SportPress.kz Qazaqstan sport jańalyqtary
Irannyń astanasy Tehran qalasynda ótip jatqan VIII jabyq keshendegi Azııa chempıonatynyń birinshi kúni Qazaqtannyń jeńil atletteri 2 altyn jáne 1 qola medal jeńip aldy. Bul týraly Qazaqstan jeńil atletıka federaııasynyń baspasóz qyzmeti habarlady.
1 aqpan kúni tańerteńgi baǵdarlamada tek qyzdar óner kórsetti. 3000 metrge júgirýden qostanaılyq Tatıana Neroznak qarsylastarynan oq boıy ozyp shyqty. Ol 3 shaqyrymdy 9 mınýt 33.65 sekýndta júgirip ótti. Sóıtip, ekinshi oryndaǵy qyrǵyz sportshysy Gúlshana Satarovadan 14 sekýndqa ozyp ketti. Qola júlde Vetnamnan kelgen Thı Oan Ngýenge buıyrdy.
– Buǵan deıin eki márte jabyq keshendegi Azııa chempıonatynda 800 metrge júgirip, qola júlde alǵanmyn. Osy joly chempıon bolý baqyty buıyrdy. Árıne, altynnyń áseri basqa, qýanyshtymyn. Jarysqa daıyndyǵym óte jaqsy boldy. Endi 1500 metrde de jeńiske jetýdi kózdeımin. Sosyn tamyz aıynda ótetin jazǵy Azııa oıyndaryna daıyndalamyn, – deıdi Tatıana Neroznak.
Qazaqstan quramasynyń qorjynyna ekinshi altyn júldeni úsh qarǵyp sekirýden Irına Ektova saldy. Soltústik Qazaqstan oblysynyń týmasynyń Tehrandaǵy eń úzdik kórsetkishi – 13.79 metr. Ektova 2018 jyldy jaqsy bastady. Ol buǵan deıin qańtar aıynda О́skemende ótken úsh jarysta top jarǵan bolatyn. Ekinshi orynǵa – 2017 jylǵy Azııa chempıonatynyń qola júldegeri úndistandyq Shına Nellıkal turaqtady (13.37 m). Úzdik úshtikti 13.22 metrmen Thı Thý Thao (Vetnam) túıindedi. Al taǵy bir qazaqstandyq atlet Marııa Ovchınnıkova tórtinshi oryndy qanaǵat tutty. Ol 13 metrge sekirdi.
– О́zge elde Qazaqstannyń ánuranyn shyrqap, elinniń týyn kókke kótergende erekshe áserde bolasyń. Bul sáttegi sezimdi aıtyp jetkizý qıyn. Nátıjem ortasha desem boldy. Sondyqtan búgingi kórsetken ónerime +4 degen baǵa qoıamyn. Endi uzyndyqqa sekirýden qatysamyn. Shamam kelgenshe Qazaqstan quramasyna taǵy bir júlde syılasam dep úmittenemin, – deıdi úsh qarǵyp sekirýden 2018 jylǵy jabyq keshendegi Azııa chempıony Irına Ektova.
Bıiktikkke cekirýden Shyǵys Qazaqstan oblysynyń sportshysy Nadejda Dýbovıkaıa qola júldeni jeip aldy. Jerlesimiz Tehranda 1.80 metrdi baǵyndyrdy. Negizi jergilikti sportshy Sepıdeh Tavakolıdiń de kórsetkishi Nadejdamen birdeı bolǵanymen, ol qosymsha kórsetkishter arqasynda kúmis júldege ıe boldy. Al ózbekstandyq Nadııa Dýsanova 2018 jylǵy jabyq keshendegi Azııa chempıony atandy (1.87 m).
Sondaı-aq, 60 jáne 400 metrge júgirgen qyzdarymyz fınalǵa shyqty. Eń qysqa qashyqtyqta Rıma Kashafýtdınova men Vıktorııa Zıabkına óner kórsetse, 400 metrde Elına Mıhına men Svetlana Golendova bar. Erlerden 400 metrge fınalda Mıhaıl Lıtvın júgiredi. Ol búgin irikteý kezeńin 48.35 sekýndta júgirip ótti.
(Sýrette Irına Ektova)
