«Otyz jyl uıyqtaǵanymyz jeter»: Aqjúrek Tańatarov Toqaevtan arasha surap otyr (VIDEO)

Erkin kúresten 2012 jylǵy London Olımpıadasynyń jáne álem chempıonatynyń qola júldegeri, Azııa chempıony, Qazaqstannyń birneshe dúrkin chempıony, «Qurmet» jáne «Parasat» ordenderiniń ıegeri, Qazaqstan Respýblıkasyna eńbek sińirgen sport sheberi Aqjúrek Tańatarov prezıdent Qasym-Jomart Toqaevtan kómektesýin ótinip, vıdeoúndeý joldady.

Ol úndeýde ózin Jambyl oblysy deneshynyqtyrý jáne sport basqarmasynyń «Olımpıadalyq rezervtiń oblystyq mamandandyrylǵan mektep-ınternat kolledji» MKK basshysy laýazymynan zańsyz jolmen alyp tastaǵanyn aıtty.

Sonyń sebebin bilý úshin oblystyq sport basqarmasynyń basshysy Arman Tashmetovten suraǵanda, ol oblys ákimi Nurjan Nurjigitovtiń buıryǵy men sheshimin kórsetip, eshteńe isteı almaıtynyn aıtty. Iaǵnı, bul áreket Jańa Qazaqstannyń kóleńkesine de jaqyn emes. 90-jyldarǵa qaıta oralǵandaımyz. Prezıdent myrza! Men sport janashyry jáne osy salany jetik meńgergen  azamat retinde sizden Jambyl oblysynyń ákimdigi men sport basqarmasynda  zańsyzdyqtardy toqtatý úshin respýblıkalyq deńgeıdegi barlyq quqyq qorǵaý organdarynan, oǵan qosa Parlament depýtattarymen birigip komıssııa quryp, tolyqqandy tekseris taǵaıyndaýdy suraımyn.

Bul áreketimmen sizge maǵan qyzmet alyp berińiz demeımin. Tek ósip kele jatqan jas býyn ul-qyzdarymyz durys tálim-tárbıe alyp, álemdik arenada joǵary nátıjelerge qol jetkizse eken dep armandaımyn. Sol sebepti, oblysymyzdaǵy jemqorlyq áreketterdi toqtatyp, oblystaǵy laýazymdarǵa bilikti, tájirıbeli, janashyr jáne bedeli bar azamattardy taǵaıyndaýǵa atsalyssańyz. Otyz jyl uıyqtaǵanymyz jeter. Jańa Qazaqstandy birge quraıyq!, – dedi sportshy.

Olımpıada júldegeri sóziniń sońynda sol Jańa Qazaqstandy qurýǵa barynsha kúsh-jigerin salýǵa daıyn ekenin de jetkizdi.

Dastan KENJALIN,

ASTANA