى. سولتۇستىك يرلانديامەن ماتچ قانشالىقتى قيىن بولادى؟
— ۇيدە جانە سىرت الاڭداعى ويىنداردىڭ ايىرماشىلىعى بار. بىراق قانشالىقتى قيىن بولعانىمەن، ءوزىمىزدىڭ ويىنعا دەگەن جوسپارىمىز بار. سولتۇستىك يرلانديا الاڭ يەسى بولعان سوڭ، باسىمدىعى بولادى. بىراق ءبىز بۇدان دا ۇلكەن ستاديوندا وينادىق. بار كۇشىمىزدى سالساق، قيىن بولمايدى دەپ ويلايمىن.
