مادەنيەت سالاسى قىزمەتكەرلەرىنىڭ جالاقىسى كوبەيەدى

مەملەكەت باسشىسى قاسىم-جومارت توقاەۆ مادەنيەت جانە سپورت ءمينيسترى اسحات ورالوۆپەن كەزدەستى.

كەزدەسۋدە پرەزيدەنتكە تاپسىرمالارىنىڭ ورىندالۋ بارىسى تۋرالى مالىمەت بەرىلدى. سونداي-اق مينيسترلىكتىڭ مادەنيەت، سپورت جانە تۋريزم يندۋسترياسىن دامىتۋعا باعىتتالعان باستامالارى تانىستىرىلدى. بۇل تۋرالى اقوردا حابارلادى.

مينيستر مەملەكەت باسشىسىنا الماتى وبلىسىندا سپورتشىلاردى وليمپياداعا دايارلايتىن رەسپۋبليكالىق بازانىڭ قۇرىلىسى تۋرالى حاباردار ەتتى. نىسان بيىل پايدالانۋعا بەرىلەدى دەپ جوسپارلانىپ وتىر. 2025 جىلعا دەيىن جالپى 113 سپورت نىسانى سالىنادى. سونىمەن قاتار مينيستر دەنە شىنىقتىرۋ مەن سپورتتى دامىتۋدىڭ 2023-2029 جىلدارعا ارنالعان تۇجىرىمداماسىنىڭ جوباسى تۋرالى ايتتى.

بۇدان باسقا، پرەزيدەنتكە سپورتشىلاردىڭ الداعى جازدا وتەتىن ازيا، وليمپيالىق ويىندارعا دايىندىعى جانە 2024 جىلى ەلىمىزدە V دۇنيەجۇزىلىك كوشپەندىلەر ويىندارىن ۇيىمداستىرۋ جۇمىستارى تۋرالى مالىمەت بەرىلدى.

قاسىم-جومارت توقاەۆتىڭ تاپسىرماسى بويىنشا 2025 جىلعا دەيىن مادەنيەت جانە مۇراعات ۇيىمدارى قىزمەتكەرلەرىنىڭ جالاقىسى كەزەڭ-كەزەڭمەن وسەدى.

مينيسترلىك وتاندىق اۆتورلاردىڭ تەاترداعى قويىلىمدارىنىڭ سانىن ارتتىرۋدى جانە قازاقستاندىق فيلمدەردى ءتۇسىرۋدى جوسپارلاپ وتىر. بيىل العاش رەت جاس جازۋشىلار مەن اقىندارعا ارنالعان ادەبي سىيلىق تابىس ەتىلەدى. جەتى رەسپۋبليكالىق مادەنيەت ۇيىمىنا «ۇلتتىق» مارتەبە بەرۋ ماسەلەسى پىسىقتالىپ جاتىر.

اسحات ورالوۆتىڭ ايتۋىنشا، تۋريزم سالاسىن دامىتۋ ماقساتىندا Kids Go Free باعدارلاماسىنا قاتىسۋ ءۇشىن تۋروپەراتورلارعا قويىلاتىن تالاپتار جەڭىلدەتىلگەن. سونداي-اق قازاقستاندىقتار ءۇشىن تۋريستىك كەشبەك ەنگىزۋ جوسپارلانىپ وتىر.

مەملەكەت باسشىسى ىشكى جانە سىرتقى ءتۋريزمدى ودان ءارى ىنتالاندىرۋ، ينۆەستيتسيا تارتۋ شارالارىن قابىلداۋدى تاپسىردى. پرەزيدەنت بۇقارالىق سپورتقا قولداۋ كورسەتۋ جانە سپورت ينفراقۇرىلىمىن قولجەتىمدى ەتۋ قاجەت ەكەنىن اتاپ ءوتتى. سونداي-اق، الەمدىك دەڭگەيدەگى باسەكەگە قابىلەتتى مادەنيەتتى دامىتۋ ءۇشىن جاعداي جاساۋدىڭ جانە ەلىمىزدەگى كرەاتيۆتى يندۋستريالار بازاسىن قالىپتاستىرۋدىڭ ماڭىزدىلىعىنا نازار اۋداردى.

فوتو: اقوردا