Rybakına alǵash ret Rım masters týrnıriniń tórtinshi aınalymyna shyqty

Qazaqstannyń birinshi, álemniń 6-raketkasy Elena Rybakına alǵash ret Rım WTA 1000 týrnıriniń tórtinshi aınalymyna shyqty.

Qazaqstan tennısshisi úshinshi aınalymda dúnıejúzilik reıtıngte 57-orynda turǵan reseılik Anna Kalınskaıamen kezdesip, ony ýaqytynan buryn jeńgen edi. Olaı deıtinimiz, Kalınskaıa jaraqatyna baılanysty jarysty jalǵastyrýdan bas tartqan bolatyn. Osy matchta Rybakına 3 eıs,1 breık jasap úlgerdi. Al matchtyń ózi 35 mınýt qana boldy.

Endi Rybakına shırek fınalǵa shyǵý úshin álemniń 70-raketkasy, chehııalyq Marketa Vondroýshovamen kezdesedi. Chehııalyq tennısshi úshinshi aınalymda kútpegen jerden álemniń 8-raketkasy, grekııalyq Marııa Sakkarıdi 7:5, 6:3 esebimen utty.

Qazaqstan tennısshisi Kalınskaıamen oıynnyń aldynda álemniń 65-raketkasy, ıtalııalyq Iasmın Paolınımen kezdesip, ony 7:6 (7:4), 6:1 esebimen jeńdi.

Dastan KENJALIN,

ASTANA