قازاقتىڭ ءتورت مەرگەنى الەم چەمپيوناتىنا قاتىسىپ جاتىر

بىرەر كۇن بۇرىن قوس جاتتىقتىرۋشى باستاعان ءتورت تاڭداۋلى مەرگەنىمىز  وڭتۇستىك كورەيادا ات ۇستىنەن ساداق اتۋدان  ۇيىمداستىرىلعان الەم چەمپيوناتىنا اتتانعان بولاتىن. قازىرگى كەزدە  ەرالحان ايكوز، ابزال تۋلىبەكوۆ،  ايتبەك سارىباي، باباجان باقداۋلەت ەسىمدى سپورتشىلارىمىز وڭتۇستىك كورەيانىڭ كاڭۆوندو پروۆينتسياسىنداعى سوكحچو قالاسىندا  وتىپ جاتقان XV الەم چەمپيوناتىندا باق سىناۋدا.

جانكۇيەر جادىنا سالىپ وتەلىك، ءبىزدىڭ مەرگەندەرىمىز وڭتۇستىك كورەياداعى الەم چەمپيوناتىنا بيىل ەكىنشى  مارتە قاتىسۋدا. وتكەن جىلى ءدال وسى سوكحچو قالاسىندا 23 مەملەكەتتىڭ مەرگەندەرى قاتىسقان  چەمپيوناتتا  ابزال تۋلىبەكوۆ پەن ەلدوس باداشەۆ كوماندالىق جارىستان جەڭىمپاز اتانىپ ورالعان بولاتىن.

سۋرەتتە:  XV الەم چەمپيوناتىنا قاتىسۋشى قازاق سۇرمەرگەندەرى.  (سولدان وڭعا قاراي) 2019 جىلى ەلوردادا وتكەن «»التىن جەبە» ءى الەم چەمپيوناتىنىڭ چەمپيونى  ەرالحان ايكوز، 2018 جىلى وڭتۇستىك كورەيادا وتكەن XىV الەم چەمپيوناتىنىڭ كوماندالىق جارىسىندا جەڭىمپاز اتانعان ابزال تۋلىبەكوۆ،  2017-2018 جىلى وتكەن «التىن جەبە» حالىقارالىق ءتۋرنيرىنىڭ كۇمىس، قولا جۇلدەگەرى ايتبەك سارىباي جانە 2019 جىلى  الماتىدا وتكەن  جاستار اراسىنداعى ءى ازيا چەمپيوناتىندا جامبى اتۋدان چەمپيون اتانعان باباجان باقداۋلەت.

جامبى اتۋ سپورتىنان رەسپۋبليكالىق باس تورەشى، ەلىمىزدىڭ ايتۋلى مەرگەندەرىنىڭ ءبىرى ەلدوس باداشەۆتىڭ حابارلاۋىنشا، وتكەن جىلعى الەم چەمپيوناتى قارساڭىندا سەمينار ۇيىمداستىرىلىپ، سول سەميناردا قازاقتىڭ   جامبى اتۋ سايىسى «قازاق ءستيلى» دەگەن اتاۋمەن تانىستىرىلعان ەكەن. ءبىزدىڭ مەرگەندەر جامبى اتۋدىڭ ءادىس-تاسىلدەرىن كورسەتكەن. سوندا جامبى اتۋدىڭ باسەكەسىنە قاتتى قىزىققان  وڭتۇستىك كورەيا رەسپۋبليكاسىنداعى دۇنيەجۇزىلىك ات ۇستىنەن ساداق اتۋ فەدەراتسياسىنىڭ پرەزيدەنتى كيم يۋنگ سۋپ مىرزا  سەمينار سوڭىندا «قازاق ءستيلىن» كەلەسى جىلعى الەم چەمپيوناتىنا قوسۋعا ۋادە بەرگەن. مىنە، دۇنيەجۇزىلىك ات ۇستىنەن ساداق اتۋ فەدەراتسياسىنىڭ پرەزيدەنتى سول ۋادە ۇدەسىنەن شىعىپ، XV الەم چەمپيوناتىندا دۇنيەجۇزى مەرگەندەرى تۇڭعىش رەت «قازاق ءستيلى» باسەكەسىنەن دە باق سىناماقشى. ەلدوس باداشەۆ بيىلعى سەميناردا دا جامبى اتۋ جارىسى تۋرالى كەڭ كولەمدە بايانداما جاساعان. ولاي بولسا، وسى جىلعى ەلىمىزدە جامبى اتۋدان وتكەن جاستار اراسىنداعى ءى ازيا چەمپيوناتى مەن  «التىن جەبە» ءى الەمدىك باسەكەدە توپ جارعان ءبىزدىڭ سۇرمەرگەندەرىمىز كورەياداعى الەمدىك دودادان دا ولجالى ورالادى دەپ ۇمىتتەنەمىز.

ات ۇستىنەن ساداق اتۋدان XV الەم چەمپيوناتى 27 تامىز كۇنى باستالدى. مەرگەندەرىمىزدى الەمدىك باسەكەگە باستاپ بارعان جاتتىقتىرۋشىلار ەلدوس باداشەۆ پەن ارسلان قابجانوۆ. چەمپيونات 1 قىركۇيەك كۇنى اياقتالادى.