الماتىدا دزيۋدودان ازيا كۋبوگى دوداسى اياقتالدى

20 – 21 ءساۋىر كۇندەرى الماتى قالاسىندا قازاقستان دزيۋدو فەدەراتسياسىنىڭ قۇرمەتتى پرەزيدەنتى بەكەت ساپابەك ۇلى ماحمۇتوۆتىڭ قۇرمەتىنە دزيۋدودان جاسوسپىرىمدەر مەن جاستار اراسىندا ازيا كۋبوگى ءوتتى، دەپ حابارلادى سەمەي سپورت اكادەمياسىنىڭ ءباسپاسوز قىزمەتى.     

وسىمەن ءۇشىنشى رەت ۇيىمداستىرىلعان دوداعا ەلىمىزدەن بولەك قىرعىزستان، وزبەكستان، موڭعوليا، تاجىكستان، تۇركىمەنستان جانە رەسەيدەن كەلگەن تاتامي شەبەرلەرى قاتىستى. قازاقستان دزيۋدو فەدەراتسياسىنىڭ مالىمەتى بويىنشا، جارىستىڭ ءبىرىنشى كۇنىندە 6 ەلدەن 224 ءجاسوسپىرىم بەلدەسسە، ەكىنشى كۇنى 7 ەلدەن 186 جاس سپورتشى ءوزارا مىقتىنى انىقتادى. ايتا كەتسەك، بۇعان دەيىن، ياعني 2017، 2018 جىلدارى جاستار اراسىندا وتكىزىلگەن دودانىڭ بيىل اۋقىمى كەڭەيىپ، جاسوسپىرىمدەردىڭ دە باعىن سىناۋعا مۇمكىندىك بەرىلدى. ازيا كۋبوگى وتانداستارىمىز ءۇشىن الەم چەمپيوناتى الدىنداعى دايىندىق دەۋگە بولادى. ناقتىراق ايتساق، 25 – 29 قىركۇيەك كۇندەرى الماتى قالاسىندا دزيۋدودان جاسوسپىرىمدەر اراسىندا الەم چەمپيوناتى وتەدى دەپ جوسپارلانۋدا.

حالىقارالىق دزيۋدو فەدەراتسياسىنىڭ كۇنتىزبەسىنە سايكەس وتكىزىلىپ وتىرعان ازيا كۋبوگى تاجىريبە الماسىپ، جاس سپورتشىلارىمىزدىڭ شەبەرلىكتەرىن شىڭداۋعا مۇمكىندىك جاساسا، جەڭىمپازدار مەن جۇلدەگەرلەرگە الەمدىك رەيتينگتە ۇپايلار بەرىلەدى. جارىس جەڭىمپازدارىنا 100 ۇپايدان بەرىلسە، كۇمىس جۇلدەگەرگە 60، قولا جۇلدەگەرگە 40 ۇپايدان قوسىلادى. جاسوسپىرىمدەر اراسىندا وتكەن جارىستا قازاقستان قۇراماسى 11 التىن، 10 كۇمىس جانە 20 قولا جۇلدەمەن مەدال كەستەسىندە كوش باستادى.

بەلدەسۋدىڭ ەكىنشى كۇنىندە تاتاميگە جاستار شىعىپ، 14 سالماق دارەجەسىندە جۇلدەنى ساراپقا سالدى. 8 التىن، 8 كۇمىس، 16 قولا جۇلدەمەن قازاقستان ءبىرىنشى ورىنعا شىقتى. اتالعان دودادا سەمەي سپورت اكادەمياسىنىڭ شاكىرتتەرى دە باق سىناعان بولاتىن. جاستار اراسىندا 66 كيلودا داستان شاياحمەتوۆ قارسىلاس شاق كەلتىرمەي التىننان مەدال تاقتى. ال قىزدار اراسىندا 63 كيلودا زارينا ساريپوۆا ءبىرىنشى ورىن السا، وسى سالماقتا كريستينا سوتنيكوۆا ءۇشىنشى ورىننان كورىندى. جاسوسپىرىمدەر اراسىندا 73 كگ-دە سەرىكبول ەستاي توپ جارسا، قىزداردان 57 كگ سالماقتا تاتاميگە شىققان ءمولدىر بەيسەنوۆا ءۇشىنشى ورىن الدى.