استانا كۇنى مەرەكەسىنە 50-گە جۋىق سپورتتىق ءىس-شارا جوسپارلانىپ وتىر

استانانىڭ 25 جىلدىعىنا وراي قالادا 50-گە جۋىق سپورتتىق-بۇقارالىق ءىس-شارا وتكىزىلەدى. بۇل تۋرالى قالانىڭ دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەركەعالي كاربوزوۆ ايتتى.

ەلوردانىڭ 25 جىلدىعىنا ارنالعان ءىس-شارالار شىلدە ايىندا باستالدى.

2 شىلدەدە ساعات 12:00-دە «بارىس ارەنا» سپورت سارايىندا وتەتىن ون جىلدىق تاريحى بار «قازاقستان بارىسى» ءتۋرنيرى ماڭىزدى وقيعالاردىڭ ءبىرى بولادى.

تۋرنير ەلىمىزدە ۇلتتىق سپورت تۇرلەرىن دامىتۋ ارقىلى سالاماتتى ءومىر سالتىن قالىپتاستىرۋ قاعيداتتارىن ناسيحاتتاۋ، ۇلتتىق سپورت تۇرلەرىمەن اينالىسۋعا تارتۋ ارقىلى جاستاردىڭ بويىندا پاتريوتتىق سەزىمدى قالىپتاستىرۋ، ونىڭ حالىقارالىق ارەناداعى بەدەلىن جانە قازاق كۇرەسىن دامىتۋ ارقىلى ۇلتتىق يدەيا دەڭگەيىن ارتتىرۋ ماقساتىندا وتكىزىلەدى، – دەدى ول.

وعان ەلىمىزدىڭ ءار وڭىرىنەن 41 سپورتشى قاتىسادى. رۋسلان ابدىرازاقوۆ، نۇرداۋلەت جارىلعاپوۆ، ەراسىل قاجىباەۆ، عالىمجان قىرىقباي، ماقسات يساعابىلوۆ جانە ت.ب. تانىمال بالۋاندار قاتىسادى دەپ جوسپارلانىپ وتىر.

27 ماۋسىمدا استانادا ەرلەر مەن ايەلدەر اراسىندا بوكستان II حالىقارالىق «ەلوردا كۋبوگى» ءتۋرنيرى باستالدى. قازىر 10 ەلدەن كەلگەن 200-دەن اسا بوكسشى قولعاپ ءتۇيىستىرىپ جاتىر. ولاردىڭ ىشىندە وزبەكستان، قىتاي، ءۇندىستان، موڭعوليا جانە وزگە دە ەلدەردىڭ وكىلدەرى بار. جارىس 6 كۇنگە سوزىلادى. جەكپە-جەكتەر Qazsport تەلەارناسى مەن QAZAQ RING YouTube-پلاتفورماسىنىڭ تىكەلەي ەفيرىندە كورسەتىلەدى.

بوكس كۇندەلىكتى ساعات 14:00-دە باستالادى. ارەناعا استانا تۇرعىندارى مەن قوناقتارى ءۇشىن كىرۋ تەگىن.

2 شىلدەدە ترياتلون-پاركتە BI GROUP IRONMAN 70.3 Astana ءىرى حالىقارالىق جارىستارىندا ترياتلون اۋەسقويلارى باس قوسادى.

سونداي-اق قالىپتاسقان ءداستۇر بويىنشا استانا قالاسى اكىمدىگىنىڭ قولداۋىمەن ەلوردانىڭ 25 جىلدىعىنا وراي قالالىق ۇلتتىق جانە وليمپيادالىق ات سپورتى تۇرلەرىنىڭ فەدەراتسياسى ۇيىمداستىرعان بايگەدەن رەسپۋبليكالىق تۋرنير وتەدى. ەلىمىزدىڭ بارلىق وڭىرىنەن 100-گە جۋىق شاباندوز «قازانات» يپپودرومىندا جارىسادى. جارىس باعدارلاماسىندا 7 شاقىرىمدىق «قۇنان» جانە «جورعا» بايگەسى، 15 شاقىرىمعا ارنالعان «توپ» جانە 22 شاقىرىمدىق «الامان» بايگە بار. بايگە 6 شىلدەدە ساعات 10:00-دە باستالادى، — دەدى ول.

سونىمەن قاتار 6 شىلدەدە ەلوردانىڭ 25 جىلدىعىنا وراي «تولاعاي الىپتارى» اشىق قالالىق ءتۋرنيرى وتەدى. وعان 18 جاستان اسقان قالا تۇرعىندارى مەن قوناقتارى قاتىسا الادى. تۋرنير وتەتىن ورىن – ورتالىق ساياباقتىڭ اۆتوتۇراعى.

9 شىلدەدە امفيتەاتر الدىندا «قاجىمۇقان جولى» مادەني-سپورتتىق جوباسىن، 9 جانە 19 شىلدەدە «Astana Zhuldyzdary» حالىقارالىق شاحمات ءتۋرنيرىن، بالالار، جاسوسپىرىمدەر، جاستار جانە ارداگەرلەر اراسىندا «استانا كۋبوگى» شينكيوكۋشينكاي كاراتەدەن رەسپۋبليكالىق ءتۋرنيرىن وتكىزۋ جوسپارلانىپ وتىر.

داستان كەنجالين،

استانا