كونفەدەراتسيا كۋبوگىنىڭ جالاۋى جەلبىرەدى

ەلىمىزدە كونفەدەراتسيا كۋبوگىنىڭ ىرىكتەۋ كەزەڭدەرى باستالدى. ءدۇبىرلى دودادا سپورتشىلار جارىستىڭ 5 تۇرىنەن باق سىنادى. اتاپ ايتقاندا، ولار بوكس، دزيۋدو، تاەكۆوندو، ەركىن جəنە گرەك ريم كۇرەستەرىنەن ءوزارا مىقتىنى انىقتادى.
تاراز قالاسىندا وتكەن ىرىكتەۋ كەزەڭىندە «D» توبىنىڭ سپورتشىلارى جارتىلاي فينالدىق جولداما ءۇشىن بارىن سالدى. جەرەبە بويىنشا «D» توبىنا اقمولا، جامبىل، قىزىلوردا وبلىستارى جəنە الماتى قالاسىنىڭ قۇراما كوماندالارى تۇسكەن بولاتىن.

كونفەدەراتسيا كۋبوگىنىڭ ىرىكتەۋ كەزەڭدەرىنىڭ رەسمي اشىلۋ سالتاناتىنا سپورتتىق جەكپە-جەك جəنە كۇش قولدانىلاتىن سپورت تۇرلەرى كونفەدەراتسياسىنىڭ مۇشەلەرى مەن جامبىل وبلىسىنىڭ باسشىلارى قاتىستى.

دزيۋدو جəنە تاەكۆوندو بويىنشا 2016 جىلعى كونفەدەراتسيا كۋبوگىنىڭ يەگەرلەرى جامبىل وبلىسى بيىل جانكۇيەرلەر ءۇمىتىن اقتاي المادى. ولار جارىستىڭ ەكى سپورت تۇرىنەن دە الماتى قالاسىنىڭ سپورتشىلارىنان جەڭىلىپ قالدى. دزيۋدودان جامبىل وبلىسىنىڭ قۇراما ساپىندا ۇلتتىق قۇراما مۇشەسى، ريو وليمپياداسىنىڭ كۇمىس جۇلدەگەرى، الەم چەمپيونى ەلدوس سمەتوۆ پەن ءازيز قالقامان ۇلى سىندى əلەمدىك جارىستاردا ەل نامىسىن قورعاپ جۇرگەن دزيۋدوشىلار بەلدەستى. سونداي-اق، الماتى قالاسىنىڭ نامىسىن حالىقارالىق جارىستاردا جۇلدەلى ورىندارمەن قازاق جۇرتىن قۋانتىپ جۇرگەن عۇسمان قىرعىزباەۆ، عۇمار قىرعىزباەۆ، ەلدوس جۇماحانوۆ، قىزىلوردا وبلىسىنىڭ قۇراما ساپىندا «قازاقستان بارىسى-2017» ءتۋرنيرىنىڭ جەڭىمپازى ەلامان ەرعاليەۆ كۇرەستى.

تاەكۆوندو بويىنشا دا الماتى قالاسىنىڭ سپورتشىلارى وسال ەمەستىگىن كورسەتتى. ولار جەرگىلىكتى سپورتشىلاردى، جامبىل وبلىسىنىڭ قۇراماسىن 85:90 ەسەبىمەن جەڭىپ، 2017 جىلعى كونفەدەراتسيا كۋبوگىنان جۇلدەسىز قالدىردى.

گرەك-ريم كۇرەسىنەن بوز كىلەمدە بەلدەسكەن قىزىلوردا وبلىسىنىڭ بالۋاندارى شەشۋشى كەزدەسۋدە الماتى قالاسىنىڭ سپورتشىلارىنان مىقتى ەكەنىن دəلەلدەدى.

ەركىن كۇرەستەن الماتى قالاسىنىڭ پالۋاندارى قارسىلاس شاق كەلتىرمەدى. شەشۋشى جولداما ءۇشىن كۇرەستە قىزىلوردا وبلىسىنىڭ وكىلدەرى مىقتى بولدى.

ەلىمىزدە كونفەدەراتسيا كۋبوگى بىلتىردان باستاپ وتكىزىلىپ جاتىر. جارىستىڭ جالپى جۇلدە قورى 125 ملن. تەڭگە. اتالعان دودانىڭ فينالدىق كەزەڭى 2-3 جەلتوقسان كۇندەرى الماتى قالاسىنداعى «بالۋان شولاق» سپورت كەشەنىندە وتەدى دەپ جوسپارلانعان.