Ýnıversıada: Kerlıng jarysynyń jeńimpazdary anyqtaldy

Ábý Nasyr ál-Farabıdiń 1150 jyldyq mereıtoıyna arnalǵan VIII Qysqy Qazaqstan Ýnıversıadasy  jalǵasýda. Bul týraly  Bilim jáne ǵylym mınıstrligi Ulttyq ǵylymı-praktıkalyq dene tárbıesi ortalyǵynyń baspasóz qyzmeti habarlady.

Búgin «Almaty arenada» kerlıng jarysynyń jeńimpazdary marapattaldy. Jarysqa 10 joǵary oqý ornynyń stýdentteri qatysty.

Bul synda erler arasynda birinshi oryndy Qazaq sport jáne týrızm akademııasy jeńip aldy. Kúmis júldeni S.Amanjolov atyndaǵy Shyǵys Qazaqstan memlekettik ýnıversıteti, al qola medaldi M.Qozybaev atyndaǵy Soltústik Qazaqstan memlekettik ýnıversıtetiniń ókilderi ıelendi.

Qyzdar arasynda da jarys tartysty ótti. Bul básekede de Qazaq sport jáne týrızm akademııasynyń stýdentterine teń keler eshkim bolmady. Olar bas júldeni alyp ketti. Ekinshi orynǵa M.Qozybaev atyndaǵy Soltústik Qazaqstan memlekettik ýnıversıtetiniń jastary ıe bolsa, al úshinshi oryndy О́.Sultanǵazın atyndaǵy Qostanaı memlekettik pedagogıkalyq ýnıversıtetiniń quramy qanaǵat tutty.

Aralas juptar arasynda Abaı atyndaǵy Qazaq ulttyq pedagogıkalyq ýnıversıteti úzdik nátıje kórsetti. Odan keıingi orynǵa Shet tilder jáne iskerlik karera ýnıversıteti jaıǵassa, úshinshi oryn S.Amanjolov atyndaǵy Shyǵys Qazaqstan memlekettik ýnıversıtetine buıyrdy.

Aralas komandalar arasyndaǵy jarystar da qyzyqty ótti. Bul synda D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń stýdentteri qurmet tuǵyrynyń eń bıik satysyna kóterildi. Ekinshi oryndy Abaı atyndaǵy Qazaq ulttyq pedagogıkalyq ýnıversıteti mise tutty. Al úshinshi oryndy Q.Jubanov atyndaǵy Aqtóbe óńirlik memlekettik ýnıversıteti ıelendi.

Jalpykomandalyq esepte birinshi orynǵa Abaı atyndaǵy Qazaq ulttyq pedagogıkalyq ýnıversıteti shyqty. Odan keıingi oryndy Qazaq sport jáne týrızm akademııasy ıelense, úshinshi orynǵa S.Amanjolov atyndaǵy Shyǵys Qazaqstan memlekettik ýnıversıteti taban tiredi.