Almatydaǵy sport kolledji janyndaǵy mektep-ınternat qaıta ashyldy

Almatydaǵy Respýblıkalyq sport kolledji janyndaǵy mektep-ınternat qaıta ashyldy. Bul týraly Mádenıet jáne sport mınıstri Ashat Oralov aıtty.

«Mınıstrlikke kelip túsken túıtkildi máselelerdi saralap, sheshý joldaryn qarastyryp jatyrmyn. Solardyń ishinde mańyzdysy – Almatydaǵy «Respýblıkalyq sport kolledji» janyndaǵy mektep-ınternattyń jumysyn qaıta jandandyrýǵa qatysty ata-analar men ustazdar tarapynan túsken ótinishter.

Byltyr atalǵan oqý orny jabylyp, daryndy oqýshylar, jattyqtyrýshylar men ustazdar basqa bilim berý uıymdaryna jiberilgen edi. Máseleni birden tikeleı óz baqylaýyma aldym», — dedi ol.

Bul oqý ornynda  Dáýlet Turlyhanov, Olga Shıshıgına, Islam Baıramýkov pen basqa da ataqty sportshylar oqyp, osy bilim ordasynan túlep ushqan edi.  Mınıstrdiń aıtýynsha, sol sebepten bul mekteptiń bazasy men myqty oqytýshylary áli de kóptegen talantty sportshylardy daıyndaıtyn bolady. Sondyqtan mektepti jabý týraly sheshim qaıta qarastyryldy.

Mınıstrlik lıenzııany qaıtarý boıynsha aýqymdy jumys júrgizdi. Búginde bilim ordasy oqýǵa qujattar qabyldaýdy bastap ketti. Mektepke júzdegen bala qabyldanyp, ondaǵan kásibı oqytýshy men jattyqtyrýshy jumyspen qamtylady. Internattyń daıyndyq jumystaryn kórip, oqý kabınetteriniń jabdyqtalýyn, kitaptarmen qamtylýyn, jataqhanadaǵy oryndardyń jaı-kúıimen tanysý úshin arnaıy bardym. Sonymen birge, muǵalimderdiń tizimi, sabaq kestesi men kún tártibi bekitildi.

Osy rette mınıstr búginde memleket basshysy balalar sportyn damytýǵa aıryqsha nazar aýdaryp otyrǵanyn, Mádenıet jáne sport mınıstrligi úshin de sportpen aınalysqysy keletin balalardy jolda qaldyrmaı,  olarǵa qolda bar jaǵdaıdyjasaý eshqashan nazardan tys qalmaıtynyn atap ótti.

«Bolashaq búginnen bastalatynyn eskersek, el mereıin asyrar erteńgi chempıondarymyzǵa qajetti jaǵdaıdy dál qazir jasaýǵa tıispiz», — dedi ol.

Dastan KENJALIN,

ASTANA