• Қазақ
  •   
  • Qazaq
  •   
  • قازاق
  •   
  • Рус
  •   

    Arman balýan — aýdaryspaqtan Azııa chempıony

    Bıylǵy Qazaqstan chempıonatynyń bastalýyna sanaýly kúnder ǵana qaldy. 19 mamyrda Taraz qalasynda tý kóteretin elishilik chempıonatqa ár óńir óz úzdikterin úkilep qosýǵa daıar. Bir qýanarlyǵy, sońǵy jyldary ulttyq sport úzdikteriniń qatary qalyńdaı  túsýde. Solardyń biri – aýdaryspaqtan III Azııa chempıonatynyń absolıýtti salmaqtaǵy chempıony atanǵan aqtóbelik Arman SAǴYNBAEV. Búgin jankúıerge osy Arman balýandy jaqynyraq tanystyrýdy jón kórdik.

    Aýdaryspaq sportynda Aqtóbe oblysynyń dańqy ótken jyly bir dúrkiregen bolatyn. 2006 jyldan Aqtóbe oblysynda ulttyq sportqa jetekshilik jasaǵan tájirıbeli bapker, Qazaqstannyń eńbek sińirgen jattyqtyrýshysy  Abat Aımaǵambetovtiń úsh shákirti 2018 jylǵy eki birdeı iri jarysta birinen soń biri sýyrylyp shyqty. 60 kıloda Serǵazın Azamat, 70 kg salmaqta Shyńǵyshan Erjanov Qazaqstan chempıonatynda da, III Azııa chempıonatynda da chempıondyq ataqty jeńip aldy. Al, 80 kg salmaqtaǵy Arman Saǵynbaev III Azııa chempıonatynyń absolıýtti salmaqtaǵy chempıony atandy. Aýdaryspaqtan 2014 jylǵy jáne 2016 jylǵy Azııa chempıondary, 4-5 jyl aralyǵynda ótken iri dodanyń eshbirinde jeńilip kórmegen Birjan Qosalıev pen Syrym Izbasarovtan sheberlik asyryp, Azııa jeńimpazy bolǵan Arman Saǵynbaev sol kezde  qalyń jankúıerdi shynymen de tań qaldyrdy. Eger salmaǵy bar-joǵy 80 kılo tartatyn Arman fınaldyq jekpe-jekte ózinen otyz kılo aýyr, aýdaryspaqtaǵy ataǵy jer jarǵan Birjan balýanmen taısalmaı tartysyp, upaı sanymen jeńip ketse jankúıer bitken qalaısha tańdanbasyn?!

    Sýrette: III Azııa chempıonatynyń absolıýtti salmaqtaǵy chempıony Arman Saǵynbaev

    Sýrette: Qazaqstan Respýblıkasynyń eńbek sińirgen jattyqtyrýshysy, aqtóbelik bapker Abat Aımaǵambetov III Azııa chempıony atanǵan shákirtterimen birge

    Sýrette: Aýdaryspaq sportynyń dańqty balýandary (ońnan solǵa qaraı) Shyńǵyshan Erjanov, Birjan QosalıevSyrym Izbasarov, absolıýtty salmaqtaǵy chempıon Arman SaǵynbaevEsimhan Rahmatilla jáne  Azamat Serǵazın

    Arman balýan – qazaqtyń aýdaryspaq sportynda osylaısha jarqyrap tanylǵan jańa esim. Sondyqtan, oraıy kelgende oqyrmanǵa bul jigitti jaqynyraq tanystyrýdy oryndy kórdik.

    Bizdiń qolda bar derekke súıensek, Arman 1995 jyly Aqtóbe qalasynda týǵan.  Otbasyndaǵy 5 balanyń ekinshisi. Jastaıynan kúrespen de, bokspen de shuǵyldanǵan. Biraq, 2010 jyldan bastap aýdaryspaq sportymen turaqty aınalysqan. Aýdaryspaqtan QR sport sheberi. QR ulttyq qurama komandasynyń negizgi múshesi. Qazirgi kezde Batys Qazaqstan gýmanıtarlyq jáne tehnıkalyq ýnıversıtetinde dene tárbıesi jáne sport mamandyǵy fakýltetiniń  2 kýrsynda oqıdy.

    Al, Arman balýannyń biz biletin  sporttyq jetistikteri tómendegideı. 2012 jyly  70 kg salmaqta jasóspirimder arasyndaǵy jáne jastar arasyndaǵy Qazaqstan chempıonatynyń júldegeri  boldy. 2013 jyly 80 kılo salmaqta eresekter arasyndaǵy el chempıonatynyń kúmis júldegeri atandy. 2014 jyly 80 kıloda jastar arasyndaǵy Qazaqstan chempıony ataǵyn ıelengen.  Sol jyly eresekter arasynda A.Asqarov atyndaǵy halyqaralyq týrnırdiń kúmis júldesin jeńip alǵan. 2016 jyly  «Astana juldyzy» respýblıkalyq týrnıriniń fınalynda Birjan Qosalıevke ǵana ese jiberip, kúmis júldeni qanaǵat tutty. 2015 jyly áskerı boryshyn ótedi.  2016 jyly 80 kılodan asa salmaqta jastar arasyndaǵy el chempıony boldy jáne «Altyn tuǵyr» ıegeri atandy.  2017 jyly «Aqbıdaı» aýyl sporty oıyndarynyń júldegeri boldy. 2018 jyly elorda tórinde ótken III Azııa chempıonatynyń absolıýtti salmaqtaǵy chempıony ataǵyn ıelendi.

    Eske salyp ótsek, 2014 jyly Astana qalasynda aýdaryspaqtan tuńǵysh uıymdastyrylǵan Azııa chempıonatynyń absolıýtti chempıony Birjan Qosalıev (Túrkistan oblysy) bolsa, 2016 jyly Qytaıdyń Ile-Qazaq avtonomııaly oblysynda ótken II Azııa chempıonatynyń absolıýtti chempıony Syrym Izbasarov (Túrkistan oblysy). Sondaı-aq, 2017 jyly aýdaryspaq sportynan elordada ótken  halyqaralyq týrnırdiń absolıýtti salmaqtaǵy básekesinde  Birjan Qosalıev jeńimpaz atandy.

     

    Tólegen JÁKITAI

     

     

     

     

     

     

    Pikir jazý

    Your email address will not be published. Required fields are marked *

    *