Ulttyq quramanyń hokkeıshisi Qazaqstan azamattyǵynan aıyryldy

Astananyń «Barys» klýby men ulttyq quramanyń shabýylshysy Dmıtrıı Shevchenko Qazaqstan azamattyǵynan aıyryldy. Bul týraly Shaıba.kz habarlady.

Ol Qurlyqtyq hokkeı lıgasy Birinshi arna kýbogynda Reseı azamaty dep kórsetilip oınaǵan.

Jazda «Barys» klýbynyń basshylyǵyn qyzmetinen bosatýdy talap etken bastamshyl top Astana qalasy kóshi-qon departamentine Dmıtrıı Edýardovıch Shevchenkonyń eki eldiń zamaty bolýy múmkin ekenin aıtyp, tekserýdi suraǵan.

Tekseris kezinde hokkeıshide shynymen Reseı men Qazaqstan azamattyǵy bar bolyp shyqty. Ol Reseıdiń Týla qalasynda týǵan eken. Osyǵan baılanysty Shevchenko 6 jeltoqsanda Qazaqstan azamattyǵynan aıyryldy. Endi ol Qazaqstan quramasy úshin oınaı almaıdy.

Aldaǵy ýaqytta basqa da hokkeıshilerge qatysty tekseris bolady.

Dastan KENJALIN,

ASTANA