Qazaqstan quramasy Shotlandııa komandasynan aılasyn asyrdy

Búgin Astanada fýtboldan 2020 jyly ótetin Eýropa chempıonatynyń irikteý týrnırine qatysyp jatqan Qazaqstan men Shotlandııanyń ulttyq qurama komandalary kezdesti.  Bul matchta elimizdiń bas komandasy 3:0 esebimen jeńiske jetti.

Kezdesý otandastarymyz úshin óte jaqsy bastaldy. Matchtyń 10-mınýtynda-aq Iýrıı Perýh pen Ian Vorogovskıı bir-birden gol soǵyp, shotlandııalyqtardy eseńgiretip jiberdi. Oıynnyń osylaı bastalatynyn kútpegen qonaqtar shabýyl jasaı almaı, birinshi taımnyń sońyna deıin qorǵanysta jatyp aldy. Al alań ıeleri osy goldardan keıin jigerlenip, shabýyldaýdy jalǵastyryp, oıynnyń kórigin qyzdyrdy.

Ekinshi taımda da jaǵdaı osylaı boldy. Birinshi taımnan shok alǵan shotlandııalyqtar qaýipti jaǵdaı jasaǵysy kelgenimen, odan eshteńe shyqpady. Al ulttyq qurama bolsa shabýyldar uıymdastyryp, qonaqtardyń biraz júıkesin juqartyp, mazasyn aldy. Qazaqstan komandasynyń sapynda bári jaqsy oınady. Bári de óz oryndaryn bilip, bas jattyqtyrýshy cheh mamany Mıhal Bılektiń taktıkasyn ustanyp, saýatty oıyn órnegin kórsetti. Sondaı sátterdiń birinde Bahtıer Zaınýtdınov úshinshi dopty torǵa týlatty. Kezdesýde tablodaǵy esep 3:0-di kórsetse de alań ıeleri bir sát bosańsymaı, sońyna deıin oınady. Jankúıerlerdi oıynshylardyń osy minezi tánti etti.

Match osylaı Qazaqstan quramasynyń jeńisimen aıaqtaldy. Osy kúni I tobynda taǵy eki oıyn boldy. Kıpr óz alańynda San-Marıno quramasyn 5:0 esebimen jeńse, Belgııa komandasy reseılikterdi 3:1 esebimen utty.

Endi Qazaqstan ulttyq quramasy kelesi matchyn 24 naýryzda Reseı komandasymen ótkizedi. Osy kezdesýde otandastarymyz Shotlandııamen oıyndaǵy minezin, erik pen kúsh-jigerin soltústiktegi kórshimizge kórsetse dep tileımiz.

Budan keıin Qazaqstan quramasy 8 maýsymda syrt alańda Belgııamen oınaıdy. 11 maýsymda óz alańynda San-Marıno komandasymen kezdesip, 6 qyrkúıekte Kıpr aralyna barady. 9 qyrkúıekte Máskeýde Reseı komandasymen taǵy kúsh synasyp, 10 qazan kúni «Astana-Arena» stadıonynda Kıpr quramasyna qarsy alańǵa shyǵady. 13 qazanda osy jerde Belgııa komandasymen oınap, 16 qarasha kúni San-Marınomen kezdesedi. Al  Eýropa chempıonatynyń irikteý týrnırindegi sońǵy oıynyn Qazaqstan ulttyq quramasy 20 qarashada Shotlandııaǵa qonaqqa baryp, osy eldiń komandasymen ótkizedi. 

Dastan KENJALIN,

ASTANA