• Қазақ
  •   
  • Qazaq
  •   
  • قازاق
  •   
  • Рус
  •   

    تۇڭعىش الەم چەمپيوناتىنا قاتىساتىن مەرگەندەر

    نۇر-سۇلتان قالاسىندا وتەتىن «التىن جەبە» ءى الەم چەمپيوناتىنىڭ باستالۋىنا ساناۋلى عانا كۇندەر قالدى. قازىرگى كەزدە مەرگەندەر سايىسىنا 12 مەملەكەتتىڭ جيىرمادان استام سپورتشىسىنىڭ قاتىساتىنى انىق بولدى. ولاردىڭ ىشىندە وتكەن جىلدارى «التىن جەبە» حالىقارالىق تۋرنيرىندە باق سىناعان بىرنەشە مەرگەن بار. جانكۇيەرگە تانىستىرۋ ماقساتىندا بۇگىن وسى سپورتشىلار تۋرالى جاريالاۋدى ءجون كوردىك.

    ەلورداداعى «حان-شاتىر» كەشەنى ماڭىندا، «Nur-Sultan Ethno Fest»  مەرەكەسى اياسىندا 31 مامىر مەن 2 ماۋسىم كۇندەرى وتەتىن «التىن جەبە» ءى الەم چەمپيوناتى ات ۇستىنەن ساداق اتاتىن شەتەلدىك مەرگەندەر ءۇشىن جاقسى تانىس. سەبەبى، بۇعان دەيىن جامبى اتۋدان «التىن جەبە» باسەكەسى ەلوردا تورىندە ەكى مارتە حالىقارالىق تۋرنير رەتىندە وتكىزىلگەن ەدى. وعان ۆەنگريا، وڭتۇستىك كورەيا، فينليانديا، مالايزيا، تۇركيا، مونعوليا، رەسەي، رۋمىنيا، پولشا سياقتى ەلدەردىڭ قۇرالايدى كوزگە اتقان ايگىلى مەرگەندەرى قاتىسقان بولاتىن. «التىن جەبە» ءتۋرنيرىنىڭ  باس جۇلدەسى ەكى جىل قاتارىنان رۋمىنيالىق سۇرمەرگەن ميحاي كوزمەيگە بۇيىردى. ال، ءتۋرنيردىڭ كۇمىس، قولا جۇلدەلەرىن ءبىزدىڭ ايتبەك سارىباي (2017 جىلى ءىى ورىن)، ەرالحان ايكوز (2017 جىلى ءىىى ورىن، 2018 جىلى ءىى ورىن)، ابزال تۋلىبەكوۆ (2018 جىلى ءىىى ورىن) سىندى جاس مەرگەندەرىمىز يەلەندى.

    ەندى مىنە، سول «التىن جەبە»  تۋرنيرى تۇڭعىش رەت الەم چەمپيوناتى  دەڭگەيىنە كوتەرىلدى. مادەنيەت مينيسترلىگىنىڭ جىلدىق كۇنتىزبەلىك جوسپارىنا سايكەس وتكىزىلەتىن بۇل الەمدىك سايىسقا  تومەندەگى ەلدەردىڭ وكىلدەرى   باق سىنايدى. جارىسقا شەت ەلدەردەن ەكى سپورتشى، ۇيىمداستىرۋشى رەتىندە ءبىزدىڭ ەلدەن بەس سپورتشى قاتىسادى. وسى جولى تۇڭعىش الەم چەمپيوناتىنىڭ باس جۇلدەسىن قازاق مەرگەندەرى  يەلەنۋگە ءتيىس  دەگەن سەنىمدەمىز.

    «التىن جەبە» ءى ءالەم چەمپيوناتىنا قاتىساتىن شەتەل مەرگەندەرى 

    1. الپەرەن الكان – تۇركيا
    2. ياۆۋز اياز – تۇركيا
    3. ۋاليد حاۋاجكي – سيريا
    4. الي گۋرماني – يران
    5. ديميتار ترۋكانوۆ – بولگاريا
    6. حودلەي حالسون – اقش
    7. فرانك سيحلەر – اقش
    8. پارك بەوم نام – وڭتۇستىك كورەيا
    9. ەردەنەسۋۆد ەردەنە – موڭعوليا
    10. گانتۋمۋر يدەنبااتار – موڭعوليا
    11. حونگر ۋلاداەۆ  – رەسەي
    12. ليۋبوۆ موروكو — رەسەي
    13. ۆيتالي گۋدىن  – ۋكراينا
    14. ۆلاديمير يانچەنكو– ۋكراينا
    15. ميحاي كوزمەي – رۋمىنيا
    16. المازبەك اكۋنوۆ  – قىرعىزستان
    17. ايانا قادىربەكوۆا  – قىرعىزستان

    سۋرەتتە: 2018 جىلعى «التىن جەبە» حالىقارالىق تۋرنيرىنە قاتىسىپ، «تۇرىك ءستيلى» بويىنشا وتكەن باسەكەدە ءۇشىنشى ورىندى، ال، تۋرنير قورىتىندىسى بويىنشا جۇلدەلى بەسىنشى ورىندى يەلەنگەن  تۇركيا سۇرمەرگەنى – الكان يبراحيم الپەرەن.

    سۋرەتتە: ءىى «التىن جەبە» حالىقارالىق تۋرنيرىندە ءتورتىنشى ورىندى يەلەنگەن موڭعوليا سۇرمەرگەنى ەردەنەسۋفت ەردەنە

    سۋرەتتە: ءىى «التىن جەبە» حالىقارالىق تۋرنيرىندە «ازيالىق ستيل» بويىنشا ەكىنشى ورىندى يەلەنگەن بولگاريا سۇرمەرگەنى  ديميتار ترۋكانوۆ

    سۋرەتتە: ءىى «التىن جەبە» حالىقارالىق تۋرنيرىنە قاتىسۋشى كورەيالىق مەرگەن پارك بەوم نام.

    سۋرەتتە: 2019 جىلى الماتىدا وتكەن جاستار اراسىنداعى ءى ازيا چەمپيوناتىندا ونەر كورسەتكەن رەسەيلىك  مەرگەن قىز ليۋبوۆ موروكو.

    سۋرەتتە: 2017 جىلعى جانە 2018 جىلعى «التىن جەبە» حالىقارالىق تۋرنيرىندە باس جۇلدەنى يەلەنگەن رۋمىنيالىق سۇرمەرگەن ميحاي كوزمەي.

     

     تولەگەن جاكىتاي

    پىكىر جازۋ

    Your email address will not be published. Required fields are marked *

    *