Astana kúni merekesine 50-ge jýyq sporttyq is-shara josparlanyp otyr

Astananyń 25 jyldyǵyna oraı qalada 50-ge jýyq sporttyq-buqaralyq is-shara ótkiziledi. Bul týraly qalanyń Dene shynyqtyrý jáne sport basqarmasy basshysynyń orynbasary Erkeǵalı Karbozov aıtty.

Elordanyń 25 jyldyǵyna arnalǵan is-sharalar shilde aıynda bastaldy.

2 shildede saǵat 12:00-de «Barys Arena» sport saraıynda ótetin on jyldyq tarıhy bar «Qazaqstan barysy» týrnıri mańyzdy oqıǵalardyń biri bolady.

Týrnır elimizde ulttyq sport túrlerin damytý arqyly salamatty ómir saltyn qalyptastyrý qaǵıdattaryn nasıhattaý, ulttyq sport túrlerimen aınalysýǵa tartý arqyly jastardyń boıynda patrıottyq sezimdi qalyptastyrý, onyń halyqaralyq arenadaǵy bedelin jáne qazaq kúresin damytý arqyly ulttyq ıdeıa deńgeıin arttyrý maqsatynda ótkiziledi, – dedi ol.

Oǵan elimizdiń ár óńirinen 41 sportshy qatysady. Rýslan Ábdirazaqov, Nurdáýlet Jarylǵapov, Erasyl Qajybaev, Ǵalymjan Qyryqbaı, Maqsat Isaǵabylov jáne t.b. tanymal balýandar qatysady dep josparlanyp otyr.

27 maýsymda Astanada erler men áıelder arasynda bokstan II halyqaralyq «Elorda kýbogy» týrnıri bastaldy. Qazir 10 elden kelgen 200-den asa boksshy qolǵap túıistirip jatyr. Olardyń ishinde О́zbekstan, Qytaı, Úndistan, Mońǵolııa jáne ózge de elderdiń ókilderi bar. Jarys 6 kúnge sozylady. Jekpe-jekter Qazsport telearnasy men QAZAQ RING YouTube-platformasynyń tikeleı efırinde kórsetiledi.

Boks kúndelikti saǵat 14:00-de bastalady. Arenaǵa astana turǵyndary men qonaqtary úshin kirý tegin.

2 shildede Trıatlon-parkte BI GROUP IRONMAN 70.3 Astana iri halyqaralyq jarystarynda trıatlon áýesqoılary bas qosady.

Sondaı-aq qalyptasqan dástúr boıynsha Astana qalasy ákimdiginiń qoldaýymen elordanyń 25 jyldyǵyna oraı qalalyq ulttyq jáne olımpıadalyq at sporty túrleriniń federaııasy uıymdastyrǵan báıgeden respýblıkalyq týrnır ótedi. Elimizdiń barlyq óńirinen 100-ge jýyq shabandoz «Qazanat» ıppodromynda jarysady. Jarys baǵdarlamasynda 7 shaqyrymdyq «Qunan» jáne «Jorǵa» báıgesi, 15 shaqyrymǵa arnalǵan «Top» jáne 22 shaqyrymdyq «Alaman» báıge bar. Báıge 6 shildede saǵat 10:00-de bastalady, — dedi ol.

Sonymen qatar 6 shildede elordanyń 25 jyldyǵyna oraı «Tolaǵaı alyptary» ashyq qalalyq týrnıri ótedi. Oǵan 18 jastan asqan qala turǵyndary men qonaqtary qatysa alady. Týrnır ótetin oryn – Ortalyq saıabaqtyń avtoturaǵy.

9 shildede Amfıteatr aldynda «Qajymuqan joly» mádenı-sporttyq jobasyn, 9 jáne 19 shildede «Astana Zhuldyzdary» halyqaralyq shahmat týrnırin, balalar, jasóspirimder, jastar jáne ardagerler arasynda «Astana kýbogy» shınkıokýshınkaı karateden respýblıkalyq týrnırin ótkizý josparlanyp otyr.

Dastan KENJALIN,

ASTANA