قازاقستان قۇراماسى شوتلانديا كومانداسىنان ايلاسىن اسىردى

بۇگىن استانادا فۋتبولدان 2020 جىلى وتەتىن ەۋروپا چەمپيوناتىنىڭ ىرىكتەۋ تۋرنيرىنە قاتىسىپ جاتقان قازاقستان مەن شوتلانديانىڭ ۇلتتىق قۇراما كوماندالارى كەزدەستى.  بۇل ماتچتا ەلىمىزدىڭ باس كومانداسى 3:0 ەسەبىمەن جەڭىسكە جەتتى.

كەزدەسۋ وتانداستارىمىز ءۇشىن وتە جاقسى باستالدى. ماتچتىڭ 10-مينۋتىندا-اق يۋري پەرتسۋح پەن يان ۆوروگوۆسكي ءبىر-بىردەن گول سوعىپ، شوتلانديالىقتاردى ەسەڭگىرەتىپ جىبەردى. ويىننىڭ وسىلاي باستالاتىنىن كۇتپەگەن قوناقتار شابۋىل جاساي الماي، ءبىرىنشى تايمنىڭ سوڭىنا دەيىن قورعانىستا جاتىپ الدى. ال الاڭ يەلەرى وسى گولداردان كەيىن جىگەرلەنىپ، شابۋىلداۋدى جالعاستىرىپ، ويىننىڭ كورىگىن قىزدىردى.

ەكىنشى تايمدا دا جاعداي وسىلاي بولدى. ءبىرىنشى تايمنان شوك العان شوتلانديالىقتار قاۋىپتى جاعداي جاساعىسى كەلگەنىمەن، ودان ەشتەڭە شىقپادى. ال ۇلتتىق قۇراما بولسا شابۋىلدار ۇيىمداستىرىپ، قوناقتاردىڭ ءبىراز جۇيكەسىن جۇقارتىپ، مازاسىن الدى. قازاقستان كومانداسىنىڭ ساپىندا ءبارى جاقسى وينادى. ءبارى دە ءوز ورىندارىن ءبىلىپ، باس جاتتىقتىرۋشى چەح مامانى ميحال بيلەكتىڭ تاكتيكاسىن ۇستانىپ، ساۋاتتى ويىن ورنەگىن كورسەتتى. سونداي ساتتەردىڭ بىرىندە باحتيەر زاينۋتدينوۆ ءۇشىنشى دوپتى تورعا تۋلاتتى. كەزدەسۋدە تابلوداعى ەسەپ 3:0-ءدى كورسەتسە دە الاڭ يەلەرى ءبىر ءسات بوساڭسىماي، سوڭىنا دەيىن وينادى. جانكۇيەرلەردى ويىنشىلاردىڭ وسى مىنەزى ءتانتى ەتتى.

ماتچ وسىلاي قازاقستان قۇراماسىنىڭ جەڭىسىمەن اياقتالدى. وسى كۇنى ى توبىندا تاعى ەكى ويىن بولدى. كيپر ءوز الاڭىندا سان-مارينو قۇراماسىن 5:0 ەسەبىمەن جەڭسە، بەلگيا كومانداسى رەسەيلىكتەردى 3:1 ەسەبىمەن ۇتتى.

ەندى قازاقستان ۇلتتىق قۇراماسى كەلەسى ماتچىن 24 ناۋرىزدا رەسەي كومانداسىمەن وتكىزەدى. وسى كەزدەسۋدە وتانداستارىمىز شوتلانديامەن ويىنداعى مىنەزىن، ەرىك پەن كۇش-جىگەرىن سولتۇستىكتەگى كورشىمىزگە كورسەتسە دەپ تىلەيمىز.

بۇدان كەيىن قازاقستان قۇراماسى 8 ماۋسىمدا سىرت الاڭدا بەلگيامەن وينايدى. 11 ماۋسىمدا ءوز الاڭىندا سان-مارينو كومانداسىمەن كەزدەسىپ، 6 قىركۇيەكتە كيپر ارالىنا بارادى. 9 قىركۇيەكتە ماسكەۋدە رەسەي كومانداسىمەن تاعى كۇش سىناسىپ، 10 قازان كۇنى «استانا-ارەنا» ستاديونىندا كيپر قۇراماسىنا قارسى الاڭعا شىعادى. 13 قازاندا وسى جەردە بەلگيا كومانداسىمەن ويناپ، 16 قاراشا كۇنى سان-مارينومەن كەزدەسەدى. ال  ەۋروپا چەمپيوناتىنىڭ ىرىكتەۋ تۋرنيرىندەگى سوڭعى ويىنىن قازاقستان ۇلتتىق قۇراماسى 20 قاراشادا شوتلاندياعا قوناققا بارىپ، وسى ەلدىڭ كومانداسىمەن وتكىزەدى. 

داستان كەنجالين،

استانا