Strandja kýbogy: Qazaqstan boksshylarynyń ekeýi jeńip, ekeýi jeńildi (VIDEO)

Bolgarııanyń astanasy – Sofııa qalasynda halyqaralyq Strandja kýbogy úshin týrnıriniń 1/8 fınaldyq jekpe-jekteri boldy.

Sońǵy kezderi kókjıekten yǵysyp qalǵan Germanııanyń Galle qalasyndaǵy halyqaralyq jarystyń ornyna «kishi álem chempıonaty» atanyp júrgen «Strandja» týrnıri jyldan-jylǵa óziniń bedelin arttyryp keledi.

Týrnırdiń úshinshi kúni qazaqstandyqtar sapynan rıngke tórt boksshy kóterilip, olardyń ekeýi jeńiske jetse, ekeýi jeńilistiń aщy dámin tatýǵa májbúr boldy.

Endi bárin retimen aıtaıyq. Sharshy alańǵa Qazaqstan komandasynan birinshi bolyp shyqqan 60 kelige deıingi salmaqtaǵy Erasyl Tańqaı kútpegen jerden fılıppındik Pol Djýlaıfer Baskonnan upaılar bólisi negizinde utylyp qaldy. Budan keıin ózbek Mýjıbýllo Týrsýnovpen prınıpti báseke ótkizgen Ertýǵan Zeınýllınov tóreshilerdiń bir aýyzdy sheshimimen jeńilis tapty.

Odan keıin sońǵy eki boksshymyz qýantty. Áýeli 75 kelige deıingi salmaqtaǵy Nurqanat Raıys  (sýrette) avstralııalyq Domınık Molınaromen kezdesti. Aıqas túgelimen bizdiń boksshynyń basymdyǵymen boldy Tóreshiler de muny durys baǵalady. Esep – 5:0. Sóıtip, Azııa chempıonatynyń kúmis júldegeri komandadan birinshi bolyp shırek fınalǵa qadam basty.

Al 92 kelige deıingi aýyr salmaqtaǵy Qamshybek Qońqabaev nıderlandtyq Sten Bertenspen jekpe-jegine basynan tyńǵylyqty daıyndyqpen kelgenin baıqatty. Ol ýaqyt uzaǵan saıyn óziniń basymdyǵyn eseleı túsip, qarsylasyn tyǵyryqqa tireı berdi. Aqyrynda ekinshi raýndta rıngtiń besinshi buryshyn izdeı bastaǵan básekelesin tereń nokaýtqa jiberdi.

Búgin shırek fınaldyq shaıqastar bastalady. Bul kúni 48, 54, 60, 67, 71, 86 kelilerge deıingi jáne 92 keliden aýyr salmaqtardaǵy bylǵary qolǵap sheberleri jartylaı fınalǵa shyǵý úshin qolǵap túıistiredi.

Týrnırde Bekzat Aldamjarov (54 kg) pen Erasyl Tańqaı (60 kg) jarys jolynan shyǵyp qalǵan. Al 71 kelige deıingi salmaqtaǵy Aslanbek Shymbergenov týrnırdiń bastalýyna 5 kún qalǵanda, eski jaraqaty syr berýine baılanysty jolǵa shyǵa almaǵan.

Osylardan basqa salmaqtardaǵy tórt boksshymyz sharshy alańǵa shyǵady. Olardyń da úsheýi О́zbekstannan kelgen qarsylastarymen kúsh synasqaly tur. Atap aıtqanda, Ernur Qaırat (48 kg) grýzın Lýka Kýblashvılımen bettesse, Temirhan Tezek (67 kg)  Bekzod Hamıdovpen, Bekzat Tańatarov (86 kg) Shohjahon Abdýllaevpen, al Qamshybek Qońqabaev (+92 kg) Bahodır Jalolovpen ustasady.

Shırek fınaldyń qalǵan salmaqtardaǵy (51, 57, 63,5, 75, 80, 92) jekpe-jekteri 24 aqpanda aıaqtalady. Jartylaı fınaldyq aıqastar 25 aqpanda ótse, fınaldyq básekeler 26 aqpan kúni bolady.

Dastan KENJALIN,

ASTANA