Sábına Altynbekova sportqa qaıta oraldy

Qazaqstandyq voleıbolshy Sábına Altynbekova sportqa oralatynyn aıtty. Bul týraly ol Instagram jelisindegi paraqshasynda habarlady.

Kópshilikti tolǵandyryp kelgen másele týraly aıtqym keledi. Iá, men qaıtadan qatardamyn. Jańalyqtan qulaǵdar bolyńyzdar, –  dep jazdy ol Instagram jelisindegi storıste.

Sábına Altynbekova Taıvannyń astanasy Taıbeı qalasynda voleıboldan áıelder arasynda ótken XVII Azııa chempıonatynda eń sulý sportshy atanǵannan keıin jer júzine keńinen tanyldy. Sol kezde boıy 182 sm, salmaǵy 59 kg, aıaqtarynyń uzyndyǵy 124 sm qazaq qyzy týraly Taıvan, Japonııa men basqa da kóptegen elderdiń telearnalary reportajdar túsirgen bolatyn. Al ınternette kóptegen rolıkter paıda boldy. Azııalyq jankúıerler Sábınanyń kelbeti japondyq anıme keıipkerlerine uqsaıdy dep jarnama jasady. Internette Sábına Altynbekovanyń kóptegen áýesqoı, onyń ishinde «moe» stılinde sýretteri paıda boldy. Sodan beri voleıbolshynyń esimi jer júzine tarap, tanymaldylyǵy artty.

Sábına 1996 jyly Aqtóbe qalasynda týǵan. Bes jastan bastap bımen aınalysqan. Al voleıbolmen 14 jasynan beri aınalysyp keledi. Ol alǵash ret alańǵa «Kazhrom» klýbynyń jeıdemsin kıip shyqty. Sol kezde jas bolsa da bas bola biletinin kórmsetip, komandanyń kapıtany atandy. Sodan keıin 16 jastan bastap «Almatınochka» (Almaty qalasy) klýbynda aýysyp, komandada jaqsy oıyn órnegin kórsetip júrdi. Sonyń nátıjesinde 17 jasynda Qazaqstannyń voleıboldan áıelder quramasyna alyndy.

2020 jyly Sábınaǵa sportty ýaqytsha toqtatýǵa týra keldi. Osy jyly ol Saıat Salmanuly degen azamatqa turmysqa shyǵyp, kelesi jyly ul balany dúnıege ákeldi. Endi voleıbolshy bala kútimine baılanysty demalystan keıin úlken sportqa qaıta oralyp otyr.

Dastan KENJALIN,

ASTANA