SportPress.kz Қазақстан спорт жаңалықтары
Мемлекет басшысы Қасым-Жомарт Тоқаев мәдениет және спорт министрі Асхат Ораловпен кездесті.
Кездесуде президентке тапсырмаларының орындалу барысы туралы мәлімет берілді. Сондай-ақ министрліктің мәдениет, спорт және туризм индустриясын дамытуға бағытталған бастамалары таныстырылды. Бұл туралы Ақорда хабарлады.
Министр мемлекет басшысына Алматы облысында спортшыларды Олимпиадаға даярлайтын Республикалық базаның құрылысы туралы хабардар етті. Нысан биыл пайдалануға беріледі деп жоспарланып отыр. 2025 жылға дейін жалпы 113 спорт нысаны салынады. Сонымен қатар министр Дене шынықтыру мен спортты дамытудың 2023-2029 жылдарға арналған тұжырымдамасының жобасы туралы айтты.
Бұдан басқа, президентке спортшылардың алдағы жазда өтетін Азия, Олимпиялық ойындарға дайындығы және 2024 жылы елімізде V Дүниежүзілік көшпенділер ойындарын ұйымдастыру жұмыстары туралы мәлімет берілді.
Қасым-Жомарт Тоқаевтың тапсырмасы бойынша 2025 жылға дейін мәдениет және мұрағат ұйымдары қызметкерлерінің жалақысы кезең-кезеңмен өседі.
Министрлік отандық авторлардың театрдағы қойылымдарының санын арттыруды және қазақстандық фильмдерді түсіруді жоспарлап отыр. Биыл алғаш рет жас жазушылар мен ақындарға арналған әдеби сыйлық табыс етіледі. Жеті республикалық мәдениет ұйымына «ұлттық» мәртебе беру мәселесі пысықталып жатыр.
Асхат Ораловтың айтуынша, туризм саласын дамыту мақсатында Kids Go Free бағдарламасына қатысу үшін туроператорларға қойылатын талаптар жеңілдетілген. Сондай-ақ қазақстандықтар үшін туристік кэшбек енгізу жоспарланып отыр.
Мемлекет басшысы ішкі және сыртқы туризмді одан әрі ынталандыру, инвестиция тарту шараларын қабылдауды тапсырды. Президент бұқаралық спортқа қолдау көрсету және спорт инфрақұрылымын қолжетімді ету қажет екенін атап өтті. Сондай-ақ, әлемдік деңгейдегі бәсекеге қабілетті мәдениетті дамыту үшін жағдай жасаудың және еліміздегі креативті индустриялар базасын қалыптастырудың маңыздылығына назар аударды.
ФОТО: АҚОРДА
