ۋنيۆەرسيادا: كەرلينگ جارىسىنىڭ جەڭىمپازدارى انىقتالدى

ءابۋ ناسىر ءال-ءفارابيدىڭ 1150 جىلدىق مەرەيتويىنا ارنالعان ءVIIى قىسقى قازاقستان ۋنيۆەرسياداسى  جالعاسۋدا. بۇل تۋرالى  ءبىلىم جانە عىلىم مينيسترلىگى ۇلتتىق عىلىمي-پراكتيكالىق دەنە تاربيەسى ورتالىعىنىڭ ءباسپاسوز قىزمەتى حابارلادى.

بۇگىن «الماتى ارەنادا» كەرلينگ جارىسىنىڭ جەڭىمپازدارى ماراپاتتالدى. جارىسقا 10 جوعارى وقۋ ورنىنىڭ ستۋدەنتتەرى قاتىستى.

بۇل سىندا ەرلەر اراسىندا ءبىرىنشى ورىندى قازاق سپورت جانە تۋريزم اكادەمياسى جەڭىپ الدى. كۇمىس جۇلدەنى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى، ال قولا مەدالدى م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ وكىلدەرى يەلەندى.

قىزدار اراسىندا دا جارىس تارتىستى ءوتتى. بۇل باسەكەدە دە قازاق سپورت جانە تۋريزم اكادەمياسىنىڭ ستۋدەنتتەرىنە تەڭ كەلەر ەشكىم بولمادى. ولار باس جۇلدەنى الىپ كەتتى. ەكىنشى ورىنعا م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ جاستارى يە بولسا، ال ءۇشىنشى ورىندى ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ قۇرامى قاناعات تۇتتى.

ارالاس جۇپتار اراسىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتى ۇزدىك ناتيجە كورسەتتى. ودان كەيىنگى ورىنعا شەت تىلدەر جانە ىسكەرلىك كارەرا ۋنيۆەرسيتەتى جايعاسسا، ءۇشىنشى ورىن س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنە بۇيىردى.

ارالاس كوماندالار اراسىنداعى جارىستار دا قىزىقتى ءوتتى. بۇل سىندا د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ ستۋدەنتتەرى قۇرمەت تۇعىرىنىڭ ەڭ بيىك ساتىسىنا كوتەرىلدى. ەكىنشى ورىندى اباي اتىنداعى قازاق ۇلتتىق پەداگوگيكالىق ۋنيۆەرسيتەتى مىسە تۇتتى. ال ءۇشىنشى ورىندى ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى يەلەندى.

جالپىكوماندالىق ەسەپتە ءبىرىنشى ورىنعا اباي اتىنداعى قازاق ۇلتتىق پەداگوگيكالىق ۋنيۆەرسيتەتى شىقتى. ودان كەيىنگى ورىندى قازاق سپورت جانە تۋريزم اكادەمياسى يەلەنسە، ءۇشىنشى ورىنعا س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى تابان تىرەدى.