الەم چەمپيوناتىندا ەلىمىزدىڭ ءانۇرانىن قويۋدا قاتەلىك كەتتى (ۆيدەو)

رەسەيدىڭ سوچي قالاسىندا سامبو كۇرەسىنەن اياقتالعان الەم چەمپيوناتىندا اقتوبەلىك پالۋان ەسەت قۋانوۆ باس جۇلدەنى جەڭىپ الىپ، كوك تۋىمىزدى كوككە جەلبىرەتتى! بۇل تۋرالى دەر كەزىندە وقىرماندارىمىزعا حابارلاپ، ءسۇيىنشى سۇراعان ەدىك. بۇكىل قازاق ەلى قۋانىپ، اق تۇيەنىڭ قارنى جارىلىپ جاتقاندا ماراپاتتاۋ سالتاناتى كەزىندە ورىن العان قولايسىز جايتتى ايتپاي كەتكەن بولاتىنبىز. سول وقيعانى بۇگىن بايانداپ وتىرمىز.

62 كيلو سالماقتاعى چەمپيوندار مەن جۇلدەگەرلەردى ماراپاتتاۋ كەزىندە ۇيىمداستىرۋشىلار قازاق ەلىنىڭ əنۇرانىنىڭ ورنىنا باسقا ەلدىكىن قويىپ جىبەردى. التىن تۇعىردا تۇرعان ەسەت باسىن شايقاپ، «بۇل ەمەس» دەپ، قارسىلىق ءبىلدىردى (ۆيدەو: 42:50). وسى كەزدە زالدا تۇرعان ءبىزدىڭ سپورتشىلار ءبىراۋىزدان قازاق ەلىنىڭ əنۇرانىن شىرقاپ قويا بەردى. ەسەت تە ولارعا قوسىلدى. قازاقتاردىڭ بۇل ارەكەتىن كورگەن ورىس كورەرمەندەر ورىندارىنان تىك تۇرىپ قول سوعىپ، ريزاشىلىقتارىن جانە قولدايتىندىقتارىن ءبىلدىردى. ۇيىمداستىرۋشىلار وزدەرىنشە ءانۇراندى توقتاتىپ، قايتادان قويىپ ەدى، بۇل جولى دا شاتاسىپ كەتتى. وعان قاراپ جاتقان ءبىزدىڭ سپورتشىلار جوق، ەلىمىزدىڭ əنۇرانىن شىرقاپ تۇرا بەردى. كوپتەگەن كورەرمەن ولاردىڭ قاسىنا كەلىپ، قولدارىن الىپ، قۇتتىقتاپ جاتتى.

ۇيىمداستىرۋشىلاردىڭ بۇل ارەكەتىنە تۇسىنبەدىك، ولار نەگە شاتاستى؟ الدە بۇل چەمپيوناتتا قازاقتاردان چەمپيون شىقپايدى دەپ ويلادى ما ەكەن!؟ ەسەتتەن ۇتىلعان اسلان مۋدرانوۆ تۇعىردا تۇرىپ، مەدالىن ءبىر شەشتى، ءبىر تاقتى، ايتەۋىر كۇمىسكە ريزا بولمادى.
جارايدى، وتكەن ءىس ءوتتى. ەڭ باستىسى ەسەت ءىنىمىز ورمانداي ورىستىڭ اراسىنان ويىپ تۇرىپ التىن جۇلدەگە قول جەتكىزدى! ءبىزدىڭ بۇل شاعىن ماقالادا ايتقىمىز كەلگەنى، قازاق سامبوشىلارىنىڭ قولايسىز ساتتە ءۇنسىز قالماي، تىعىرىقتان شىعا بىلگەنى ەدى. ولار ەشقانداي اسىپ-ساسپاي ەلىمىزدىڭ əنۇرانىن شىرقادى. ەسەت تە ازامات ەكەن، ولارعا قوسىلىپ كەتتى. بۇل وقيعا وزگە سپورتشىلارىمىزعا ۇلگى بولادى دەپ ويلايمىز! جارايسىزدار، سامبوشىلار! ءبىز سىزدەردى ماقتان تۇتامىز!

مۇساعالي تاسقاليەۆ،

اقتوبە