تۇركىستان وبلىسىندا اتاقتى كوكپارشىنىڭ ءتۋرنيرى وتەدى

2019 جىلعى 26 قازان مەن 2 قاراشا ارالىعىندا اتاقتى كوكپارشى، كسرو چەمپيوناتىنىڭ 9 دۇركىن چەمپيونى، كوماندالىق كوكپار ويىنىنىڭ نەگىزىن قالاۋشىلاردىڭ ءبىرى ءابىلحان داۋىلباەۆتىڭ ءتۋرنيرى وتەدى. بۇل تۋرالى ۇلتتىق سپورت قاۋىمداستىعى حابارلادى.

كوكپاردان جاستار اراسىنداعى رەسپۋبليكالىق اشىق تۋرنير تۇركىستان وبلىسى، شىمكەنت قالاسىنداعى اتشاباردا تاماشالانادى. داڭقتى كوكپارشى اتىنداعى جاستار تۋرنيرىنە ەلىمىزدىڭ كوپتەگەن ءوڭىرىنىڭ كوماندالارى قاتىسادى. ەسكە سالا وتەلىك، ءابىلحان داۋىلباەۆتىڭ ءتۋرنيرى بۇعان دەيىن بىرنەشە مارتە ەرەسەكتەر اراسىندا ۇيىمداستىرىلعان بولاتىن.

ءابىلحان داۋىلباەۆ  – تۇركىستان وبلىسى، تۇلكىباس اۋدانى، ءيىرسۋ اۋىلىندا 1950 جىلى 13 ساۋىردە دۇنيەگە كەلگەن.  وڭتۇستىك وڭىردەگى داڭقتى كوكپارشىلاردىڭ ءبىرى. وتىز جىلدان استام جاپپاي كوكپار شاپقان ارداگەر شاباندوز. كوكپاردان كسرو چەمپيوناتىنىڭ 9 دۇركىن چەمپيونى (1980-1991).  1984 جىلدان كوكپاردان قازاقستان قۇراما كومانداسىنىڭ كاپيتانى بولدى. كوماندالىق كوكپاردان قازاق كسر سپورت شەبەرى، قر ەڭبەك سىڭىرگەن جاتتىقتىرۋشىسى (2010)، «التىن تۇعىر» يەگەرى (2017). تۇركىستان وبلىسى، تۇلكىباس اۋدانى وبلىستىق ات سپورتى مەكتەبىنىڭ ديرەكتورى قىزمەتىن اتقارعان (2008-2018).  قازىرگى كەزدە زەينەتكەر.