«دالا قىراندارى» ءتۋرنيرى: جۇلدە قورى – 80 مىڭ دوللار

قازاقتان شىققان وليمپيادا چەمپيونى، قازاقستاننىڭ ەڭبەك ەرى جاقسىلىق ۇشكەمپىروۆ اتىنداعى «جەكپە-جەك» سارايىندا «Qazaq kuresi» اسسوتسياتسياسىنىڭ ۇيىمداستىرۋىمەن «دالا قىراندارى» رەسپۋبليكالىق ءتۋرنيرى ءوتتى.

جارىسقا ەڭسەگەي بويلى، قاپتاعاي دەنەلى، رۋحى ءور، ءتانى بەكەم 64 بالۋان قاتىستى. ولار 55، 60، 66، 74، 82، 90، 100، +100 كەلى سالماقتا بەلدەستى.

جارىستىڭ سالتاناتتى اشىلۋ راسىمىنە مادەنيەت جانە سپورت مينيسترلىگى دەنە شىنىقتىرۋ جانە سپورت كوميتەتىنىڭ توراعاسى ءارى «Qazaq kuresi» اسسوتسياتسياسىنىڭ پرەزيدەنتى سامات ەرعاليەۆ، ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ، جازعى وليمپيادا چەمپيونى سەرىك ساپيەۆ، ەكى دۇركىن «قازاقستان بارىسى» ايبەك نۇعىماروۆ، سالا ارداگەرلەرى سەرىك توكەەۆ، مارات جاقىت، ديحانباي بيتكوزوۆ قاتىستى.

بۇگىندە ەلىمىزدە 60، 70، 80 كەلى سياقتى جەڭىل سالماقتا ونەر كورسەتىپ جۇرگەن سپورتشىلار كوپ. ولار جىلدار بويى ءوز سالماعىندا، جوعارى باسەكەلەستىك ورتادا شىڭدالىپ، ۇلكەن جەتىستىكتەرگە قول جەتكىزىپ كەلەدى. ءتىپتى، ەكى دۇركىن الەم چەمپيونى بولعان سپورتشىلارىمىز دا بار. دەگەنمەن ولاردىڭ تانىمالدىعى تومەن.

بۇل بالۋانداردىڭ قانداي قۇرمەتكە بولسا دا لايىق ەكەنىنە قاراماستان، سوڭعى جىلدارى بارلىق قۇرمەت پەن ماراپات تەك ءابسوليۋتتى سالماق دارەجەسىندەگى بالۋاندارعا بۇيىرىپ ءجۇر. ال مىنا ءتۋرنيردىڭ ماقساتى – جەڭىل سالماقتاعى بالۋانداردىڭ ۇزدىكتەرىن انىقتاپ، ولارعا قۇرمەت كورسەتۋ. يميدجدىك ءتۋرنيردىڭ جۇلدە قورى – 80 مىڭ اقش دوللارى.

جىل بويى وتكەن 5 رەيتينگتىك تۋرنيردە توگىلگەن تەر اقتالىپ، كەشەگى بالۋان شولاق، يمان ءجۇسىپ، قاجىمۇقان، جاقسىلىق ۇشكەمپىروۆتىڭ جالعاسى دەرلىك قازاق كۇرەسىنىڭ مىقتىلارى – 8 سالماقتىڭ «باس بالۋاندارى» انىقتالدى. ولار:

55 كگ. – بەكجان تولەپوۆ (قىزىلوردا وبلىسى)

60 كگ. – مارات نيگماتۋللاەۆ (الماتى قالاسى)

66 كگ. – نۇر امانشۇكىروۆ (جامبىل وبلىسى)

74 كگ. – جۇماجان قوجامبەكوۆ (شىمكەنت قالاسى)

82 كگ. – ايدىن دارتاەۆ ( ۇلىتاۋ وبلىسى)

90 كگ. – توقتاربەك ايداربەك (تۇركىستان وبلىسى)

100 كگ. – مۇحيت تۇرسىنوۆ (سولتۇستىك قازاقستان وبلىسى)

+100 كگ. – نۇرداۋلەت جارىلعاپوۆ (ماڭعىستاۋ وبلىسى).

بۇل رەتتە ءوزىنىڭ الاپات قارا كۇش يەسى ەكەنىن دالەلدەگەن بالۋان «دالا قىرانى» تيتۋلىنا يە بولىپ، ءوز سالماعىنىڭ «باس بالۋانى» اتاندى. سونداي-اق ولارعا جەڭىمپاز بەلدىگى مەن 10 مىڭ دوللاردىڭ سەرتيفيكاتى تابىستالدى.

بۇل 8 بالۋان الداعى جەلتوقسان ايىندا استانا قالاسىندا قازاق كۇرەسىنەن وتەتىن الەم چەمپيوناتىنا ىرىكتەلىپ وتىر. ءسويتىپ، ولار ءباسى بيىك دودادا ەل نامىسىن قورعايدى.

داستان كەنجالين،

استانا