Álem chempıonatynda Elızabet Tursynbaeva kúmis júlde aldy

Japonııanyń Saıtama qalasynda mánerlep syrǵanaýdan ótip jatqan álem chempıonatynda Elızabet Tursynbaeva kúmis júldeni jeńip aldy.

Álemdik dodada ol qazaq qyzdarynan buryn-sońdy eshkim jetpegen jetistikke jetti. Jarysta Elızabet óte jaqsy óner kórsetip, tórttik salhovty oryndady. Mánerlep syrǵanaýda áıelder arasynda mundaı qıyn elementti eshkim oryndaı almaǵan.

Tóreshiler Tursynbaevanyń bul oryndaýyn 148.80 balǵa baǵalady. Jarysta jankúıerler men telearna kommentatorlary tańdasyndaryn jasyrmaı, aıdynda aqqýdaı júzgen qazaq qyzyna qaıran qaldy. Sóıtip, Elızabet Tursynbaeva baǵdarlamalardyń qorytyndysy boıynsha 224.80 upaı jınap, Qazaqstan sportynyń tarıhynda tuńǵysh ret álem chempıonatynyń kúmis júldegeri atandy.

Sondaı-aq, ol qatpary qalyń tarıh betterinde áıelder arasynda tórttik salhovty tuńǵysh oryndaǵan sportshy retinde qaldy.

–Meniń qýanyshymda shek joq. Kúmis júldeni kútpedim.  Senesizder me, men áli bul elementti taza oryndaǵanyma senbeı turmyn. О́ıtkeni, sońǵy eki jarysta salhovty oryndaýda qatelik jibergen edim. Al búgin taza oryndap shyqtym. Muz aıdynyna shyǵyp bara jatqanda ózimdi jaqsy sezingenmin. Bir kúsh qoldap turǵandaı boldy. Sol bir keremet sezim menen sońyna deıin ketken joq, – dedi Tursynbaeva.

Álem chempıonatynda reseılik Alına Zagıtova altyn medaldi, onyń otandasy Evgenııa Medvedeva qola júldeni ıelendi.

Dastan KENJALIN,

ASTANA

B