Mádenıet salasy qyzmetkerleriniń jalaqysy kóbeıedi

Memleket basshysy Qasym-Jomart Toqaev mádenıet jáne sport mınıstri Ashat Oralovpen kezdesti.

Kezdesýde prezıdentke tapsyrmalarynyń oryndalý barysy týraly málimet berildi. Sondaı-aq mınıstrliktiń mádenıet, sport jáne týrızm ındýstrııasyn damytýǵa baǵyttalǵan bastamalary tanystyryldy. Bul týraly Aqorda habarlady.

Mınıstr memleket basshysyna Almaty oblysynda sportshylardy Olımpıadaǵa daıarlaıtyn Respýblıkalyq bazanyń qurylysy týraly habardar etti. Nysan bıyl paıdalanýǵa beriledi dep josparlanyp otyr. 2025 jylǵa deıin jalpy 113 sport nysany salynady. Sonymen qatar mınıstr Dene shynyqtyrý men sportty damytýdyń 2023-2029 jyldarǵa arnalǵan tujyrymdamasynyń jobasy týraly aıtty.

Budan basqa, prezıdentke sportshylardyń aldaǵy jazda ótetin Azııa, Olımpııalyq oıyndarǵa daıyndyǵy jáne 2024 jyly elimizde V Dúnıejúzilik kóshpendiler oıyndaryn uıymdastyrý jumystary týraly málimet berildi.

Qasym-Jomart Toqaevtyń tapsyrmasy boıynsha 2025 jylǵa deıin mádenıet jáne muraǵat uıymdary qyzmetkerleriniń jalaqysy kezeń-kezeńmen ósedi.

Mınıstrlik otandyq avtorlardyń teatrdaǵy qoıylymdarynyń sanyn arttyrýdy jáne qazaqstandyq fılmderdi túsirýdi josparlap otyr. Bıyl alǵash ret jas jazýshylar men aqyndarǵa arnalǵan ádebı syılyq tabys etiledi. Jeti respýblıkalyq mádenıet uıymyna «ulttyq» mártebe berý máselesi pysyqtalyp jatyr.

Ashat Oralovtyń aıtýynsha, týrızm salasyn damytý maqsatynda Kids Go Free baǵdarlamasyna qatysý úshin týroperatorlarǵa qoıylatyn talaptar jeńildetilgen. Sondaı-aq qazaqstandyqtar úshin týrıstik keshbek engizý josparlanyp otyr.

Memleket basshysy ishki jáne syrtqy týrızmdi odan ári yntalandyrý, ınvestıııa tartý sharalaryn qabyldaýdy tapsyrdy. Prezıdent buqaralyq sportqa qoldaý kórsetý jáne sport ınfraqurylymyn qoljetimdi etý qajet ekenin atap ótti. Sondaı-aq, álemdik deńgeıdegi básekege qabiletti mádenıetti damytý úshin jaǵdaı jasaýdyń jáne elimizdegi kreatıvti ındýstrııalar bazasyn qalyptastyrýdyń mańyzdylyǵyna nazar aýdardy.

FOTO: AQORDA