«التىن تۇلپار» جايىقتىڭ جاعاسىندا جالعاسادى

12 قازان كۇنى قازاقستان رەسپۋبليكاسىنىڭ تۇڭعىش پرەزيدەنتى، ەلباسى ن.نازارباەۆتىڭ «رۋحاني جاڭعىرۋ» باعدارلاماسى  اياسىندا «نۇر-وتان» پارتياسىنىڭ قولداۋىمەن، ۇلتتىق سپورت قاۋىمداستىعى مەن اتىراۋ وبلىستىق اكىمدىگىنىڭ بىرلەسە ۇيىمداستىرۋىمەن اتىراۋ وبلىسى، ماحامبەت اۋدانى المالى ەلدىمەكەنىندە «التىن تۇلپار» الامان بايگەسى تاماشالانادى. بۇل تۋرالى ۇلتتىق سپورت قاۋىمداستىعى حابارلادى.

«التىن تۇلپار» بايگەسىنىڭ 2014 جىلدان باستاپ ءتورت مارتە نۇر-سۇلتان قالاسى اۋماعىندا وتكىزىلگەنى بارشاعا بەلگىلى. قازاقى قولتۋما جۇيرىك جىلقىلار تۇقىمىنىڭ قالىپتاسۋىنا ىقپال جاساۋ جانە ۇزاققا شاباتىن بايگە اتتارىن باپتايتىن اتبەگىلەردى ىنتالاندىرۋ ماقساتىندا قولعا الىنعان بۇل ات جارىسى قازىرگى كەزدە   قازاقستاننىڭ ەڭ ۇزدىك سايگ ۇلىكتەرى قاتىساتىن، ايتۋلى اتبەگىلەردىڭ اسىعا كۇتەتىن مەرەكەسىنە اينالدى. «التىن تۇلپار» رەسپۋبليكالىق ءتۋرنيرىنىڭ باس بايگەسىن 2014 جىلى قاراعاندى وبلىسىنىڭ جۇيرىگى «باقتورى»، 2015 جىلى جامبىل وبلىسىنىڭ تۇلپارى «Cامال»، 2016 جىلى جەتىسۋ ولكەسىنىڭ جۇيرىگى «جاننۇر»، 2017 جىلى جامبىل وبلىسىنىڭ تۇلپارى «سامال» ەكىنشى مارتە ۇتتى.

وتكەن جىلى ۇيىمداستىرۋشىلار القاسى «التىن تۇلپار» بايگەسىن  ەلوردا توڭىرەگىندە عانا ەمەس،  ەلىمىزدىڭ باسقا وڭىرلەرىندە دە وتكىزگەن ءجون دەپ شەشتى. ەكى جىلدا ءبىر رەت ۇيىمداستىرىلاتىن بولدى. بيىلعى الامان بايگەنىڭ رەسمي اتاۋى – «التىن تۇلپار – جايىق جاعاسىندا» V رەسپۋبليكالىق ءتۋرنيرى. قاشىقتىعى – 51 شاقىرىم. باس بايگەسى – 10 ميلليون تەڭگە. جالپى جۇلدە قورى – 22 ميلليون تەڭگە. الدىڭعى كەلگەن توعىز جۇيرىككە بايگە بار. الامان  جارىسقا جۇيرىك جىلقى تۇقىمدارىنىڭ بارلىعى جىبەرىلىپ، ەلىمىزدىڭ 14 وبلىسى جانە نۇر-سۇلتان، الماتى، شىمكەنت قالالارىنىڭ ارقايسىسىنان 5 سايگ ۇلىكتەن قاتىسادى. وتىنىمدەر 11-قازانعا  دەيىن قابىلدانادى.

سونداي-اق، 11-12 قازاندا اتىراۋ قالاسى كۇنىنە وراي، اتىراۋ وبلىسى اكىمدىگىنىڭ باستاماسىمەن، اتىراۋ وبلىسى دەنە شىنىقتىرۋ جانە سپورت باسقارماسىنىڭ،  وبلىستىق «ۇلتتىق سپورت تۇرلەرى» فەدەراتسياسىنىڭ ۇيىمداستىرۋىمەن، ماحامبەت اۋدانى المالى اۋىلىندا «دارابوز-2019» حالىقارالىق ءتۋرنيرى  وتەدى. كوكپار، اۋدارىسپاق، قازاقشا كۇرەس، تەڭگە ءىلۋ، جامبى اتۋ، الامان، توپ جانە  قۇنان بايگە،  جورعا جارىسى، قۇماي تازى جارىستارى سىندى ۇلتتىق سپورت تۇرلەرىنەن وتەتىن بۇل تۋرنيرگە قازاقستان جانە شەتەل كوماندالارى قاتىسادى. جارىستىڭ جۇلدە قورى – 32 180 000 تەڭگە.

ەسكە سالا وتەلىك، «التىن تۇلپار – جايىق جاعاسىندا» V رەسپۋبليكالىق ءتۋرنيرى مەن «دارابوز-2019» حالىقارالىق ءتۋرنيرىنىڭ ءباسپاسوز ءماسليحاتى اتىراۋ قالاسىندا 8 قازان كۇنى وتەدى. اقپاراتتىق قولداۋشى – «حابار 24» تەلەارناسى.